EGETABU KIA
YONA
Ogochaakera
Goetania ebitabu bionsi bi’Ababani, egetabu kia Yona n’omogano.
Nigo kegokwanera omogano igoro y’Omobani oyomo oyio ogokwanwa ara rimo rioka ase okobwatana ogokoro. Ase 2 Abarwoti 14:25.
Yona nigo agotema gotama korwa ase okorangerigwa kwa Nyasae na magega yaye bw’emurungania ng’a magega kaigwereire ochire ase obokoreri obwo abanto bakaigwa eriogi ria Nyasae ogotoreka gokarorekana okio ataroche. Abaninawi bakangama, korende Yona tagokigwa. Okwegera okonene: Nyasae nere okoraa abasomba baye buna barabwo bataganeti. Egi’akabere: Mwanyabaanto takonyara kobekera Nyasae ebireng’o bi’obwanchani bwaye ase abanto baye.
Okobagwa kw’egetabu eke
Okorangerigwa kwa Yona na ogotaigwera kwaye 1:1-17
Yona okoonchoka na gotoorigwa 2:1-10
Yona okorentera abanto ba Ninawi amang’ana 3:1-10
Amaabera a Nyasae ase abanto ba Ninawi 4:1-11
Ⅰ
Yona okorangerigwa na kwanga koigwera Omonene
Ⅰ Ring’ana ri’Omonene rigacha ase Yona mosinto bw’Amitai, rikamoteebia:
Ⅱ “Imoka ogende Ninawi, omochie oria omonene, oake eriogi ri’okoyokuurera, ekiagera ogokora kwaye okobe gwaikire ase obosio bwane.”
Ⅲ Korende Yona akaimoka, agatama gochia Tarisisi ng’a arue ase obosio Omonene. Agatirimboka gochia Yopa, na agwo akanyora emeeri ekogenda Tarisisi. Erio agaakana chitaabu chi’orogendo, agasoa ime, akagenda amo nabaanto bande gotama gochia Tarisisi ng’a arue ase obosio Omonene.
Ⅳ Korende Omonene akagusia omwaga omonene mono igoro ase enyancha, na ekembugu‐mbugu gie chinguru kegacha ase enyancha, na emeeri ekaba ang’e kobuneka.
Ⅴ Erio abagendia b’emeeri bakaondoka, na kera oyomo akarangeria enyasae yaye ng’a emokonye. Abanto abwo bakaimokia chigurube chiarenge ase emeeri ime, bagachituguta gochia ase enyancha ime, ng’a nario emeeri eragusue. Bono Yona ere konya otirimbokire gochia nyaro ime y’emeeri, na aroro nigo araire chitoro chinene mono.
Ⅵ Omochiki bw’emeeri akagenda asare akamobooria, “Naki oraire chitoro iga okirete‐kiri? Imoka orangerie Nyasae oo! Ande Nyasae oyio nabo arabaise gotorengereria atokonye titosira.”
Ⅶ Abanto baria bagateebania, “Tiga toake obomera tomanye gose ning’o ogerire amabe aya atocheire.” Erio bagaaka obomera, na obomera obwo bokagwera Yona.
Ⅷ Ase ayio abanto baria bakamobooria, “Toteebie gose ning’o ogerire amabe aya atonyorire. Meremo ki ogokora aye? Ng’ai kwarure? Ense yao nereri? Ngesaku ki ore?”
Ⅸ Ere akabairaneria, “Inche n’Omoiberania inde, na nigo inyirogete Omonene, Nyasae o igoro, oyo otongete enyancha na ense enyomo.”
Ⅹ Erio Jona akabateebia ng’a nigo are gotama korwa ase Omonene Nyasae. Ekero baigwete ayio, abanto baria bakairoka mono, bakamobooria, “Mang’ana ki aya gwakorire?”.
Ⅺ Ase chingaki echio chionsi enyancha nigo yagendererete gosareka mono. Erio abanto baria bakabooria Jona, “Ngento ki tokogokorera, erinde enyancha etotoerere?”
Ⅻ Ere akabairaneria, akabateebia, “Inyimokie, mondute ase enyancha ime; ero netoerere ase more, ekiagera namanyire ng’a ninche nagerire ekembugu‐mbugu kiabacheire.”
ⅩⅢ Nonya naboigo abanto baria bagateema ne chinguru gosukia emeeri eria gochia ase engegu, korende tibanyarete, ekiagera ekembugu‐mbugu keria nigo kiagendererete koburukania enyancha mono goetania.
ⅩⅣ Ase ayio abanto baria bakarera ase Omonene, bagateeba, “Aye Omonene, totoa egesusuro ki’ogokwa ase engencho y’ogosiria obogima bw’omonto oyo. Ekiagera aye Omonene gwakorire buna bwanchete.”
ⅩⅤ Erio bakaimokia Yona, bakamoruta ase enyancha ime; na agwo kegima enyancha egatoerera.
ⅩⅥ Eke gekagera abanto baria bakairoka Omonene mono, bakamoruera ekeng’wanso na koria chiira chi’okomokorera.
ⅩⅦ Ase ogochika kw’Omonene enswe enene ekamera Yona, na Yona akabeera ime ase enda y’enswe eria amatuko atato, omobaso na obotuko.