Ⅰ Ekero Nikanori aigwete buna Yuda n’abanto baye noo bare Samaria, akaroberia kobaboera rituko ri’Esabato ekero batumogete. Ⅱ Abayahudi abwo babetereretigwe komobwatia bakamosorora takora egento kenga buna ekio ase rituko ri’Esabato korende asike rituko erio Nyasae oyio okorora onsi abegete ensemo na korisika goetenia amatuko onsi. Ⅲ Erio Nikanori egetongwa egesinini mono ase ense akababoria buna nenyarekane buna omorwoti nare igoro oyio abachigete basike esabato. Ⅳ Abayahudi bakamoiraneria: “Ee nare Omonene omonyete igoro, oyio ore omorwoti bw’ense yonsi, ere nigo atochigete tosike esabato.” Ⅴ Erio Nikanori akabateebia: “Inche ninche omonguru bw’ense, nabachikire moimokie ebirwanero biaino mokore keria omorwoti akobachika.” Nonya nigo Nikanori tanyarete goikerania omoroberio oye omobe. Ⅵ Ase okweimokia kwaye igoro, Nikanori konya bwengainire buna nagache omorobiri bw’okoinyora obobui bwaye ase Abayahudi. Ⅶ Korende Yuda ere narenge n’okwegena okonene buna Omonene namokonye. Ⅷ Ase igo agateebia abanto baye tibairoka ababisa. Akababeka chinguru na kobainyoria buna Nyasae omonguru konya abakonyire agwo magega, na akabaenekeria buna Nyasae goika abakoonye nonya mbono. Ⅸ Akababeka chinguru n’amangana y’amachiko boigo n’emegerio y’ababani na kobainyoria chiseegi ao ao echio babwete, akabakora bakaba n’okogania mono korwana esegi. Ⅹ Abanto baye ekero barenge ange gochia korwana, ere akabaa amachiiko aye, akabaorokia buna abanto b’ebisaku batari koegeneka ekiagera tibari koigwera okobwatana kwabo. Ⅺ Akabeke abanto baye chinguru akabatebia tibegena chinguba chiabo chioka korende ase amang’ana amaya y’oboremu y’okobeka chinguru. Naende akabaa omoyo ekero abatebetie igoro y’echindoto echio aroche ase amaroro ayio aroche eyio bageneirie kwegena. Ⅻ Akabatebia buna ase chindoto chiaye nigo aroche Onia oyio agwo kare orenge Omokuani omonene, omonto omuya bw’ogokumia, omoitongo, na omwororo, oyio orenge Omokuani omuya oyio bwegeretigwe amang’ana amaya korwa obwana bwaye, oimogetie amaboko aye igoro ogosabera abaisraeli. ⅩⅢ Erio Yuda akarora omonto bw’okogokia mono obwate etukia endabu. ⅩⅣ Onia agateba: “Oyo Yeremia n’omobani o Nyasae, omobani oyio bwanchete Abayahudi bamwabo, ere nigo agendererete gotosabera intwe boigo na Yerusalemu omochie omochenu.” ⅩⅤ Erio Yeremia akarambora okoboko kwaye gw’okorio akaa Yuda omoro bw’etaabu erio agateba: ⅩⅥ “Omoro oyo bw’etaabu n’ekeegwa korwa ase Nyasae. Yoire osirie ababisa bao.” ⅩⅦ Amang’ana ayio amaya Yuda akwanete akabeka kera omonto chinguru n’omoremu, abasae bakaba n’okogania korwana esegi goetania abanto abanene. Omochie obo, Edini yabo boigo n’Hekalu yabo nigo biare ange gosirigwa. Abayahudi tibatagete gosiria ngaki nonya ngake, barabwo bakagania korwania ababisa babo obosio ase obosio. ⅩⅧ Obwoba bwabo tibwarenge ase abakungu babo gose abana babo, korende nigo bwarenge ase Hekalu yabo enchenu. ⅩⅨ Baria batigarete Yerusalemu nigo bagendererete gokumia buna esegi yagendererete aria ase egetii gi’esegi. ⅩⅩ Kera oyomo nigo aganyete korora buna ningo omobui bw’esegi eyio. Abarwani esegi b’ababisa nigo bagendererete gosuka motwe bakobwatesigwa n’abarini chibarasi abwo barenge