Ⅰ Yuda Makabi n’abatunyani baye, inse y’oborai bw’Omonene, bakairania Hekalu boigo n’omochie o Yerusalemu. Ⅱ Bagatagora ebisasimero ebio abanto abao konya baagachire ase chichiro boigo nase ogosasiimera. Ⅲ Bagachena Hekalu na koagacha egasasimero oboyia. Erio bagokia omorero ase ogoakania amagena, bagakora ekengwanso ki’eritangani magega y’emiaka ebere, bagasamba ubani, bagokia chitaaya na kobeka emegati emechenu bosio. Ⅳ Ekero bakorete gokora aya, bakarara inse maumama bagasaba buna Omonene abakoonye tibanyora emechando buna eria banyorete. Bakamosaba nga abe n’amaabera ekero akobaa egesusuro ase ebibe biabo ebio barakore, tababeka naende ase amaboko yabaanto b’ebisaku, abwo bakorama Nyasae naende batabwati masikani. Ⅴ Bagachena Hekalu oboyia ase rituko ria 25 omotienyi o Kisilevu, rituko riria riria n’omotienyi oria oria Hekalu yasaretigwe n’abanto b’ebisaku binde. Ⅵ Ase amatuko 8 abanto gakagokera rituko eri buna rituko riria rinene ri’ebigutwa, bakainyora buna egeka geke igo batigete kogokera amatuko amanene y’ebigutwa ekiagera nigo bare gotanga tanga ase ebitunwa nebirubo buna ching’iti chi’orosana. Ⅶ Bono barabwo bakaimokia amato amabese y’emekendo n’echinyimbo chichabeire bagaetanana omochie bagotera amatera y’omogooko na komotogia oria obabuereire erio gochena Hekalu yaye. Ⅷ Bakanacha ekiina na koraria nga egesaku gionsi ki’Abayahudi kebe gekogokera rituko erio kera omwaka. Ⅸ Oyo noro omoerio bw’Antioko oyio ore korokwa Epifane. Ⅹ Bono nigo togokwanera igoro ya Antioko Eupatori, omwana bw’omonto oyo otamomanyete Nyasae, nigo tokorwa omogano omweng’e igoro y’emechando yamonyorete ase chiseegi chiaye. Ⅺ Ekero Antioko Eupatori abete omorwoti, agachora omonto oyomo orenge korokwa Lisia abe omogabana omonene ase amang’ana yense boigo abe gabana omonene ase ense ya Siria enene na Foiniki, Ⅻ ribaga ria Tolemai Makroni, oyio orenge gabana bw’eritang’ani gokorera Abayahudi buya. Makroni konya okorire oboamate bw’omorembe amo n’Abayahudi, erio gotuba obobe obwo konya bakoreirwe. ⅩⅢ Ase engencho eyio abasani b’omorwoti bakagenda bagasoera Makroni buna ere n’omobe, ase engencho konya otigire egesinga gia Kuporo ekio aetwe n’omorwoti Filometori o Misiri, erio akabwatia Antioko Epifane. Kera omonto agateeba buna Makroni n’omobe, bono ere tatwara amasikani aria aganeirie boigo akaurwa ekerogo kiaye; ase igo ere ageita ase okonywa esumo. ⅩⅣ Ekero Gorgia achoretwe koba Gabana bw’orogongo rwa Idumea, ere akeroseria omoganda bw’abarwani esegi erio akaba okona koboera Abayahudi kera engaki. ⅩⅤ Goetania ayio onsi, Abadumea nigo bairete chinsemo gete chi’engencho, erio bakaba bakona gochecheria Abayahudi na kobakorera bobe kera engaki. Bakagenia baria batamete korwa Yerusalemu, erio bakabeka ense ekaba ey’echisegi. ⅩⅥ Bono Yuda Makabi amo n’abanto baye magega kobasabire Nyasae bakaimoka chimbero bakagenda bakaboera chingongo chiria Abaidumea konya bairire. ⅩⅦ Bakarwania Abarwani baria b’esegi barendete chinyasi chi’echingongo echio erio bagaita abanto goetania 20,000. ⅩⅧ Nonya nigo abarwani esegi ange 9,000 bagatama bakabisa ase chindwaki ibere echio chiarenge chinkong’u mono na chiabwate