Ⅰ Ekero okobwatana kw’omorembe gati y’Abayahudi na Abasiria kwaerete, Lisia akairana ase omorwoti n’Abayahudi bakairana gochia ase emeremo yabo ya mogondo. Ⅱ Korende abagabana bake b’echinsemo echio, Timotheo na Apolonio omwana o Genaeo, amo na Hieronimo na Demofoni, boigo na Nikanori omoteneneri omonene bw’abarwani esegi korwa Kopro, tibatigete Abayahudi bamenye n’omorembe. Ⅲ Abanto ba Yopa bagakorera Abayahudi baria bamenyete omochie oyio ring’ana ribe mono. Bagekora buna barabwo n’abasani b’Abayahudi, bakabachiika amo n’echiamate chiabo erio barine chimeri batare nabarabwo. Ⅳ Ase engencho abanto bonsi b’omochie konya bachorire gokora bo, Abayahudi tibabete na bwoba barabwo bagancherana ekegeni ekio n’omoyo omorabu. Korende ekero barenge nyancha, abanto ba Yopa bakababeka amache ime, Abayahudi ange 200, bonsi bagakwa ase amache. Ⅴ Ekero Yuda anyorete amang’ana igoro buna abanto bamwabo bakoreretwe, agateebia abanto baye. Ⅵ Magega y’ogosaba Nyasae omonachi ebiina bw’ekeene, bakababoera abaiti baria. Botuko bagasamba ekiambokero kiaroche boigo bagasamba chimeri chionsi na goita abanto bonsi abwo bebisete chimeri ime. Ⅶ Bono ase engencho ebiita bi’omochie biasiekire, Yuda akairana korende ere akarengereria koirana gocha Yopa chingaki chinde erio asirie abamenyi b’omochie oyio bonsi. Ⅷ Yuda akaigwa buna abanto ba Yamnia mbabwate omoroberio bw’ogoita Abayahudi b’omochie oyio, Ⅸ akaboera abanto ba Yamnia botuko, agasamba ekiambokero ebieri bi’omorero bikarorekana korwa Yerusalemu oboare bw’echikilomita 50. Ⅹ Ekero Yuda n’abanto baye barenge korwa agwo erio bagende korwana na Timotheo, ekero konya bagendire ange chikilomita 2 korwa Yamnia, bakaboerwa mobasokano n’Abarabu goetania 5,000, bare kobwatesigwa n’abarini chibarasi 500. Ⅺ Magega y’esegi endoro mono, na ogokonya korwa ase Nyasae, Yuda nabamwabo bakabua. Abaarabu aba ekero babugwa bagasaba babe abasani b’Abayahudi, bakaria eira kobaa etugo na kobakonya ase chinchera chionsi. Ⅻ Yuda akarora nga obosani obo mbokonye Abayahudi ase chinchera chinyinge, erio agancha gokora omorembe nabarabwo. Magega yayio Abaarabu bakairana gochia ase chiema chiabo. ⅩⅢ Yuda boigo akaboera omochie o Kaspini, oyio ogitire bokong’u. Abanto bamenyete ase omochie oyo nigo barenge omoochogano bw’ebisaku binde. ⅩⅣ Abamenyi b’omochie oyio nigo begenete chinyasi chi’omochie obo, na nigo babwate ogosemeria buna endagera eyio bagachete nabo yare kobaisana ase amatuko aria onsi baboereire. Ase igo bagachecheria Yuda n’abanto baye na korama Nyasae. ⅩⅤ Korende Abayahudi bagasaba ase Omonene bw’ense, oyio oiyeretie chinyasi chia Yeriko chingaki chia Yoshua atabwati kende gionsi. Erio bakanyegeria enyasi eria ase chinguru, ⅩⅥ na ase engencho Nyasae atagete bakaira omochie. Abayahudi bagaita abanto abange nonya n’egesinga kiare ange, ekio kiarenge obogare bw’ekeng’ese gi’ekilomita, kegaichora amanyinga. ⅩⅦ Korwa ase omochie o Kaspini, Yuda n’abanto baye bakagenda obware bw’echikilomita 150 bagaika ase obomenyo bw’Abayahudi ba Karaksi, ange n’omochie o Tobu. ⅩⅧ Korende tibanyorete Timotheo aroro ekiagera konya orure aroro. Takorete gento kende aria otatiga atigete abarwani esegi abatindi ase eburi gete. ⅩⅨ Abateneneri babere abanene b’abarwani esegi ba Yuda Makabi, Dositheo na Sosipateri bakaboera eburi eria na goita abanto bonsi baria batigetwe oo na Timotheo, abanto 10,000. ⅩⅩ Yuda Makabi akabaga abarwani esegi baye ase ebiombe ao ao, akabeka Doitheo na Sosipateri barae ebiombe ebio, erio ere akarwa agwo akabwatia Timotheo oyio obwate abarwani esegi 120,000 bagotara n’amagoro na 2,500 abarini chibarasi. ⅩⅪ Ekero Timotheo amanyete nga Yuda ’nkomobwatia arenge, agatang’ania abakungu n’abana n’echigurube chiabo bagende Karnaimu, omochie orenge ange naende otare konyarekana koboerwa gose goikereka ase engencho chinchera chiare gochia oo nigo chiare chinyerere. ⅩⅫ Korende ekero ekeombe ki’eritangani ki’abarwani esegi ba Yuda baorogete, abarwani esegi ba Timotheo bakaoboa mono kobwatekana n’oborori bwaretetwe na Nyasae oyio okorora kera egento. Ase engencho y’obwoba obwo