Ⅹ
Ogokuurerwa korwa ase omogano bw’Abaisraeli
Ⅰ Baminto, tindigeti momoche komanya ng’a chisokoro chiaito chionsi nigo chiarenge inse ye riire. Barabwo bonsi bagaeta egati y’enyancha;
Ⅱ bonsi bakabatiswa ase Musa ime ase riire na ime ase enyancha.
Ⅲ Bonsi bakaria endagera eria eria y’omoika.
Ⅳ Bonsi bakanywa ekenyugwa keria keria ki’omoika, ekiagera banywete korwa ase egetare ki’omoika kiabatunyanete; na egetare keria nakio Kristo.
Ⅴ Korende abange babo Nyasae tagweneretwe nabarabwo, nakio kiagerete emebere yabo ekwete yasiareretwe ase erooro.
Ⅵ Ebi igo biarenge ebiorokererio bi’ogotokuurera, erinde intwe titoba abanto bakogania amabe, buna baria baganetie.
Ⅶ Gose timoba abasasimi emegwekano buna abande babo barenge; buna eriikire, “Abanto nigo baikaransete koria na konywa, bagatenena gotenga.”
Ⅷ Gose titokora obotomani buna abande babo bakorete, na abanto chilifu emerongo ebere na isato bagakwa ase rituko erimo.
Ⅸ Gose titoteema Omonene, buna abande babo bakorete, bagasirigwa ne ching’iti.
Ⅹ Gose timwemurungania buna abande babo bemurunganetie bagasirigwa noria Omosiria.
Ⅺ Aya agakoreka ase bare buna ekiorokererio, akarikwa ase ogotokuurera intwe abatogocherwa nomoerio bw’ense.
Ⅻ Ase ayio oyogwekaga ng’a nateneine erende tagwa.
ⅩⅢ Ogoteemwa tikwabanyorete inwe, otatiga okore kw’engencho ya Mwanyabaanto. Nyasae nomwegenwa, takobatiga moteemwe goetania buna chinguru chiaino ching’ana, korende amo nogoteemwa nakore egesieri mogosokera, erinde monyare gokoremereria.
Ogosasimwa kw’emegwekano nkogwenerete gotamwa
ⅩⅣ Ase engencho eyio, abanchwa baane, tama, timobaisa gosasiima emegwekano.
ⅩⅤ Igo ngokwana ase more buna ase abanto bare nobong’aini; morenge aya ngokwana.
ⅩⅥ Egekombe keria ki’ogosesenigwa togosesenia, Inee, tikeri okobwatana namanyinga a Kristo? Omogati oria togosamunyora, tori okobwatana nomobere o Kristo?
ⅩⅦ Ekiagera omogati noyomo, intwe abatore abange nigo tore omobere oyomo; naki intwe twensi nigo tokonyora ensemo yaito y’omogati oria oyomo.
ⅩⅧ Rigereria chingencho chi’Abaisraeli; abwo bakoria ebing’wanso ebio, Inee, tibari kobwatana negesasiimero?
ⅩⅨ Ninki ngokwana? Ng’a keria gekoruegwa ekeng’wanso ase omogwekano bw’ogosasimwa negento? Gose omogwekano oria negento?
ⅩⅩ Taibo, korende ebinto biria abanto b’Ebisaku bakorua buna ebing’wanso nigo bakoruera ebirecha, gose tari Nyasae. Inche tinyancheti inwe mobwatane nebirecha.
ⅩⅪ Timokonyara konywera egekombe ki’Omonene na egekombe ki’ebirecha. Timokonyara kobwatana nemesa y’Omonene na emesa y’ebirecha.
ⅩⅫ Inee! Igo tokogera Omonene abe ne ribero? Gose ntore ne chinguru kobua ere?
ⅩⅩⅢ “Ninde nobosibore gokora kende gionsi”, korende tari bionsi birankonye. “Ninde nobosibore gokora kende gionsi”, korende tari bionsi bikoagacha.
ⅩⅩⅣ Omonto terigeria kwenyorera ebiya, korende arigerie omogisangio oye ebiya.
ⅩⅩⅤ Karie kera egento egekoonigwa ase echiiro, timona koboraboria. Timotiga chinkoro chiaino chichandeke.
ⅩⅩⅥ “Naki ense ney’Omonene, amo na bionsi ebireo.”
ⅩⅩⅦ Onye omonto otari nokwegena okobarangeria inwe ase endagera, na inwe morigetie kogendao; karie kera egento kerabeekwe ase amasio aino, timona kobora‐boria. Timotiga chinkoro chiaino chichandeke.
ⅩⅩⅧ (Korende omonto karabateebie, “Egento ekio kiarurwe ekeng’wanso ase omogwekano bw’ogosasiimwa”, timoria ase engencho yaye ere ayaborokia, na ase enkoro yaye, erinde techandeka.
ⅩⅩⅨ Natebiire “enkoro techandeka”, tari eyao, korende eyaye oria onde.) Nase ki obosibore bwane bokogambigwa nenkoro y’omonto onde omoao?
ⅩⅩⅩ Kondarie ensemo yane ase ogoaka ng’a mbuya mono, nase ki nkoramwa ase egento nasabeire?
ⅩⅩⅪ Gaki komokoria, gose mokonywa gose mogokora ing’ana rinde rionsi, kora onsi ase obonene bwa Nyasae.
ⅩⅩⅫ Timogocha Abayahudi gose Abagiriki, gose ekanisa ya Nyasae.
ⅩⅩⅩⅢ Mobe buna inche; nkogwenera abanto bonsi ase chinchera chionsi. Tinkorigia kwegwenera inche omonyene, korende ngwenere abwo bare abange, erinde banyare gotoorigwa.