kera egento kiaganeiri gotanga koboerwa. ⅩⅨ Yuda akairana gochia omochie ase aganeirie ase obwango. Korende agatiga Simioni na Yosefu amo na Zakayo n’abanto baye. Omoganda oyio noisaine kogenderera esegi, ⅩⅩ korende bake b’abaanto ba Simioni nigo banchate riaki; ekero baetwe riaki ri’echikiro 64 chi’efeta bagatiga abanto bake bagatama korwa aria ase bebisete ase chindwaki. ⅩⅪ Ekero Yuda anyorete amang’ana aya, agasangereria abarai b’ekeombe kiaye erio agasoera abanto abwo baetwe riaki buna baonirie abamwabo ase ogwanchera ababisa babo batame erio bache kobarwania. ⅩⅫ Agwo agwo agaita abanto abwo erio akaboera chindwaki chiria ibere. ⅩⅩⅢ Ase esegi Yuda akaba omobui mono, na ase esegi eyio agwo ase chindwaki agaita abanto ange 20,000. ⅩⅩⅣ Timotheo oyio agwo magega konya orwanigwe na kobugwa n’Abayahudi, konya osangereirie omoganda omonene bw’abarwani esegi abarini be chibarasi korwa Asia, boigo n’omoganda bw’abarwani esegi bokoondokia, agachaaka gosuka bosio ngora ngora erio koboera Judea na koyoira n’echinguru. ⅩⅩⅤ Korende ekero ababisa aba konya babereire ange, Yuda n’abanto baye bagasaba Nyasae. Bakeboyia chigunia na kweaka ribu, ⅩⅩⅥ erio bakarara maumama ase engasi eria y’egesasiimero, bagosaba Nyasae abakoonye korwana n’ababisa babo, buna ariete eira ase amachiiko aye. ⅩⅩⅦ Ekero bakorete gosaba bakaimokia ebirwanero biabo bakagenda are ake korwa Yerusalemu bagatenena ange n’ababisa. ⅩⅩⅧ Ekero bwakia, esegi egachaka gati y’ebiombe ebi bibere bi’abarwani besegi. Omoganda bw’abarwani esegi b’Abayahudi nigo basemeretie kobua ase engencho y’oboremu bwabo na gosemeri’Omonene, korende ababisa nigo basemeretie chinguru chiabo abanyene. ⅩⅩⅨ Ekero esegi yarorire mono, ababisa bakarora abasacha batano bare n’ebieni bi’okogokia barinete chibarasi echio chiachabeire n’etaabu bakoraa omoganda bw’abarwani esegi b’Abayahudi. ⅩⅩⅩ Abanto aba batano bagaetanana Yuda bakayorenda n’echingobo chiabo abanyene erio bagachaaka korutera ababisa chinsara n’echinkoba. Ababisa baria bagaochoganigwa nagoukorigwa erio abarwani esegi b’abayahudi bakababutabutorana, ⅩⅩⅪ bagaita abarwani esegi abwo bare gotara n’amagoro 20,500 na baria barinete chibarasi 600. ⅩⅩⅫ Timotheo agatama gochia ase orwaki rwarendire mono arenge korokwa Gazare, orogongo rwa Kaerea momura omwabo. ⅩⅩⅩⅢ Yuda Makabi n’abanto baye bakaboera orwaki roria ase egeka ki’amatuko ane, ⅩⅩⅩⅣ korende abanto barenge ime y’orwaki roria bakeigwa buna nigo bare buya, bakagenderera korama Nyasae bobe mono. ⅩⅩⅩⅤ Korende rituko ri’agatano kobogokia mambia abanto 20 ba Yuda barenge n’obororo ase engencho y’amang’ana ayio, bakariina enyasi y’orwaki roria ase oboremu bagaita kera omonto banyorete oo. ⅩⅩⅩⅥ Chingaki echi echi, abande bakariina chinyasi chi’orwaki orwo korwa ensemo yende, bagasamba emerobiri y’orwaki roria. Ababisa abange bagaitwa n’omorero oyio. Ekeombe kende gekabuna ebisieri kegasoyia Abarwani bakaboera omochie oria. ⅩⅩⅩⅦ Timotheo nigo ebisete ase etangi. Nonya nigo bakamoita ere amo na bamura bamwabo Kaerea, amo na Apolofane. ⅩⅩⅩⅧ Magega yayio Abayahudi bakagoka na goteera amatera y’ogwaka mbuya ase Omonene oyio obarendete na kobaa obobui.