bagachaaka gotama gochia kera ase na abande babo bakanyora chingoma korwa ase ebirwanero bi’abamwabo. ⅩⅩⅢ Yuda n’abanto baye bagaseria ababisa aba chimbero goika bagaita Abarwani esegi ange 30,000. ⅩⅩⅣ Timotheo akabwatwa n’abarwani esegi b’ekeombe gia Dositheo na Sosipateri. Korende nigo arenge omongaini mono, agatema kobangaina buna abanto babo abange nigo bare abasibwa baye ase igo nigo baraitwe bakwe onye ere tagotigwa agende. ⅩⅩⅤ Magega yaye karire eira gosibora abanto abwo asibete, agatigwa akagenda. ⅩⅩⅥ Erio Yuda akaboera omochie o Karnaimu amo ne hekalu ya Ataragati e nyasae ekungu agaita abanto 25,000. ⅩⅩⅦ Magega yaye akaboera omochie o Efuroni agwo ase Lisia n’abanto korwa ase ense yonsi bamenyete. Abasae b’echinguru bakeroberia bosio bw’enyasi bakarwana esegi n’oboremu. Ime ase omochie ebigachero mbiarengeo ase ebirwanero biagachire. ⅩⅩⅧ Korende Abayahudi bagasaba Omonene oyio ogosaria chinguru chi’ababisa. Erio bakaira omochie oyio na goita abanto 25,000. ⅩⅩⅨ Korwa agwo bakagenda ase obwango mono goika omochie o Skithopoli oyio orenge obware bw’echikilomita ange 120 Irianyi ya Yerusalemu. ⅩⅩⅩ Abayahudi abwo barenge omochie oyio bagateebia Yuda buna abanto b’omochie oyio babakorerete buya nonya nase chingaki chi’obokongu ⅩⅩⅪ Yuda n’abanto baye bakairaneria abanto b’omochie mbuya mono na kobaboria bagenderere gokorera Abayahudi buya nonya nase amatuko a bosio. Erio bakarwa agwo bakairana gochia sobo Yerusalemu, agwo ase baigete chingaki inkeigo magega y’erituko rinene ri’erigesa. ⅩⅩⅫ Magega y’erituko rinene rikorokwa Pentekosti Yuda n’abanto baye bakaimoka ase obwango bakagenda koboera Gorgia Gabana o Idumea, ⅩⅩⅩⅢ oyio orwanete nabarabwo, ere nigo abwate abarwani esegi 3,000 bagotara n’amagoro nabande 4,000 abarini chibarasi. ⅩⅩⅩⅣ Ase esegi eyio Abayahudi bake bagakwa. ⅩⅩⅩⅤ Erio omoyahudi oyomo omorwani esegi omorini ebarasi korwa ase omochie o Tobu oyio orenge korokwa Dositheo akabwata Gorgia ase eyanga yaye agachaaka komokurura ase chinguru kare n’okogania gi’okomoira. Korende mobasokano oyomo bw’abarini chibarasi ba Thrakia akaminyoka chimbero gocha ase Dositheo akamonacha okoboko kwaye; erio Gorgia akanyora enchera y’ogotama akagenda goika omochie o Marisa. ⅩⅩⅩⅥ Ase chingaki echi Abayahudi abwo barenge inse y’oborai bwa Esdri Omoteneneri omonene bw’abarwani esegi, konya barwanire esegi ase chingaki chintambe, konya bono barosire. Bono Yuda agasaba eri’Omonene aorokie buna nare ensemo yabo, na buna nere okoraa ebiombe ebio. ⅩⅩⅩⅦ Erio Yuda agachaaka goteera amatera y’esegi ase omonwa bw’echisokoro chiaye, Abayahudi bakaboera Gorgia n’abanto baye barabwo bagatama. ⅩⅩⅩⅧ Erio Yuda akaraa abanto baye gochia omochie bw’Adulamu. Eri nigo riarenge rituko magega y’Esabato, ase igo barabwo bagechena buna engencho yabo yarenge erio bagatimoka rituko ri’Esabato. ⅩⅩⅩⅨ Rituko riare kobwatia magega y’Esabato bakarora nga mbuya, erio ase obwango bagasangereria emebere y’abamwabo abwo bakwete ase esegi bakayetindeka ase chimbera chi’echisokoro chiabo. ⅩⅬ Korende ase kera omobere bakanyora chisanamu chi’echinyasae echi chiare gosasimwa agwo Yamnia, ring’ana erio amachiiko y’Abayuda akanete. Agwo kera omonto akamanya eki kiagerete bagakwa. ⅩⅬⅠ Ase igo bagatogia chinchera chia Omonene, omonachi ebina bw’ekeene oyio okobisioria biria bibisire, ⅩⅬⅡ bagasaba Nyasae ababere ebibe ebio. Erio Yuda omonto oria bw’ogokumia akaboria abanto betange korwa ase ebibe, ase engencho mberocherete barabwo abanyene aria abanyorete baria bakorete ebibe. ⅩⅬⅢ Erio agasangereria korwa ase abanto baye chikiro ange ibere chi’egatani agatoma gochia Yerusalemu ase engencho y’ekengwanso gi’okorusia ebibe. Yuda nigo akorete ring’ana eri ase engencho ere nigo egenete igoro y’okobokigwa kw’abakuure. ⅩⅬⅣ Onye atabwate ogosemeria nga abakuure mbabokigwe, nigo yare koba emeremo ya bosa gosabera abakuure. ⅩⅬⅤ Korende ase engencho asemeretie engeria engiya eyio baria bakuure bamwegenete Nyasae bagacheire, erio nigo riare ring’ana rironge gokora. Ase igo Yuda nigo aruete ekengwanso gi’okobwatanigwa erio abanto baberwe ebibe biabo.