EGETABU GIA
YOELI
Ogochaakera
Titomanyeti amang’ana igoro y’Omobani Yoel otatiga aria oka tokworokigwa ase obweng’e ase omochakano bw’egetabu eke, gose titomanyeti ngaki ki amenyete. Nigo ekageire ng’a okorika kwaye nigo kware gati y’emiaka 800-300 nyuma Yeso ataraiborwa. Gati y’amang’ana agokwanerwa n’engencho agokwanwa nigo akoorokia ng’a amariiko ayio nigo ariikire koraga “chingaki chi’omoerio” (Apokaliptiki) ayio akonyorekana naende ase egetabu gia Isaya, Zakaria, Danieli, boigo na keria gi’Okomanoka.
Egetabu eke nigo kegokwanera igoro y’ering’ana ri’ogoichania ri’echingige echio chiaorogete boigo n’eguragura ase ense. Goetera ase amang’ana aya omoriki bw’egetabu eke nigo akorora nakoraria ogocha “kw’erituko ri’Omonene.” Nigo agotoenekeria nga Nyasae naimokerie abanto abwo bakwanga emeroberio yaye egetambokero.
Yoel nigo akoboria abwo bakoraa abanto baire egetambokero gw’okweng’ata erio bamoiranere Nyasae ase obwegenwa. Nigo akoinyoria abanto aria Nyasae ariete eira nga mbatorigwe. Eira eyemo ya Nyasae neria nga naiterere abanto bonsi omoika oye, abasacha n’abakungu boigo, abake n’abanene (2:28-32). Ase okobwatana okoyia eira eyio ya Nyasae nigo eirire koba ogoikerania ogocha kw’Omoika omochenu (Ogokora 2:17-21).
Okobagwa kw’egetabu eke
Emechando ase engencho ye chingige 1:1—2:17
Eira y’okoiranerigwa kw’amaya 2:18-27
Rituko ri’Omonene 2:28—3:21
Ⅰ
Ⅰ Eri nario ring’ana ri’Omonene riachete ase Yoel, mosinto o Petueli.
Abanto bakoreera ogosirigwa kw’ebimeri
Ⅱ Inwe abagaaka, igwa amang’ana aya!
Inwe abanto bonsi abamomenyete ase ya Yuda, tegerera moigwe!
Inee! Amang’ana buna aya anagokorekana ase amatuko aino,
gose ase amatuko e chisokoro chiaino?
Ⅲ Yateebie abana baino amang’ana aya,
na abana baino bayateebie abana babo,
na abana babo bayateebie ekegori kende.
Ⅳ Ogosongerera ase obonge gw’echingige, chiagwereire ebimeri, biria chinyanchaba chiatigaretie, chingige chikayeria,
na eye chingige chiatigaretie, ebisase bikayeria,
na eye ebisase biatigaretie, chingeeti chikayeria.
Ⅴ Inwe abamwatindire nebinyugwa ebiroro, boka morere!
Inwe mwensi aba mokonywa edivai, bokia amagombo,
ase engencho amasabibu onsi y’okoroisia edivai enyia,
asarigwe.
Ⅵ Risaga ri’echingige chinyinge riaumokeire ense yaito, nigo rire n’echinguru chi’ogokumia na nigo rire rinene mono; amaino aye nigo agwekaine ay’Endo, na amagegu aye nigo anga buna ay’endo eaberi.
Ⅶ Giasaririe emesabibu yaito,
kiabunire emeko yaito;
kiayesaboire, na gotuguta amasabo inse,
ne chinsagia chi’emete eyio chiarabire se.
Ⅷ Rera na kobokia amagombo buna omoiseke omwekungi obegete chianga chi’echigunia,
okwereirwe nomosaacha bw’oboke bwaye.
Ⅸ Okoruegwa kw’endagera na ogw’ekenyugwa biatangirwe,
tibirentwa ase enyomba y’Omonene.
Abakuani abare abakoreri b’Omonene nigo bakorera.
Ⅹ Emegondo yatigaire bosa;
riroba nigo rikorera ekiagera endagera yasirigwe,
edivai tekobao
na amaguta ’emezeituni akeeire kegima.
Ⅺ Inwe abaremi ichana na gosooka,
nainwe abaroiseria b’emesabibu, rera,
ekiagera engano na esairi biasirigwe
amo nokwama gwonsi kw’emegondo.
Ⅻ Emesabibu yomire, na emeko boigo.
Emekomomanga, na emekendo, na emete y’amapera,
ee, emete ende yonsi y’emegondo yomire.
Ogochenga kwaerire ase egati y’abanto.
ⅩⅢ Inwe abakuani, eboyie chigunia, morere,
nainwe abakoreri b’egesasiimero, bokia amagombo!
Eboyie chigunia, morere ase Hekalu ime ase obotuko bwonsi,
ekiagera okoruegwa kw’endagera na ogw’ekenyugwa biaborire,
ase enyomba ya Nyasae.
ⅩⅣ Raria engaki y’okweng’ata;
rangeria omosangererekano bw’ogosasiima!
Sangereria abagaaka na abanto bonsi b’ense eye,
bache ase enyomba y’Omonene, Nyasae oino,
erinde morere ase Omonene.
ⅩⅤ Obobe nobwaito, ekiagera rituko ri’Omonene nigo rire ang’e,
riraarente ogosirigwa korwa ase Omonguru.
ⅩⅥ Endagera yasiriigwe torigereretie
na amaiso aito. Omogooko na amaseko arusiigwe korwa ase enyomba ya Nyasae.
ⅩⅦ Chimbusuro chagundeire riroba ime;
ebiage biatigaire bosa na ebigancha biasarekire,
ekiagera endagera ekogachwa yaborire.
ⅩⅧ Rigereria chitugo buna chikwana chichandegete,
amaicho e chiombe achandekire,
ekiagera obonyansi bwaborire chikorisia,
nonya namaicho e ching’ondi achandekire.
ⅩⅨ Aye Omonene, inche nigo nkorera asore,
ekiagera omorero bwomirie obonyansi ase ebitii,
n’echimeme chi’omorero chiasiririe emete y’orosana.
ⅩⅩ Nonya ne ching’iti chi’orosana nigo chikorera asore,
ekiagera chindooche chiakamire, amaache taiyo,
ee, omorero oria osambire amarisio ’erooro.