Ⅰ Magega y’emiaka etato, Yuda n’abanto baye bakanyora amang’ana buna Demeturio, mosito o Seleuko konya oetire roche goika ase engegu ya Tripoli kare n’omoganda bw’abarwani esegi b’echinguru boigo n’echimeri; Ⅱ na goita omorwoti Antioko amo na Lisia oyio orenge omorendi oye erio akaira ense eyio. Ⅲ Narengeo omonto oyomo orenge korokwa Alkimo. Magega yaye narengeo Omokuani omonene, oyio ase omogooko konya bwanchire komenya buna omogiriki ase chingaki chiria chi’obosaria. Ekero anyorete buna takoba mokuani monene naende, na buna konya osoire ase emechando; Ⅳ agachiera omorwoti Demeturio ase omwaka 151. Ase chingaki echio akaa omorwoti ebiegwa ebi bikobwatia: egutwa y’etaabu, amato y’emekendo, na amato y’emesaituni ayio arusetigwe ase hekalu. Korende tatebete kende igoro y’emeroberio yaye. Ⅴ Magega yaye akanyora ribaga ri’ogoikerania emeroberio yaye y’oboriri. Bono Demeturio nigo aikaransete n’abasemia baye. Akarangeria Alkimo akamoboria eki Abayahudi baroberetie gokora. Erio Alkimo akamoteebia Ⅵ “Abayahudi baria bakorokwa Abahasidi, abwo bakoragwa na Yuda Makabi, nabwo bagosegeta esegi n’obosaria, goikera nonya n’ense etatware morembe. Ⅶ Nabwo bagerete inche intari Omokuani omonene, ekerogo ekio inganeirie koba korwa okoiborwa kwane; Ⅷ ritangani ase engencho inche nkorengereretie mono kegima aye omorwoti n’eriakabere ase engencho naroreire abaminto amaabera, ase engencho y’oboriri bwa Yuda ense engima nigo ere emechando ime. Ⅸ Ase igo nagosoroire aye omorwoti origererie amang’ana ayio onsi buya mono, erio okore buna oranyare erio korusia obobe obwo korwa ase ense yaito n’abanto baito. Ⅹ Onye Yuda gakogenderera koba moyo, rirorio ense yaito tekoba n’omorembe rinde.” Ⅺ Ekero Alkimo akorire gokwana ayio, abasemia b’omorwoti baria bangete Yuda, bagasegeta endamwamu y’omorwoti Demeturio. Ⅻ Bono omorwoti agachora Nikanori oyio orenge omoteneneri omonene bw’abarwani esegi b’echinchogu chiaye, abe omogabana bw’orogongo rwa Yudea, akamotoma gochia aroro, ⅩⅢ aite Yuda na gosebererania abatunyani baye, na komokora Alkimo koba Omokuani omonene bwe hekalu. ⅩⅣ Abanto bonsi b’ebisaku aria Yudea, abwo konya batamire korwa ase Yuda bagacha amo bakabwatana n’abanrwani esegi ba Nikanori, bakagerete buna obobe n’emechando eyio Abayahudi banyorete nigo ekoba okonyora ase bare. ⅩⅤ Abayahudi bakaigwa buna Nikanori amo n’abanto b’ebisaku abwo babwatanete nere ngocha bare, bakeaka ribu emetwe bagasaba Nyasae obo oyio ochorete egesaku kiabo koba enibo yaye kare na kare, boigo oyio okobaa obobui ase okoerokia ase bare. ⅩⅥ Erio ase ogochika korwa ase omonene obo, bagasoka rimo rioka kogenda korwania ababisa babo ange n’ekenyoro gia Adasa. ⅩⅦ Simioni momura omwabo Yuda, nigo arenge korwana na Nikanori korende ere nigo arenge ange kobugwa ase engencho yebitango ebio atamanyete korwa ase ababisa. ⅩⅧ Nonya nigo ekero Nikanori aigwete buna Yuda n’abanto baye bare korwanerera ense yabo ase oboremu n’omoyo bw’okwerwa akanacha ekiina gotiga esegi erio gokoora omochando oyio ase enchera engao. ⅩⅨ Ase igo agatoma Posidonio, Theodoto na Matathia kogenda gokora okobwatana n’Abayahudi. ⅩⅩ Amang’ana igoro y’okobwatana okwo agancheranwa ase obwamo. Ekero Nikanori airerete abarwani baye b’esegi amang’ana igoro y’okobwatana okwo nabarabwo bagancherana ase obomo. ⅩⅪ Rituko rigachorwa ekero abarai baare gocha koumerana bobisi. Ebirogo bi’amasikani bikaretwa korwa ase kera ekambi. ⅩⅫ Yuda konya orobeirie abarwani baye b’esegi kera ase erio ababisa tibamokorera bobe. Korende abarai aba babere bakaumerana nakogamba buya. ⅩⅩⅢ Magega yayio Yuda akabera Yerusalemu ase amatuko atari make, abanto baria bachete nere akabairania