Ⅰ Ase omwaka 149, Yuda Makabi n’abatunyani baye bakanyora amang’ana buna Antioko Eupatori amo n’omoganda oye bw’abarwani besegi ngocha barenge koboera Yudea; Ⅱ na buna Lisia omorendi oria omonene bw’eserekari nao arenge amo na Antioko. Kera oyomo nigo arenge amo na abarwani esegi Abagiriki 110,000 bagotara n’amagoro, na 10,000 abarini chibarasi, na 5,300 abarini chibarasi bande chinchogu 22, amo n’echigari 300 echio chiabwate emeyio emioge. Ⅲ Menelao akababwatesia na akababeka chinguru bagenderere n’esegi tari ase obuya bw’ense, korende nase engencho ere abwate ogosemeria nga natangaswe koba okokuani omonene. Ⅳ Korende omorwoti bw’abarwoti agakora Antioko akaba n’obororo ase Menelao. Lisia akaenekeria omorwoti Antioko nga omobe oyio Menelao nere oretete emechando yonsi; ase igo omorwoti akarwa ogochika Menelao airwe ense ya Beroya aitwe korengana n’ogoitwa gw’ense eria. Ⅴ Ase omochie oyio omorobiri nore oo ore obotambe bw’echimita 22 gochia igoro. Omorobiri oyo nigo oichoirie ribu, ime y’omorobiri oyio chingasi chire oo echio chigotirimboka gochia ase ribu riria. Ⅵ Abanto baria bagosoerwa ase ogokora mamincha y’echinyase gose gokoma komocha konde gwonsi okonene, nigo bare koirwa igoro ase omorobiri oyo batugutwa gochia inse erio bakwe. Ⅶ Eye nero enchera Menelao akwete, nonya n’ogotindekwa tatindekiri; Ⅷ aya naro aganetie. Ekiagera ase chingaki chinyinge nigo arenge gokorera ribu richenu ri’omorero bw’emesa y’egesasiimero bobe, na ase igo ere agakwa koetera ase ribu. Ⅸ Omorwoti Antioko ase obwerori bwaye agakagera buna nigo agocha gochanda Abayahudi mono goetenia ise. Ⅹ Ekero Yuda aigwete aya, agateebia abanto baye basabe botuko na mobaso, ekiagera nigo barenge ange gosira amachiiko abo, ense yabo, boigo nase Hekalu yabo enchenu; nigo baganetie mono ogokonya korwa ase Omonene n’oborendi bwaye; Ⅺ erio ense yabo eyio konya bairanerigwe teirwa naende n’abanto abwo batamosigeti Nyasae. Ⅻ Ase amatuko atato abanto bakaba baraire inse maumama, bakeng’ata nagosaba na komorera Omonene omonyamaabera abakoonye. Erio Yuda akababeka chinguru akabateebia bebeke ange. ⅩⅢ Magega yaye Yuda akaumerana n’abagaaka b’Abayahudi bobisi, erio akaimoka akagenda korwania omorwoti ase chinguru chia Nyasae, magega konya Antioko ataraboera n korwania Yudea na Yerusalemu. ⅩⅣ Bono Yuda agatigera Nyasae omotongi bw’ense kera egento, erio akabeka abanto baye omoyo korwana esegi ase oboremu, na koba ange gokwa ase engencho y’amachiiko abo, Hekalu, Yerusalemu ense yabo, n’echingencho chi’okonara kwabo. Bono ere akabeka obomenyo ange n’omochie o Modeini. ⅩⅤ Yuda akaa abanto baye amang’ana aya y’esegi “Obobui nigo bokorwa ase Nyasae.” Ase obotuko boria Yuda akaboera na gochaka korwana esegi ange neema y’omorwoti agaita abanto goetania 2,000. Boigo akabeta enchogu eria entindi ekoraa echinde ritimo amo n’omorini oye. ⅩⅥ Omoerio oye abanto bonsi barenge ase eema eria bagaichorwa n’obwoba, Yuda n’abanto baye bakarwa oo n’obobui. ⅩⅦ Aya nigo akoregete magega botarakiamoka, na onsi nigo anyarekanete ase engencho Nyasae Omobui abarendete. ⅩⅧ Omorwoti agatema korwania Abayahudi agasinywa, bono ere akarigia chinchera chi’okoboera emechie yabo. ⅩⅨ Agatema koboera omochie obo o Beth-zuri oyio ogitire buya mono. ⅩⅩ Yuda agatomera baria barendete omochie oyio kende gionsi keria baganetie. ⅩⅪ Korende omonto oyomo ore korokwa Rodoko omoyahudi akaorokeria ababisa obobisi gete. Ekero amanywa akarigigwa akabwatwa akabekwa enchera ime. ⅩⅫ Omorwoti agatema eriakabere gokora okobwatana n’abanto ba Beth-zuri na ekero baigwana akang’anyia abarwani esegi baye. Erio ere akagenda koboera Yuda n’abanto baye, korende akabugwa naende. ⅩⅩⅢ Chingaki echio omorwoti Antioko akanyora amang’ana buna Filipo oyio otigetwe Antiokia buna omoteneneri omonene bw’eserekari osarekire. Omorwoti agasinywa eki agokora erio agachaaka gokora okobwatana kw’omorembe n’Abayahudi, agancherana n’amaganio abo na akaria eira y’ogotiana nga nabe kagokorera Abayahudi ase ekeene, erio akarwa ekengwanso n’ebiegwa binde kw’orokia amasikani ase Hekalu, ⅩⅩⅣ akabwatana na Yuda Makabi ase amasikani. Magega yayio omorwoti agachora Hegemonide koba omogabana bw’ense yonsi gati y’omochie Tolemai na Gerari, ⅩⅩⅤ erio ere akagenda bwoye Tolemai. Abanto ba Tolemai bakagechigwa mono igoro y’okobwatana oko omorwoti akorete n’Abayahudi bagataka gokanwe. ⅩⅩⅥ Korende Lisia agakwana n’abanto bonsi maiso marore akabatebia obuya bw’okobwatana oko erio agaisanekia abanto na akanyora ogwancherwa kwabo, erio akairana gochia Antiokia. Aya naro amang’ana igoro y’okorwana chiseegi na ogotiga kw’omorwoti Antioko.