Ⅰ Yuda oyio orenge korokwa Makabi amo n’abasani baye bakagenda korwa omochie gochia oyonde bobisi goika bagasangereria omoganda bw’abarwani esegi abwo babwatete mono edini y’ekeyahudi. Ⅱ Bagasaba Omonene Nyasae akonye abanto baye abwo bare gochandwa n’ebisaku bionsi; boigo arorere Hekalu yaye amaabera ayio konya yachecherigwe n’abanto b’ebisaku. Ⅲ Boigo naende arorere omochie o Yerusalemu amaabera oyio ore gosarigwa oronge ange gotagorwa. Bakamoboria aigwe eriogi ri’amanyinga ayio aiteirwe akomorera. Ⅳ Boigo bakabori’Omonene aorokie endamwamu yaye nagoakana egesiomba ase baria bonsi baitete abanto baye nakongeta abana abake batari n’okomocha, na gokwana mamincha y’erieta riaye. Ⅴ Ekero Yuda Makabi akorete koroberia omoganda oye bw’abarwani esegi, abanto b’ebisaku tibanyarete koamererania nere ekiagera endamwamu y’Omonene ase Abaisraeli nigo yaonchogete ekaba amaabera. Ⅵ Yuda akaboera emechie n’ebichie nakobisamba n’omorero. Agaseria ababisa na akaira chinsemo chinene chi’engencho mono. Ⅶ Chinsa chia botuko nigo chiare komobera buya mono ase okoboera okwo. Kera ase abanto nigo bare gokwana igoro y’obobui bwaye. Ⅷ Ekero Filipo omogabana amanyete buna Yuda nigo agendererete konyora obobui naende buna nigo agendererete gosuka motwe na koba omobui, akarika riruube gochia ase Tolemai oyio orenge omoteneneri omonene o Siria enene na Foiniki erio ache komokonya. Ⅸ Ase obwango mono Tolemai agachora Nikanori omwana o Patroklo, oyomo bw’abasani b’omorwoti, akamotoma amo nabarwani esegi chilifu 20,000 korwa ase chinse ao ao bagende gosiria egesaku ki’Abayuda. Tolemai boigo agachora Gorgia omochenerali oyio obwate obomanyi obonge ase amang’ana y’esegi agende amo nabarabwo. Ⅹ Omorwoti Antioko nabwate chikilo 68,000 chi’efeta chi’Abarumi; ase igo Nikanori akaroberia goakana efeta eyio ase okoonia Abayahudi abasibwa b’esegi buna abasomba. Ⅺ Ase obwango mono agatoma amang’ana gochia ase emechie yarenge ange n’enyancha buna nkoonia are Abayahudi ase rigori rike mono: abasomba 60 ase etalanta eyemo. Korende ere tamanya buna endamwamu ya Nyasae omonguru nigo yamoganyete. Ⅻ Yuda akanyora amang’ana buna Nikanori aroberetie, erio agateebia abamwabo buna abarwani esegi ba Nikanori babereire ange na Yudea, ⅩⅢ gati yabo mbarengeo aboba abwo babwate chitang’utang’u ase emeroberio ya Nyasae, ekero baigwete amang’ana ayio bagatama chimbero. ⅩⅣ Korende abande bakaonia ebinto ebitigari biabo bionsi na gosaba Omonene abarore abwo Nikanori konya aonirie gochia obosomba nonya konya esegi terachaka. ⅩⅤ Bagasaba Nyasae abatorie; na onye takobatoria ase engencho yabarabwo abanyene, rirorio abatorie ase engencho y’okobwatana akorete n’echisokoro chiabo, na ase engencho nere obarangeretie koba abanto baye na ase engencho y’erieta riaye richenu. ⅩⅥ Bono Makabi agasangereria abarwani esegi baye amo bagaika 6,000 akababeka chinguru akabateebia tibairoka gose gotama ase obwoba bw’okorora abarwani esegi abange korwa ase ebisaku ao ao abwo bakobachera kobarwani, akabateebia barwane esegi n’oboremu. ⅩⅦ Bono bebire obobe obwo bakorire ase Hekalu, na emechando eyio baretire ase omochie o Yerusalemu na buna basiretie chingencho chi’Abayahudi. ⅩⅧ Ere akabateebia barabwo nigo begenete ebirwanero biabo, korende intwe nigo tomosemeretie Nyasae omonguru, oyio oranyare gosiria