Ⅰ +Mobe abegi baane, buna inche inde omwegi o Kristo.
Abakungu beboetie ase emesangererekano y’ekanisa
Ⅱ Nabatogirie baminto, ekiagera mwang’inyoire ase amang’ana onsi, na inwe mwabwatire chingencho echi nabaete koreng’ana buna nabachiete. Ⅲ Korende nindigetie momanye ng’a Kristo nere omotwe o kera omosacha; na omosacha nere omotwe bw’omokuungu; na Nyasae nere omotwe o Kristo. Ⅳ Kera omosacha kagosaba gose gakobana, na ere nare negento atubete omotwe oye, igo tasigeti omotwe oye. Ⅴ Korende kera omokungu kagosaba gose kobana na taboeti omotwe oye, igo tasigeti omotwe oye, nigo areng’aine nere oyogingerete etukia yaye. Ⅵ Naki onye omokungu tarigeti kweboa, tiga agingire etukia yaye; korende onye nobosooku ase omokungu konachwa etukia yaye gose kogingirwa tiga eboe. Ⅶ +Naki tegwenereti omosacha gotuba omotwe oye, ekiagera nomogwekano bw’obonene bwa Nyasae; korende omokungu nobonene bw’omosaacha. Ⅷ +(Naki omosacha tarwete ase omokungu, korende nomokuungu orwete ase omosacha. Ⅸ Gose omosacha tatongetwe ase engencho y’omokuungu, korende nomokuungu ase engencho y’omosaacha.) Ⅹ Ase ayio negwenerete omokungu abe nekemanyererio gi’okobua ase omotwe oye ase engencho y’abamalaika. Ⅺ (Korende ase Omonene omokungu takoba omosacha ataiyo, gose omosacha takoba omokungu ataiyo. Ⅻ Naki buna omokungu arwete ase omosacha, naboigo na omosacha nere akoiborwa nomokuungu, korende bionsi nigo bikorua ase Nyasae.) ⅩⅢ Egambie inwe abanyene. Inee! Mboronge omokungu asabe Nyasae atatubeti omotwe oye? ⅩⅣ Inee! Engencho ya Mwanyabaanto teri kworokereria ng’a onye omosacha okoba netukia entambe nigo ere obosooku asare, ⅩⅤ korende onye omokungu okoba netukia entambe nigo ere obonene bwaye? Ekiagera oeirwe etukia eria ase ogwetuba. ⅩⅥ Korende onye monto onde bwensi origetie korenta amang’ana ’okoamererania ase engencho eyio, intwe titori nengencho buna eyio, nonya ne chikanisa chia Nyasae.
Ogochecheria Epasaka y’Omonene
ⅩⅦ Korende ase okobaa amachiiko akobwatia ayio tinkobatogia, ekiagera timori gosangererekana ase amaya korende ase ogosaria. ⅩⅧ Naki ritang’ani naigure ng’a ekero mogosangerereka ase ekanisa ogwatananekana nkore ase more. Ayande aya naigure negenire ng’a namaene. ⅩⅨ Naki ogwatananekana nkogwenerete kobe ase egati yaino, erinde abwo bare abeekeene bamanyekane maiso marore ase more. ⅩⅩ Ekero mogosangererekana amo, timori koria endagera y’Omonene; ⅩⅪ naki kera oyomo nigo agotang’ana kobogoria endagera yaye ase okoria, oyomo nare nenchara, na oyonde otindete. ⅩⅫ Inee! Timori ne chinyomba aase mokoragerera na konywera? Gose mwachayire ekanisa ya Nyasae na gosookia abwo batari na gento? Naki ndabateebie? Nimbatogie ase aya? Yaya, tinkobatogia.
Bun’Omonene orokereretie endagera yaye egokorwa
(Mat 26:26-29; Mar 14:22-25; Luk 22:14-20)
ⅩⅩⅢ Naki inche nkanyora korwa ase Omonene aya nabaeire inwe, ng’a Omonene Yeso obotuko boria aruetwe akabogoria omogati, ⅩⅩⅣ gakoorire koiraneria ng’a mbuya mono, akayosamunyora, akabora karie, “Oyo noro omobere one orurwe ase engencho yaino; kora iga ase okong’inyora inche.” ⅩⅩⅤ +Naboigo akabogoria egekombe magega y’okoria, akabora, “Egekombe eke nokobwatana okoyia ase amanyinga aane; kora iga kera ekero mogokenywera ase okong’inyora inche.” ⅩⅩⅥ Naki kera ekero mokoria omogati oyo na konywera egekombe eke, nigo mokoraria amakweri y’Omonene goika achiche.
Okonyora endagera y’Omonene buna etagwenereti
ⅩⅩⅦ Gaki kera oyokoria omogati oyo gose konywera egekombe eke ki’Omonene buna etagwenereti nabe nokomocha igoro y’omobere bw’Omonene na amanyinga aye. ⅩⅩⅧ Tiga omonto erenge omonyene, erio arie omogati na konywera egekombe. ⅩⅩⅨ Naki oyokoria na konywa buna etagwenereti nigo akwegambia ere omonyene ase okoria na konywa, ase ogotatanana ng’a oria nomobere bw’Omonene. ⅩⅩⅩ Nakio gekogera abange ase more bare abareu na abarwaire, na abanto batari bake bakuure. ⅩⅩⅪ Korende gatoregambie buya intwe abanyene, anga titwagambigwa. ⅩⅩⅫ Gatokogambigwa iga togosusurwa n’Omonene, titobaisa konacherwa ekiina amo nense.
ⅩⅩⅩⅢ Gaki baminto, komogosangererekana amo ase okoria, moganyane. ⅩⅩⅩⅣ Omonto kare nenchara, tiga arie mwaye, timobaisa gosangererekana amo ase okonyora okogambigwa. Na aya atigaire ninyaroisie ekero ndache.
+ Ⅺ:Ⅰ 1 Abakr 4:16; Abafl 3:17 + Ⅺ:Ⅶ Omoch 1:26,27 + Ⅺ:Ⅷ Omoch 2:18-23 + Ⅺ:ⅩⅩⅤ Okong’ 24:8; Yer 31:31-34; Okong’ 24:6-8