RIRUUBE RIA KABERE RIA PAULO OMOTOMWA ASE
ABAKORINTO
Ogochaakera
Magega yogotaara Korinto ase ogotara kwaye kw’eritang’ani, na gochaka ekanisa aroro, Paulo nigo abariikerete riruube erio agokwanera ase 1 Kor 5:9-13. Riruube erio tiriarendetwe buya na tiriaikerete abanto ba Korinto abwo baganeirie korinyora. Magega yaye abakorinto abwo ba Korinto bakariikera Paulo riruube kobatebia emechando babwate. Paulo akariika riruube erio riamanyekanete buna eri’ritang’ani ase abakorinto erio kobatebia buna baranyare komenya nemechando ayio babwate.
Ekero Paulo ariigete riruube eri rieritang’ani konya orobeirie gotaarera abakorinto ase ariakabere (1 Kor 16:3, 5-6).
Orogendo oro rwakabere nigo rwarenge n’emechando ekiagera konya oboamate gati ya Paulo nabakorinto bwabeire obobe (1 Kor 2:1). Nonya nigo Paulo nigo abwate okogania okonene gotaarera abakorinto (2 Kor 1:15-21), korende ribaga riokobataarera, Paulo akabariikera riruube eri togosoma bono erio rikwera buya igoro yogoichana gwa Paulo.
Paulo nigo akorika riruube eri ekiagera konya orobeirie kogenda Teroa korwa Efeso (2 Kor 2:12), na ase engencho atanyorete Tito aria Teroa akagenderera orogendo rwaye goika Makedonia agwo ase anyorete Tito oyio konya oikire aroro korwa Korinto. Tito agateebia Paulo amang’ana amaya buna Abakristo ba Korinto baganetie gokora okobwatana na Paulo na boigo koagacha oboamate gati ya Paulo nabarabwo (2 Kor 7:5-13).
Riruube eri ria Paulo gochia ase abakorinto, buna ere engencho y’amarube a Paulo, nigo rigochaka namang’ana yokoigorera (1:1-11). Riruube eri nigo ribagire ase chinsemo isato.
Ensemo yeritangani 1:12—7:16, Paulo nigo akorengereria igoro yoboamate bwaye amo nabaKristo ba Korinto, boigo Paulo nigo agokwana eki gekogera atari gotaarera abakristo ba korinto. Boigo nigo agokwanera igoro yemeremo yaye yobotomwa, eyio agoteeba buna nigo ere emeremo yomoika omochenu eyio ekoreta okobwatana.
Ensemo yakabere 8:1—9:15 ase ensemo eye Paulo nigo agokwanera igoro yogokonya Abakristo ba Yerusalemu abwo barenge noboremerwa obonene ase ebinto biria bikoganerigwa ase obogima bwa kera rituko (Abar 15:26). Paulo nigo akoboria abakorinto barwe ase omoyo bw’okwerwa ase ogokonya Abakristo abwo ba Yerusalemu.
Ensemo yagatato 10:1—13:10 Paulo nigo akoiranera gokwanera amang’ana yemeremo yaye yobotomwa boigo na koboria Abakristo ba korinto bamoe amasikani ase emeremo eyio.
Okobagwa kw’egetabu eke
Ogochaakera 1:1-11
Paulo na ekanisa ya Korinto 1:12—7:16
Ogosangererigwa kw’ebiegwa ase Abakristo ba Boyahudi 8:1—9:15
Paulo ogwekengera ase okobua kwaye gw’okoba omotomwa 10:1—13:10
Ogokoorera 13:11
Ⅰ
Ogokwania na ogoaka ng’a mbuya mono
Ⅰ Inche Paulo, omotomwa o Kristo Yeso ase ogwancha kwa Nyasae, amo noyominto Timotheo nkobariikera tore inwe abekanisa ya Nyasae ere ase Korinto amo n’abanto bonsi ba Nyasae abare ase ense yonsi y’Akaya.
Ⅱ Obuya bobe ase more na omorembe bikorwa ase Nyasae Tata oito na ase Omonene Yeso Kristo.
Paulo ogoakera Nyasae mbuya mono
Ⅲ Nyasae, Tata Omonene oito Yeso Kristo, Tata bw’amaabera, Nyasae bw’okoremia gwonsi, atogigwe.
Ⅳ Ere nigo agotoremia ase emechando yaito yonsi, erinde naintwe tonyare koremia baria bare ase emechando ende yonsi, ase okoremia okwo twaremigwe intwe abanyene na Nyasae.