kera ensemo y’okoboko kwabo, n’echinchogu chiabo nigo chiabekire ase chinsemo chiria chengencho mono. ⅩⅪ Bono Yuda Makabi akarigereria omoganda oyio bw’abarwani esegi bw’ababisa, akarigereria ebirwanero ao ao biabo, n’echinchogu chiabo chintindi. Erio akaimokia amaboko aye gochia igoro agasaba Nyasae oyio ogokora amakumia, ekiagera ere amanyete buna Omonene nigo akoa baria baganeirie obobui, korende tari baria babwate abarwani esegi b’echinguru. ⅩⅫ Bono ere agasaba Omonene agateba iga: “Omonene, Ekero Hezekia arenge omorwoti bw’Abayuda, aye nigo kwamotomerete abamalaika bao, erio agaita abanto 185,000 abarwani esegi b’omorwoti Senakeribu. ⅩⅩⅢ Bono naende ase chingaki echi, aye Omonene ore igoro, toma abamalaika bao erio banyegeri na kwoboyia ababisa baito. ⅩⅩⅣ Ase chinguru chiao chi’ogokumia osirie abanto aba bakogochecheria, abwo bachire gosiria egesaku kiao egechore.” Ase amang’ana ayio Yuda agakora gosaba. ⅩⅩⅤ Nikanori agasuka motwe n’abanto baye bakobugia etarumbeta n’amatera y’esegi. ⅩⅩⅥ Korende Yuda n’abanto baye bakagenda esegi bagosaba Nyasae abakoonye. ⅩⅩⅦ Ase igo bakarwana esegi n’amaboko abo na ase emioyo yabo bagasaba Nyasae; Abayahudi bagaita ababisa babo goetania abanto 35,000. Bagaakera Nyasae nga mbuya mono ase engencho abakonyete. ⅩⅩⅧ Magega y’esegi kobakoirana gochia ’nka sobo bakarora Nikanori oraire inse ase egetii gi’esegi okwete obegete chianga chiaye ch’esegi. ⅩⅩⅨ Erio bagaaka eriogi ri’omogooko na komotogia Omonene ase omonwa obo. ⅩⅩⅩ Yuda Makabi oyio oyio botambe obeire gakorwana esegi ase chinguru chiaye chionsi na ase omoyo oye bwonsi ase engencho y’Abayahudi bamwabo atari gokwa moyo, agachiika abanto baye bagende banache omotwe o Nikanori amo n’okoboko kwaye gw’okorio bare Yerusalemu. ⅩⅩⅪ Ekero baigete Yerusalemu, Yuda agasangereria abanto baye bonsi amo, akabeka abakuani bosio bw’egesasiimero erio agachiika abanto baria barenge bosio bw’esegi. ⅩⅩⅫ Akabaorokia omotwe bw’omoragererigwa oria Nikanori, amo n’okoboko koria omobe oria aimogeti igoro mamincha ye Hekalu enchenu ya Nyasae omonguru. ⅩⅩⅩⅢ Erio akanacha oromeme rwaye akarutera chinyoni chirie, na omotwe oria akayosunga Hekalu ensemo koba obobui na engeria y’oboriri bwa Nikanori. ⅩⅩⅩⅣ Kera oyomo akarigereria igoro na gotogia Omonene ase obobui bwaye bw’ogotanga Hekalu yaye tesarigwa. ⅩⅩⅩⅤ Yuda agasunga omotwe o Nikanori ase enyasi koba kirori ase kera oyomo ase obobui bw’Omonene. ⅩⅩⅩⅥ Ase ebirengererio ebimo egancheranwa buna rituko eri tiriebwa rinde korende ririkwe kera omwaka rituko riria rigotanganera rituko ria Mordekai, rituko ria ikomi na gatato omotienyi o ikomi na kabere rikorokwa Adari ase omonwa bw’ekearabu. ⅩⅩⅩⅦ Iga nabo amang’ana amogenderete Nikanori. Korwa rituko erio omochie o Yerusalemu otigaire ase amaboko y’egesaku ki’Abayahudi; bono nakoreire omogano one igaa. ⅩⅩⅩⅧ Onye orikire buya na ase omoroberio, nagokire; korende onye orikire bobe atabwati moroberio, nabo nanyarete goikera agwo. ⅩⅩⅩⅨ Ntomanyete nga teri buya konywa Edivai gose amache oka, korende Edivai y’ochoganirie n’amache nigo egokora ekenyugwa kiaba egwiansu. Ase igo omogano omuya irikire buya nigo okogokia abasomi. Aiga no omoerio.