Ⅰ Chingaki inke igo magega Timotheo kabuirwe, Lisia momura omwabo omorwoti oyio naende orenge omorendi bw’omorwoti na omonene bw’eserekari akanyora amang’ana igoro yaria akoregete erio akagechigwa mono, Ⅱ akaraa omoganda bw’abarwani esegi 80,000 na abarini chibarasi baye bonsi erio barwanie Abayahudi. Nigo abwate okogania gokora omochie o Yerusalemu obomenyo bw’Abagiriki, Ⅲ na korusia Hekalu ebango buna ase ande onsi ase abanto b’ebisaku bare gosasimera. Boigo na koonia obokuani obonene kera omwaka. Ⅳ Lisia takumetie igoro y’okobua kwa Nyasae, korende ere nigo etogereti chilibu ikomi chi’abarwani esegi bagotara n’amagoro boigo n’echilibu chi’abarini chibarasi, n’echinchogu 80. Ⅴ Ase igo akaboera Juda na korwania orwaki rwa Beth-zuri, ange chikilomita 30 sugusu ya Yerusalemu. Ⅵ Ekero Yuda Makabi n’abanto baye baigwete buna Lisia oboereire chindwaki chiabo, bakarera na kweumia amo n’abanto bonsi, bakobori’Omonene atome omomalaika omuya abatorie. Ⅶ Yuda Makabi akaba oyobwe’ritangani koimokia ebirwanero biaye akaboria abande babwaterane nere barwo amagima abo erio bakonye Abayahudi bamwabo. Erio ase obwango mono bonsi bagasoka chimbero. Ⅷ Korende magega bataragenda are na Yerusalemu, bakanyora buna nigo bakoragwa n’omorini ebarasi obegete chianga chindabu oimogetie ebirwanero bi’etaabu. Ⅸ Erio bonsi bagaakera Nyasae mbuya mono ase okobarorera amaabera; konya obabekire chinguru chisaine koboera nonya n’echingiti chiria chintindi nonya n’echinyasi chi’echichuma. Ⅹ Bono bagasuka bosio bare ange ase esegi, bare amo n’omokonyi oria korwa igoro, ekiagera Omonene konya obaroreire amaabera. Ⅺ Bagacharokera ababisa babo buna endo na goita abarwani esegi 11,000 abwo bare gotara n’amagoro na 1,600 abarini be chibarasi na gokora abande gotama. Ⅻ Abange ba baria batamete nigo batamete n’echingoma boigo konya basiririe ebirwanero biabo. Nonya Lisia omonyene agatama ase obosooku. ⅩⅢ Lisia ase engencho ere tarenge moriri akarengereria buna abuetwe esegi, akainyora buna Abayahudi tibakobugwa ekiagera Nyasae omonguru nere okobarwanesia. Ase igo akaira amang’ana, ⅩⅣ akabasorora banche kobwatana ase obuya, na akaria eira buna nagende gotebia omorwoti abe omosani obo. ⅩⅤ Ase engencho y’obuya bw’abaanto baye, Yuda Makabi agancha amang’ana onsi a Lisia, ase engencho konya omorwoti oitaberanire n’ogosaba okwo konya Yuda aeire Lisia ase amariko. ⅩⅥ Eri rikobwatia neriruube erio Lisia arikerete Abayahudi: Korwa ase inche Lisia gochia ase egesaku ki’Abaisraeli, nabakwanirie. ⅩⅦ Abatomwa baino Yohane na Abisalomu, bang’eire riruube ribwate amang’ana aino ayio mwabatomete, bansabire inche ngancherane naria ariikire ase okobwatana oko. ⅩⅧ Naboririe omorwoti igoro y’amang’ana ayio mwanachete ekiina kobeka bosio bwaye, nere orire eira gokora kende gionsi keria gekonyarekana. ⅩⅨ Komoragenderere koba abegenwa ase eserekari, ninkore aria ’ndanyare ase engencho y’ense yaino. ⅩⅩ Ase amang’ana ayio, nachikire abatomwa baino baumerane n’abateneneri baane erio baigwane ase amang’ana onsi. ⅩⅪ Nabaganeirie amaya. Aya nigo arikirwe ase rituko 24 omotienyi o Dioskorintio omwaka 148. ⅩⅫ N’eriruube ri’omorwoti nigo riare buna ekobwatia: “Korwa ase inche omorwoti, gochia ase oyominto Lisia, nagokwanirie. ⅩⅩⅢ Ase engencho tata ochire koba n’echinyasae, nigo ’ntagete abanto b’oborwoti bwane kogendereria amang’ana abo batari gochandwa. ⅩⅩⅣ Namanyire buna Abayahudi tibarigeti komenya na kobwatia chingencho chi’ekegiriki buna tata arigeti, korende nigo baganetie komenya na kobwatia chingencho chiabo, na basabire gotigwa bamenye igo. ⅩⅩⅤ Bono ase engencho ’ntagete bamenye batabwati bwoba buna ebisaku binde ase oborwoti bwane, bono narure ogochika buna bairanerigwe Hekalu yabo, nagotigwa bamenye kobwatekana n’echingencho chi’echisokoro chiabo. ⅩⅩⅥ Bono nigo narora nga mbuya mbamanyie igoro y’amang’ana aya, na kobaenekeria buna nimbe omosani obo, erio banyare kogendereria amang’ana abo ase omorembe, batabwati bwoba bonde.” ⅩⅩⅦ Eri rikobwatia n’eriruube ri’omorwoti gochia ase egesaku ki’Abayahudi: “Korwa ase inche omorwoti Antioko gochia ase ekegambero ekenene ki’Abayahudi amo n’Abayahudi bande bonsi, nabakwanirie. ⅩⅩⅧ Negenire buna amang’ana aino onsi nagendererete buya buna inche nganetie. Inche mbuya inde. ⅩⅩⅨ Menelao omanyirie buna morigetie koirana seino erio mogendererie emeroberio yaino abanyene. ⅩⅩⅩ Ase igo baria bagocha koirana ase chitariki 13 chi’omotienyio Ksanthiko nabaenekeirie nga timwoboa kende gionsi. ⅩⅩⅪ Bono nabo mokogenderera kobwatia amachiiko aino igoro y’echindagera naria ande buna mwanarete. Moyahudi onde taiyo oraunererigwe ase amang’ana arakoreke atamanyiri. ⅩⅩⅫ Natomire Menelao kobabeeka chinguru. ⅩⅩⅩⅢ Twabaganeirie amaya. Amang’ana aya nigo arikwa rituko ria 15 omotienyi o Ksanthiko, omwaka o 148. ⅩⅩⅩⅣ Abarumi nabarabwo bakarikera Abayahudi riruube rikobwatia:” Korwa ase Kwito Menio na Tito Manio abateneneri b’Abarumi, gochia ase Abayahudi, twabakwanirie. ⅩⅩⅩⅤ Intwe twancheranire n’amangana ayio mwaetwe na Lisia momura omwabo omorwoti. ⅩⅩⅩⅥ Bono intwe nchera tore gochia Antiokia; ase igo rigereria mono amang’ana aria Lisia aboreti omorwoti. Erio motoretere amachibu ase obwango ekiagera intwe ’ntoganetie kobatenenera ase omorwoti, ase engencho y’obuya bwaino. Kora ayio bwango mono buna ekonyarekana, ⅩⅩⅩⅦ timotebana ntorigetie komanya eki mwanachire. ⅩⅩⅩⅧ Twabaganeirie amaya. Amang’ana aya nigo ariikire rituko ria 15 omotienyi o Ksanthiko, omwaka 148.