sobo. ⅩⅩⅣ Abarai aba babere bakaba abasani abanene, bakaba babwataine baigwanaine botambe. ⅩⅩⅤ Nikanori agasegeta Yuda anyuome anyore abana. Bono Yuda akanyuoma akamenya obogima obuya na obotoereru. ⅩⅩⅥ Ekero Alkimo aroche buna Yuda na Nikanori bagendererete koba amo buya, akarusia ekaratasi eria yarikire okobwatana akagenda goika ase omorwoti Demeturio nero. Agateebia omorwoti buna Nikanori tarenge mwegenwa ase eserekari yaye, ase engencho achorete Yuda abe ribaga riaye nyuma karure oo. ⅩⅩⅦ Amang’ana aya y’oborimo akagechia omorwoti mono. Goetera ase obororo bwaye, omorwoti akarikera Nikanori riruube akamoteebia buna tagokirie namangana y’okobwatana okwo, ase igo akamochika aire Yuda Makabi goika Antioko buna omosibwa ase obwango mono. ⅩⅩⅧ Amang’ana aya ekero omoikerete, Nikanori agachandeka mono ase omoyo oye agasinywa eki agokora ekiagera tatagete kobuna okobwatana n’omonto oyio orendete buya ensemo yaye. ⅩⅩⅨ Korende ase engencho atatagete kobuna ogochika kw’omorwoti, agachaaka korigia enchera y’okobwata Yuda. ⅩⅩⅩ Yuda Makabi ekero aroche buna Nikanori ochakire gokora ebinto buna atagakorire, akamanya buna amang’ana nareo. Bono ere agasangereria omoganda bw’abatunyani baye akagenda akebisa. ⅩⅩⅪ Ekero Nikanori amanyete buna Yuda obeire omongaini bono komoetenia akagenda ase hekalu enchenu ekero abakuani barenge korwa ekengwanso, akabachika barete Yuda ase are. ⅩⅩⅫ Korende abakuani bakamokania na gotiana buna tibamanyeti ase Yuda ebisete. ⅩⅩⅩⅢ Erio Nikanori akarambora okoboko kwaye gochia ase Hekalu agatiana ogoteeba: “Motareeteti Yuda na komorwa ase inde buna omosibwa, rirorio ninsarie Hekalu eye ya Nyasae na gosaria egesasiimero egechenu, erio inche ninyagache Hekalu ya Dioniso.” ⅩⅩⅩⅣ Ekero achiete, abakuani baria bakaimokia amaboko igoro ase Nyasae omwegwenwa omorendi bw’ense yaabo enchenu: ⅩⅩⅩⅤ “Omonene bw’abaanto bonsi, nonya aye totageti kende, nigo yakogogeti koagacha Hekalu yao iga, erio aye omenye amo naitwe. ⅩⅩⅩⅥ Ase igo aye omochenu, omonene bw’abachenu bonsi, orende Hekalu eye eyio yabekirwe ensemo ase engencho yao, totiga esarigwe naende.” ⅩⅩⅩⅦ Narengeo oyomo bw’abarai ba Yerusalemu orenge korokwa Razi, oyo agasoerwa ase Nikanori. Egatebekana buna Rizi oyo konya okonyire abanto baye ase chinchera chinyinge, na buna abanto nigo bamosigete mono goikera ase bare komoroka “Ise Abayahudi.” ⅩⅩⅩⅧ Ase amatuko y’eritangani y’ogochorwa Rizi nigo arwete obogima bwaye ase engencho y’edini y’ekeyahudi, ere agasoerwa ase engencho y’amang’ana ayio. ⅩⅩⅩⅨ Erio koorokia buna angete Abayahudi, Nikanori agatoma abarwani esegi goetenia 500 bagende kobwata Razi; ⅩⅬ ekiagera akagerete buna okobwatwa kwaye nkobe ogoakwa okonene ase Abayahudi. ⅩⅬⅠ Abarwani esegi ba Nikanori bakabuna egesieri ki’enyomba ya Rizi, erio bakaba ange koboera Rizi. Bagasoyia omorero osambe egesieri keria. Rizi akanyora oetenanirwe n’ababisa akarigia gweita n’omoro oye; ⅩⅬⅡ akarora nga mbuya akwe n’amasikani ribaga ri’okobwatwa n’abanyabibe na koorokigwa ogochaaya okwo ataganeirie. ⅩⅬⅢ Ase okwengerwa okwo Rizi akebeta omoro korende konya tarakwa. Bono ekero abarwani esegi baria bakorwania gosoa nyomba, Rizi agasoka chimbero agacharoka enyasi ase oboremu akagwa inse gati y’abanto. ⅩⅬⅣ Abanto bakairana magega ase obwango mono erio Rizi akagwa inse. ⅩⅬⅤ Ekero konya atarakwa are n’obororo, Razi akaimoka ore n’amanyinga ayio arenge goiteka korwa ase aria ebetete omoro, akaminyoka gati gati y’abanto akariina egetare ekenene igoro agatenena. ⅩⅬⅥ Agwo konya amanyinga aerire korwa ase omobere oye, agatandora enda yaye akarusia amara akarutera abanto baria, erio agasaba Omonene bw’obogima amoiranerie amara aye, erio agakwa.