ⅩⅥ
Ogosangererigwa kw’ebiegwa ase abachenu
Ⅰ Bono ase amang’ana y’ogosangererigwa kw’ebiegwa ase abachenu, buna nachiigete abanto be chikanisa chia Galatia, nainwe mokore boigo.
Ⅱ Ase kera rituko rie ritang’ani ri’echuma, kera oyomo ase more abe okogaacha mwaye ensemo ase eki anyorire, koreng’ana buna aranyare, erinde ebiegwa tibisangererigwa ekero nachire.
Ⅲ Inche kondaike nimbatome ne riruube aba morachore, baire ebiegwa biaino goika Yerusalemu.
Ⅳ Onye ngwenerete ngende inche, rirorio nabagende amo nainche.
Emeroberio yokogenda
Ⅴ Korende ninchiche ase more, magega konaetire egati ya Makedonia, ekiagera nindengereretie goeta egati ya Makedonia.
Ⅵ Aande gose nimenye amo nainwe, gose nimenye seino ekero gi’etoigo, monyare gonkooba ekero kende gionsi aase ndigetie kogenda.
Ⅶ Naki tindigeti kororana nainwe ase ogoeta gwoka, ekiagera ninganetie komenya seino egeka getari geke, Omonene karanche.
Ⅷ Bono nimenye ase Efeso goika rituko rinene ria Pentekosti;
Ⅸ naki naigoreirwe egesieri ekegare keraarente okwama, korende abange mbareo bakong’amereria.
Ⅹ Ekero Timotheo arache, rigereria ng’a amenye amo nainwe atari nobwoba, ekiagera nigo agokora emeremo y’Omonene buna inche.
Ⅺ Gaki monto onde tamochaya, korende momokoobe ase omorembe, erinde airane ase ’nde, ekiagera nimoganyete amo nabaminto.
Ⅻ Korende ase amang’ana ’Apolo oyominto, nigo namosorora mono achiche ase more amo nabwo baminto bande, korende ere tarigeti gocha bono. Nachiche karanyore ribaga.
ⅩⅢ Renda, motenene bokong’u ase okwegena kwaino, mobe abasacha, mobe ne chinguru.
ⅩⅣ Amang’ana aino onsi akoreke ase obwanchani.
ⅩⅤ Bono baminto, mwamanyire ng’a abanto ba nyomba mwa Stefana nigo barenge ab’eritang’ani koonchoka agwo Akaya; na barabwo bebekire ase emeremo y’ogokorera abachenu.
ⅩⅥ Nabasoroire baigwere abanto buna aba, na kera omonto oyogokora emeremo amo nabarabwo ase ogwechanda.
ⅩⅦ Inche nagokire ase ogocha gwa Stefana na Fortunato, na Akaiko, ekiagera bamentete amange aya naremeire korwa ase more.
ⅩⅧ Naki mbansasogetie ase omoika one, na emeika yaino yonsi. Gaki bainyore mono abanto buna abwo.
ⅩⅨ Abanto be chikanisa chi’Asia baabakwanirie. Akwila na Priskila baabakwanirie mono ase Omonene, amo n’ekanisa ere ime ase enyomba yabo.
ⅩⅩ Abaminto bonsi baabakwanirie. Kwanania na konyunyuntana ase obochenu.
ⅩⅪ Oko nogokwania kwane inche Paulo ase okoboko kwane omonyene.
ⅩⅫ Monto onde bwensi otamwancheti Omonene nabe oragererigwe. Inchuo, Omonene oito!
ⅩⅩⅢ Obuya bw’Omonene Yeso bobe amo nainwe.
ⅩⅩⅣ Obwanchani bwane bobe amo nainwe mwensi ase Kristo Yeso. Amina.