Ⅸ
Ekiina ki’Omonene
Ⅰ Nkarora Omonene oteneine ang’e negesasiimero, ere agateeba, “Aka ebisure bie chisiiro goika emeriibo y’emetobwa y’egesieri inse etengeche; ebisure bibunanekane bigwere emetwe y’ abanto bonsi. Abaratigare nimbaite nemioro. Onde tari oratame, gose oratooreke, nonya noyomo.
Ⅱ Nabaisa korema basoe inse agwo aase abakuure, okoboko kwane nigo korabarusieo; nabaisa koriina baike igoro nimbatabokanie gochia inse aa.
Ⅲ Nabaisa kwebisa ase egechuria ki’egetunwa gia Karimeli, nimbarigie mbarusieo; nabaisa gosoa ase enkori y’enyancha inse bebise ng’a timbarora, aroro agwo ninchike eng’iti engenda inse ebarome.
Ⅳ Nabaisa koirwa ase obosomba nababisa babo, aroro agwo ninchike emioro ebaite. Nimbaonchorere amaiso ane mbakorere ayare amabe na tari ayare amaya.”
Ⅴ Omonene, Nyasae bw’Emeganda, karakune ense,
ero nigo ekonyititoka,
na ebitongwa bionsi bireo bibe bikorera. Ense engima neimokererigwe igoro, naende eiranigwe inse,
buna orooche rwa Naeli rore agwo Misiri.
Ⅵ Oria okoagacha chiero chiaye aaria igoro,
na obeka obokumbe bwaye igoro y’ense na kobokong’ia,
oria okorangeria amaache ’enyancha,
oyaumora igoro ase ense,
Omonene nario erieta riaye.
Ⅶ “Inwe Abaisraeli, Inee, timonga buna Abaetiopia asende? Inee! Tinabarusetie inwe Abaisraeli korwa ase ense ya Misiri, na Abafirisiti korwa ase ense ya Kafitori, na Abaasuri korwa Kiri?” Nab’Omonene ateebire.
Ⅷ “Rora inche Omonene nigo ndarigererie namaiso ane obogambi obwo bogokora ebibe. Nimbosirie borue ase obosio bw’ense, korende tingosiria kegima abanto b’ororeria rwa Yakobo.” Nabo Omonene ateebire.
Ⅸ “Naama! Ninchike ng’a Abaisraeli basongwe ase egati y’ abanto b’ebisaku bionsi, buna obori bogosongwa. Korende nonya nenyeke ensinini tekogwa inse.
Ⅹ Abanyabibe bonsi b’ abanto bane, abwo bagoteeba ng’a amabe takobanyora gose kobakorera kende, ’mbakenywe nemioro.
Abaisraeli mbairanerigwe amaya abo ase amatuko agochi‐gocha
Ⅺ “Rituko ngochicha rire ekero ndatenenie esaiga eria ya Daudi yagwete, ning’agache naende aase agwo atagogete, ngororokie amatombe aye; ninyeagache naende, ebe buna yarenge agwo kare.
Ⅻ Abaisraeli mbaire ensemo entigari ya Edomu, boigo mbaire chinse chi’ebisaku ebio bikorokwa ase erieta riane.” Nabo Omonene, oyio orakore ayio, agoteeba.
ⅩⅢ Omonene nigo agoteeba iga:
“Rora amatuko ngocha are, ekero omoremi araikeere omogesi,
na omomiti amasabibu araikeere omobusuri chimbusuro.
Ebitunwa mbitonyie edivai enyansu,
na ebigoro mbiichore edivai.
ⅩⅣ Ning’iranie abanto bane Abaisraeli korwa ase obosomba.
Barabwo mbaagache naende emechie eyio yasiretigwe bamenyeo,
mbasimeke emesabibu na konywa edivai yaye;
boigo mbareme emegondo,
basimeke chindagera na koria okwama kw’emegondo eyio.
ⅩⅤ Nimbairanie mbabeeke bamenye ase ense yabo,
tibagotegorwa korwa ase ense eyio nabaete.”
Nabo Omonene, Nyasae oino, ateebire.