tari aba boka bagotochanda korende nonya nense yonsi, ase okonyegeria omotwe oye gwoka. ⅩⅨ Yuda akagenderera kobainyoria buna Nyasae akonyete chisokoro chiabo: chingaki chia Senakeribu ababisa 185,000 bagasirigwa; ⅩⅩ na ekero barenge Babuloni, Abayahudi 8,000 bagakonya Abamakedonia 4,000, bakabua Abagalatia 120,000 na kobabua, aya onsi nigo anyarekanete goetera ase obobui bwa Nyasae. ⅩⅪ Amang’ana a Yuda akabeka abanto baye chinguru mono na barabwo bakerwa gokwa ase engencho y’edini yabo n’ense yabo. Erio akabaga abarwani esegi baye ase ebiombe bine ⅩⅫ na kera ekeombe nigo kiabwate abanto 1,500. Yuda omonyene amo n’abamura bamwabo, Simioni, Yosefu, na Yonathani, nabwo barenge abateneneri n’ebiombe ebi, kera oyomo n’ekiombe kiaye. ⅩⅩⅢ Goetania aya onsi, agachora Eleazari asome ase eriogi ensemo y’amariko amachenu, erio akaa abanto baye amang’ana aya akobwatia y’obobui: “Nyasae natokonye.” Bono ere agatang’ana ekeombe ki’eritangani agachaaka esegi na Nikanori. ⅩⅩⅣ Nyasae omonguru akabarwanesia esegi, goika bagaita ababisa ange 9,000 boigo bagatiga abange n’echingoma, baria batigarete bakabetererigwa gotama. ⅩⅩⅤ Bakaura abanto abwo konya bachire kobagora chitaabu chiabo na goseria ababisa babo ase obware goika bakanacha ekiina koirana, ⅩⅩⅥ ase engencho esabato konya yabereire ange. ⅩⅩⅦ Ekero bairanete bagasangereria ebirwanero n’enibo korwa ase ababisa abwo bakwete, erio bagasasiima Nyasae na kogokera esabato n’obobui obwo Nyasae abaete, ekiagera ere abarorerete amaabera. ⅩⅩⅧ Ekero esabato yaerete bakabaga ebinto ebio baurete ababisa babo. Ritangani bakaa abanto abwo baagetwe chingoma, ababoraka n’echintakana; ensemo eria yatigarete bakabagana barabwo abanyene. ⅩⅩⅨ Magega yaye bagasangererekana gosaba Omonene omonyamaabera, abwatane nabarabwo ekiagera barabwo n’abanto baye. ⅩⅩⅩ Magega yaye Abayahudi bakarwana esegi amo na Timotheo na Bakide, Abayahudi bagaita abanto goetania 20,000. Bakaira orogongo oronene boigo n’ebinto ebinge mono, ebio bebagerete bakaa kera omonto bireng’aine, ababoraka, chintakana, abagaaka, boigo na baria banyorete chingoma. ⅩⅩⅪ Bagasangereria ebirwanero bi’esegi ase enchera endonge bakabiira bakabigacha ase engencho mono, korende abanto baria bande babwatetwe bare moyo bakairwa Yerusalemu. ⅩⅩⅫ Bagaita omoteneneri omonene bw’abarwani esegi ba Timotheo oyio orenge omonto omobe mono oyio orenge gochanda Abayahudi. ⅩⅩⅩⅢ Ekero bagendererete gochengera obobui bwabo ase omochie bw’echisokoro chiabo, bakabasamba omorero goika bagakwa abanto baria konya basambire ebisieri bi’Hekalu. Gati ya baria baitetwe Kalisthene amo n’abande abwo bebisete ase ekegutu ekemo; aba nigo banyorete engeria eria baganeirie ase obobe bwabo. ⅩⅩⅩⅣ Nikanori omosaria oria oyio orentete abakori ebiasara 1,000 erio kogora Abayahudi, ⅩⅩⅩⅤ akabugwa n’ababisa baye baria achayete mono goetera ase chinguru chia Omonene. Akarusia eyanga yaye n’ebirwanero esegi akabituguta erio agatama ere bweka buna omosomba ogotama goika agaika Antiokia. Eki anyarete gokora n’ogosiria abarwani b’esegi baye bonsi. ⅩⅩⅩⅥ Bono omonto oyo konya otemire goakana Abaroma chifeta chiabo ase okoonia abanto ba Yerusalemu, akaorokigwa maiso marore buna Abayahudi mbabwate oyo okobarenda na ase igo barabwo tibakobugwa rinde ekiagera baigwerete amachiiko ayio Nyasae abaete.