Ⅰ Ekaba ase chingaki echi Antioko agachaaka kobabwatia korwa magega korwa omochie o Persia, Ⅱ agwo ase asoete ase omochie oyomo ore korokwa Persepoli agwo ase atemete koiba korwa ase Hekalu na koboera omochie. Abanto b’omochie oyio bakaimokia ebirwanero bakaboera Antioko. Omoganda oye bw’esegi okabetererigwa koirana magega ase engencho y’obosoku. Ⅲ Ekero Antioko aigete Ekbatana agatebigwa aya amonyorete Nikanori amo n’abarwani esegi ba Timotheo. Ⅳ Agaichorwa n’endamwamu akaria eira goakana Abayahudi egesiomba ase engencho y’okobugwa kwaye. Erio agateebia omogendia oye bw’egari aminyoke chimbero goika bakore orogendo rwabo. Na ase obwerori bwaye agateeba: “Ekero ngoika aria nigo ngoonchora omochie o Yerusalemu koba chimbeera chi’Abayahudi.” Korende tamanya buna endamwamu ya Nyasae konya yamoikeire Ⅴ Bono Nyasae bw’Abaisraeli akamoa ogoakwa gotari kobweneka gose gotari kororekana. Bono ekero akorire gokwana aya enda egachaka komoroma rioka rioka etari gotiga, Ⅵ eke naki egesusuro kebwenerete ase omonto oyio obeire kagochanda abanto bande ase okobaa emechando y’okwoboyia! Ⅶ Nonya nigo ere tatigete kwerora. Obwerori bwaye bokamenteka. Endamwamu yaye ekabera erio agachaaka kogosereria Abayahudi, agachiika omogendia oye bw’egari aminyoke mono. Ekero Omogendia oria aminyogete mono goetania Antioko agatugutwa korwa egari ime agaaka inse ase eriogi rinene akanyora chingoma chinene kera ase. Ⅷ Obwerori bwaye bokamokora agakagera buna nigo abwate chinguru n’okobua gokora emerindo ye’nyancha komoigwera, boigo na korenga oborito bw’egetunwa ase ekerengo. Korende ase obwango akagwaa inse akaborwa chinguru; aya onsi akaorokia okobua kwa Nyasae ase bonsi. Ⅸ Omobere bw’omonto oyo otamoirogeti Nyasae ogasogwa n’amakonde, na ekero konya atarakwa kare n’obororo obonene, enyama y’omobere oye egachaka kogunda. Obotioku obobe mono bogachaka korwa ase omobere oye goika nonya n’abarwani baye besegi bagakumia mono. Ⅹ Onde taiyo nonya n’oyomo omoigete ange nonya n’okomoira gw’ekonya. Oyio ase chingaki inke igo chia magega okagerete buna nabwate ching’enang’eni chia igoro! Ⅺ Bono obwerori bwaye bogachaka koirana inse, agakwa omoyo. Amaakwa a Nyasae akamokora agekanya. Ⅻ Bono ekero asinyetwe koremereria obotioku bwaye omonyene, agateeba: “Nere buya omonto kwebeka inse ya Nyasae; onde bwensi takagera buna narengaine na Nyasae.” ⅩⅢ Nyasae konya osiekire amaabera aye ase omonto oyo, korende omonto oyo akaria eira ase Nyasae agateeba, ⅩⅣ “omochie oria omochenu oria natagete gotagora na koroisia chimbeera chi’Abaisraeli bono nararirie buna n’omochie omosibore. ⅩⅤ Abayahudi abwo ntaroche koba gento kende, abwo konya narobeirie emebere yabo n’eyabana babo eruterwe ching’iti chi’orosana n’echinyoni bono inche nimbakore babe abamo n’abanto ba Atene. ⅩⅥ Na Hekalu eyio nairete enibo korwa bono niyeroisie na koirania ebikorero biaye ebichenu ebio nairete boigo nimente ebinde ebinge; naende ningakane rigori ri’ekengwanso korwa ase omobuko one. ⅩⅦ Goetania onsi inche omonyene nimbe omoyahudi, na ningende kera ase abanto bare nakobarareria chinguru chia Nyasae.” ⅩⅧ Korende bono ekero obororo bwa Antioko bwagendererete bono ase engencho konya endamwamu ya Nyasae yamoikeire ase ekeene, ere akanacha omoyo oye. Bono akarika riruube rikobwatia ase Abayahudi, ⅩⅨ “Korwa ase omorwoti Antioko, gochia ase Abayahudi, abanto baane abanchwa. Kobatomera inde amaiga y’obwanchani, na kobaganeria obogima obuya, n’okogenderera kwaino. ⅩⅩ Nasemeirie buna inwe n’abana baino mbuya mogendererete. Ogosemeria kwane nigo kore ase Nyasae, ⅩⅪ nainyoire ase omogooko omonene ase amaya aria bwankorerete. Ekero narenge koirana gocha inka korwa Persia nigo nanyoretwe n’oborwaire obonene mono, ase igo bono narorire nga mbuya gokora emeroberio y’obwamate obuya ase abanto bonsi. ⅩⅫ Tindasiria ogosemeria gw’okobwena; ase obomaene ninde n’ogosemeria buna nimbwene. ⅩⅩⅢ Korende naonyoire buna tata ominto nigo arenge gochora omokonyi oye chingaki arenge kogenda chinse chiare. ⅩⅩⅣ Nigo arenge gokora iga erio amang’ana kagokorekana buna etakageiri, gose amang’ana amabe kagocha, abanto baye tibasogwa n’obwoba ekiagera mbamanyete buna niingo otigerwa ekerogo ki’oborwoti. ⅩⅩⅤ Nimanyete buna abarwoti b’echinse chiria chitwetanaine baganyete rituko ri’ogokwa kwane na koganya korora eria agochia gokoreka. Ase igo nachorire Antioko omwana one abe omorwoti magega yane. Chingaki chinyinge nabeire nkomotiga ase amaboko aino na nabeire nkogania moigwane nere ekero narenge kogenda gokora emeremo ase chinse chiare. Ere nkonyora are riruube eri. ⅩⅩⅥ Nigo nkobasorora moinyore amaya aria nabakoreire kera omonto bene boigo n’ense yonsi, mogenderere gokora amaya botambe gocha ase inde boigo nase omwana one. ⅩⅩⅦ Negenire buna ere nabakorere amaya botambe, buna inche nabeire ’nkobakorera botambe.” ⅩⅩⅧ Ase igo bono omoiti oyo oyio orenge gochecheria Nyasae akanyora obororo obonene mono, buna boria arenge kobeka abanto bande, agakwa ogokwa kwogokumia mono aria ase ebitunwa ase ense engeni. ⅩⅩⅨ Filipo oyio orenge oyomo bw’abasani baye akaira omobere bwa Antioko inka; korende ase engencho aoboete omwana bwa Antioko, akagenda goika Misiri ase omorwoti Tolemai Filometori.