Ⅴ Naki buna emechando ya Kristo yatobucheire, naboigo okoremigwa gwaito gwatobucheire ase enchera ya Kristo.
Ⅵ Korende onye intwe tore ase emechando, nigo ere ase okobanyorera inwe okoremigwa na ogotooreka, na onye intwe tokoremigwa, nigo ere ase okobanyorera inwe okoremigwa, erinde monyore chinguru na okoremereria gw’okobogoria emechando eria eria tobabogoreretie intwe.
Ⅶ Na ogosemeria gwaito ase engencho yaino nigo goteneine bokong’u, ekiagera twamanyire ng’a buna more ababwatani b’emechando eria, naboigo morabe ababwatani ase okoremigwa koria.
Ⅷ Naki baminto, nigo twanchete momanye amang’ana ’emechando eria yatonyorete Asia. Chigurube chiria nigo chiaetanetie chinguru chiaito, goika tokerusia moyo koba moyo.
Ⅸ Ee, intwe abanyene nigo twarenge nekina ki’amakweri ase emioyo yaito, erinde titwesemeria intwe abanyene, korende tosemerie Nyasae oyokobokia abakuure;
Ⅹ oyototooretie korwa ase amakweri amanene buna aria, naende natotoorie ase ekero kegochi‐gocha. Ere ntomosemeretie ng’a nagenderere gototooria,
Ⅺ ekero inwe boigo mogotokonya amo ase ogotosabera. Ase igo, abanto abange baakere Nyasae ng’a mbuya mono ase engencho yaito, ase obuya obo twaeirwe, ekiagera abange bagotosabera.
Paulo okoonchora omooroberio orogendo kwaye
Ⅻ Naki ogwetogia gwaito nakwo oko, ng’a chinkoro chiaito ime nigo chigotworokia, ng’a ase obogima bwaito ase ense eye na mono kobua ase egati yaino, nigo tware kogamberwa nobochenu na oborabu bw’omoyo bokorwa ase Nyasae, tari ase obong’aini bwa Mwanyabaanto, korende ase obuya bwa Nyasae.
ⅩⅢ Naki titobarikereti inwe kende, otatiga ring’ana eri rioka moranyare gosoma na komanya. Na inche nasemeirie ng’a omoerio namonyare korimanya,
ⅩⅣ buna motomanyete ensemo, ng’a intwe nigo tore ogwetogia kwaino, buna inwe more ase tore ase rituko riria ri’Omonene Yeso.
ⅩⅤ Ekiagera narenge nobomaene obo nkarigia gocha ase more agwo ritang’ani, erinde monyore ogosesenigwa ara kabere.
ⅩⅥ Ninganetie goetera seino ekero nkogenda Makedonia, naende nkorwa Makedonia ning’iranere seino, erinde monkoobe ase orogendo rwane gochia Boyahudi.
ⅩⅦ Inee! Ekero narengereretie gokora aya, inarenge ne chitang’u‐tang’u koroisia emeroberio yane? Gose nigo nayeroisetie buna omonto bw’ense ore ang’e goteeba, “Ee, ee”, na, “Yaya, Yaya” ase chingaki echimo?
ⅩⅧ Korende buna Nyasae are omwegenwa, ring’ana riaito ase more tiriarenge “Ee” na “Yaya.”
ⅩⅨ Naki Omwana o Nyasae, Yeso Kristo, oyo inche na Silivano, na Timotheo, twarandetie ase egati yaino tabeete “Ee” na “Yaya”, korende asare “Ee” nero ereo botambe.
ⅩⅩ Naki chiira chionsi chia Nyasae nigo chire “Ee” ime asare; nakio gekogera togokwana “Amina” ase Yeso Kristo ase okoa Nyasae obonene.
ⅩⅪ Gaki Nyasae oyotokong’irie amo nainwe ase Kristo; nere otochorete,
ⅩⅫ naende agatobeeka ekemanyererio kiaye, agatoa Omoika oye ase chinkoro chiaito okaba intenenera.
ⅩⅩⅢ Korende inche nigo nkorigia Nyasae ambere kirori, ng’a ase okobarorera inwe amaabera tindagenda Korinto.
ⅩⅩⅣ Tari ng’a nkogambera tore okwegena kwaino; korende nigo togokora emeremo amo nainwe ase omogooko oino, ekiagera moteneine bokong’u ase okwegena.