EGETABU GIA
OBADIA
Ogochaakera
Egetabu eke ki’Omobani Obadia nigo kere egetabu egeke ase ebitabu bionsi bi’Ababani. Obobani bw’Obadia nigo bobwate amang’ana abere: Egesusuro ase Edomu “n’erituko ri’Omonene” agwo ekero Abaisraeli bagocha gwakana egesiomba ase Abaedomu. Kero kende egetabu eke nigo kiarigetwe ariaa Yuda chinganki inke igo nyuma y’okoirana korwa obosomba.
Okobagwa kw’egetabu eke
Egesusuro kia Edomu 1-14
Rituko ri’Omonene 15-21
Ⅰ
Ⅰ Oko nokorora kw’Obadia.
Aya naro Omonene agoteeba igoro y’egesaku kia Edomu.
Omonene nae Abaedomu egesusuro
ee, twaigure amang’ana korwa ase Omonene,
na omotomwa otomirwe gochia ase abanto b’ebisaku, ogoteeba:
“Imoka, togende korwania Abaedomu esegi!”
Ⅱ Omonene Nyasae nigo agoteebia egesaku kia Edomu “Rora, ningokore obe omoke ase egati y’abanto b’ebisaku,
obe kogochaywa mono na bonsi.
Ⅲ Oboenenu bw’enkoro yao bwakong’ainire,
aye omenyete ime y’emienya y’ebitare;
agwo ase omenyete aimokererete igoro.
Nigo ogokwana ase enkoro yao ime, gweteeba:
Ning’o orang’iyerie gochia inse?”
Ⅳ Omonene nigo agoteeba iga:
Noisa koagacha egeswa kiao aaria igoro buna ekeongo,
ee, nokebeke ase egati‐gati ye ching’enang’eni,
inche ninkoiyerie korwa aroro.
Ⅴ “Abaibi gose abasakori baise kogochera botuko,
aye nosirigwe kegima.
Ekeene, nigo baraibe binde bionsi baganetie.
Inee! Abasangereria b’amasabibu baare kogochera,
tibarenge kogotigera nonya naria agotigara?
Korende asore aye ababisa bao bagosiririe kegima.
Ⅵ Inwe abanto b’ororeria rwa Esau chinibo chiaino chiasakoirwe;
na obonda bwaino bwaibirwe bwonsi!
Ⅶ Abanto baria bonsi kwabwatanete nabarabwo bagoseririe gochia ase orobebe,
abanto baria gwakorete omorembe nabarabwo bakong’ainire na gokobua.
Abasani bao mokoria komo bagotegeire oboreba, bagoteeba:
Ng’ai obong’aini bwao bore?”
Ⅷ Omonene nigo agoteeba iga:
Ase rituko erio ninsirie abanto abang’aini ba Edomu,
naende ninsirie okomanya gwonsi korwa ase Egetunwa gia Esau.
Ⅸ Inwe Abatemani, abarwani baino b’esegi bare chituoni mbaondoke,
na kera oyomo ore ase Egetunwa gia Esau naitwe asirigwe kegima.
Ayakogera Abaedomu baegwe egesusuro
Ⅹ Ekiagera mwaureretie na goita abanto bamino b’ororeria rwa Yakobo,
namosookigwe na gosirigwa goika kare na kare.
Ⅺ Inwe nigo mwatenenete ensemo ase rituko riria,
ekero abanto b’ense engeni bairete chinibo chiabo,
bagasoa ebiita bia Yerusalemu, bakayoakera obomera.
Naboigo nainwe mwarenge buna barabwo.
Ⅻ Anga timware kogoka ase rituko riria amabe acherete abanto bamino.
Gose timware gochenga ase rituko ri’ogosirigwa kw’Abayuda,
gose timware gokwana noboenenu ase rituko ri’emechando yabo.
ⅩⅢ Inwe anga timwasoete ase egeita ki’abaanto baane
ase rituko ri’amaakwa abo;
gose anga timwagokerete emechando yabo ase rituko ri’amaakwa abo,
gose anga timwaramborete amaboko aino koira chinibo chiabo
ase rituko ri’amaakwa abo.
ⅩⅣ Inwe anga timwatenenete ase amatabekania e chinchera
goita abanto ba Edomu kobagotama,
gose anga timwabegete abatooregete babo bache gosirigwa
ase rituko riria ri’emechando yabo.
Nyasae nanachere abanto b’ebisaku ekiina
ⅩⅤ Rituko ri’Omonene ng’ang’e rire gochera abanto b’ebisaku bionsi.
Buna mwabeire mogokora, naboigo nainwe morakorerwe.
Ogokora kwaino nkobairanere inwe abanyene.
ⅩⅥ Buna babeire bakonywera egekombe ki’endamwamu yane igoro ase egetunwa kiane egechenu,
naboigo nabaanto b’ebisaku bionsi baragenderere konywa botambe,
ee, mbanywe bakoore pi basire kegima.
Obobui bw’Abaisraeli
ⅩⅦ “Korende ase egetunwa gia Sayoni mbabe aroro abaratooreke
na aase agwo nabe aachenu.
Abanto b’enyomba ya Yakobo nabairanerigwe ense yabo.
ⅩⅧ Abanto b’enyomba ya Yakobo mbabe omorero,
na ab’enyomba ya Yusufu mbabe buna ekebemberi ki’omorero,
mbasirie ab’enyomba ya Esau buna omorero ogosamba amasakwe amomo.
Nonya n’oyomo obo tagotoreeka.
Ninche Omonene nakwanire ayio.
ⅩⅨ Abanto b’ense ya Negebu mbaire Egetunwa gia Esau,
na ab’ense omweya mbaire ense y’Abafilisti.
Abaisraeli mbaire ense y’Abaefraimu na ey’Abasamaria chibe echiabo;
na abanto ba Benjamini mbaire Gileadi ebe eyabo.
ⅩⅩ Abarwani esegi b’Abaisraeli abwo bairetwe ase obosomba
mbairane bamenye ase ense babue omochie o Foiniki goika Sarefata.
Abanto ba Yerusalemu bairetwe ase obosomba, abwo bamenyete Sefaradi,
mbaire emechie ya sugusu ya Yuda ebe eyabo.
ⅩⅪ Erio abatooria mbariine ase Egetunwa gia Sayoni,
bagambere Egetunwa gia Esau.
Omonene omonyene nere orabe omorwoti.”