EGETABU GIA
DANIELI
Ogochaakera
Egetabu gia Danieli nigo kiarigetwe ase ebiro Abayahudi barenge ase ogosusurwa n’ogochandwa okonene ase amaboko y’omorwoti omokaayayu naende otamomanyete Nyasae. Omoriki bw’egetabu eke nigo akobaa abasomi na abanto b’ekiare ki’aye ogosemeria goetera ase emegano n’amaroro buna Omonene namoiyerie inse omorwoti oria omobe na koiraneria Abaisraeli obonene bwabo. Egetabu eke nigo kebwate chinsemo ibere chinene buna ekobwatia aiga; 1. Emegano igoro ya Danieli amo n’abasibwa bamwabo abwo bakobua ababisa babo ase obwegenwa n’okomosemeria ’Omonene. Emegano eye nigo eriikire ase chingaki chi’oborwoti bwa Abaperisi na Abaababiloni 2. Omosangererekano bw’amaroro Danieli arooche ase omogwekano bwechibicha akworokia ogotenena n’okogwa kwa amarwoti ao ao; gochaakera Babiloni, chikobaanera okogwa kw’omochaandi oria omokaayayu, boigo obobui bw’ abanto ba Omonene.
Okobagwa kw’egetabu eke
Danieli na abasani baye 1:1—6:28
Amaroro Danieli arooche 7:1—11:45
a. Ching’iti inye 7:1-28
b. Emingichi na egoree 8:1—9:27
c. Omotomwa otometwe korwa igoro 10:1—11:45
Engaki y’omoerio 12:1-13
Ekieni gia Susana gekongusa abanachi ebina Babere 13:1-64
Bel N’enchoka 14:1-42
OMOGANO O DANIELI NA ABAGISANGIO BAYE
Ⅰ
(1:1—6:28)
Danieli na abamwabo bakoirwa Babiloni kworokererigwa gokorera omorwoti
Ⅰ Ase omwaka o gatato bw’okogamba kwa Yehoyakimu, omorwoti bw’Abayuda, Nebukadinesaro, omorwoti o Babiloni, agacha Yerusalemu akayoboera.
Ⅱ Omonene akabeeka Yehoyakimu, omorwoti bw’Abayuda, ase okoboko kwa Nebukadinesaro. Boigo akaa Nebukadinesaro ribaga aire ebikorero binde bi’enyomba ya Nyasae, na ere akabiira ase ense ya Shinari, ase enyomba y’enyasae yaye, akabibeka ase ekungo y’enyomba eria.
Ⅲ Erio omorwoti agachiika Asipenasi, omoteneneri bw’abasomba b’enyomba yaye, arente abamura korwa ase egati y’Abaisraeli, abare ab’enyomba y’omorwoti, na abande abarenge ab’amasikani.
Ⅳ Abamura abwo goika babe abatari na kemocho ase emebere yabo, naende babe abanyabieni, bare abang’aini abaranyare kweorokereria chiseemi, barabe abaango b’okomanya, baraisanere gokorera omorwoti ase enyomba yaye. Asipenasi aborokererie bamanye korika na gosoma Egekalidayo, naende bamanye gokwana Egekalidayo.
Ⅴ Omorwoti agachiika ng’a kera rituko babe bakoegwa endagera buna eria ere omonyene are koria, naende babe bakonywa edivai buna eria ere omonyene are konywa. Nigo barenge gochia kworokererigwa ase engaki y’emiaka etato; magega y’ayio barentwe ase obosio bw’omorwoti, babe bakomokorera.
Ⅵ Ase egati y’abwo bachoretwe, korwa ase Abayuda nabwo aba: Danieli, na Hanania, na Mishaeli, na Asaria.
Ⅶ Omoteneneri oria omonene akabaroka amarieta amayia, akaroka Danieli Beli‐Tesasari, na Hanania Sadaraka, na Mishaeli Meshaka, na Asaria Abedi‐Nego.
Ⅷ Korende Danieli akanacha ase ebirengererio biaye ng’a tabaisa gwesoyia ase ogotacheneka ase okoria endagera buna eria omorwoti are koria, gose konywa edivai buna eria omorwoti are konywa. Ase ayio agasaba omoteneneri oria omonene amoe ribaga tabaisa gwesoyia ase ogotacheneka.
Ⅸ Nyasae akaa Danieli ogwancherwa na obuya ase obosio bw’omoteneneri oria omonene.
Ⅹ Omoteneneri oria agateebia Danieli, “Nairokire ng’a omonene one omorwoti, oyio obachiikerete endagera yaino, na ebinyugwa biaino, ekero arabarore ng’a amasio aino anyirire kobua ay’abamura bande b’ekegori kiaino, nigo arambutore omotwe.”
Ⅺ Erio Danieli agakwana n’omorendi oria obegetwe koba omoteneneri omonene bw’abasomba b’omorwoti erio arende Danieli, na Hanania, na Mishaeli, na Asaria, akamoteebia;
Ⅻ “Koranche ototeeme intwe abasomba bao ase engaki y’amatuko ikomi, obe kogotoa chindagera chikwama korwa ase riroba tokoria, na amaache tokonywa.
ⅩⅢ Nyuma y’ayio origererie amasio aito na ay’abamura abwo bakoria endagera ekorwa ase omorwoti, na korarore buna tokororekana, otokorere buna oranche.”
ⅩⅣ Omorendi oria akaigwera amang’ana aria abo, akabateema ase engaki y’amatuko ikomi.
ⅩⅤ Ekero amatuko aria ikomi aerete, amasio abo akarorekana are amaya, na emebere yabo ere emeterere kobua ey’abamura bande, baria barenge koria endagera eria yare korwa ase omorwoti.
ⅩⅥ Ase ayio omorendi oria akabatiga bagenderere koria chinyeni, ribaga ri’echindagera chiria chi’omorwoti.
ⅩⅦ Nyasae akaa abamura baria baane chiseemi na obomanyi bw’okomanya amariiko ao ao, na obong’aini bwonsi; naende akaa Danieli obong’aini bw’okomanya engencho y’amaroro ne chindoto.
ⅩⅧ Ekero engaki eria yachigetwe nomorwoti Nebukadinesaro ng’a abamura baria bonsi barentwe ase are yaigete, omoteneneri oria omonene akabaira ase Nebukadinesara.
ⅩⅨ Omorwoti agakwana nabarabwo, na ase abwo bonsi onde tanyorekanete omogogetie buna Danieli, na Hanania, na Mishaeli, na Asaria. Ase ayio abwo baane bakaba bakomokorera omorwoti.
ⅩⅩ Ase amang’ana ande onsi omorwoti ababoretie igoro y’obong’aini na obomanyi, akabanyora ng’a nigo bamanyete ara ikomi goetania abaringoria na abaragori barenge ase oborwoti bwaye bwonsi.
ⅩⅪ Danieli akagenderera kobeera ase enyomba y’omorwoti goika omwaka bw’eritang’ani bw’okogamba kw’omorwoti Koresi.