Ⅰ Rituko erimo omongina oyomo omoyahudi akabwatwa n’abana baye batano na babere. Omorwoti agachiika baakwe emetarichi naende babetererigwe koria enyama y’embeche. Ⅱ Erio oyomo bw’abamura baria agateeba: inki morigeti konyora ase aya onsi mogokora? Intwe nigo tore ange gokwa kobua gotiga chingencho chi’echisokoro chiaito. Ⅲ Amang’ana ayio akagechia omorwoti mono goika agachiika chisuguria chibekwe omorero omotindi; Ⅳ Ekero chisuguria chiria chiasambire mono, omorwoti agachiika omomura oria okwanete ribaga ri’abande anachwe oromeme na gosambwa risankwa ri’omotwe naende anachwe amaboko na amagoro ekero ng’ina n’abamura bande bamwabo batengerete. Ⅴ Omomura oria akanachwa nachwa agatigara riengwe ri’echinyama rikweyana. Agwo omorwoti akarwa ogochika omomura oria airwe abekwe ime y’esuguria eria yarenge gosamba mono. Ekero erioki riaruete ime y’esuguria eria, bamura babwabo na ng’ina bakabekana chinguru bagatebania bakwe ase oboremu, bagoteeba: Ⅵ Omonene naroche aye onsi na namanyete ogochandeka gwaito. Musa nigo abagete amang’ana aya maiso marore ekero ariigete ogoteera gokuurera baria batigire Omonene. Agateeba, “Omonene Nyasae Nabarorere amaabera baria bakomokorera.” Ⅶ Magega kobaitire omomura oria bw’eritang’ani, abasikari baria bakagoka erio bagachaaka komosamba etukia omomura oria o kabere na komosabora risankwa ri’omotwe omomura oria o kabere. Erio bakamoboria: “Inee bono aye norie enyama eye y’embeche gose nigo otagete tokonache amaboko n’amagoro?” Ⅷ Omomura oria akairaneria ase omonwa oye agateeba “Inche tinkoria enyama eyio nonya ngake!” Erio abasikari baria bakamochanda buna bachandete oria bw’eritang’ani, Ⅸ Korende oyo ere ekero abeire ange gokwa akarera bono gochia ase omorwoti ogoteeba: “Omoiti oyo aye nabo okonyara gotoita bono korende omorwoti bw’ense natobokie korwa ase abakuure na gotoaa obogima bwa kare na kare ase engencho intwe twaigwereire amachiiko aye.” Ⅹ Magega y’oyio abasikari baria bagachaaka kwegokia ase okomoita omomura ogatato. Agachiikwa asokie oromeme isiko, erio ere akarambora amaboko aye n’omoremu, Ⅺ agakwana ase oboremu Nyasae nere ongete amaboko aya, korende amachiiko a Nyasae nigo are ay’engencho goetania amaboko ane, na nimanyete buna Nyasae nangiranerie amaboko aya ane. Ⅻ Omorwoti na baria bonsi barenge nere bagaichana mono ase oboremu bw’omomura oria oyio orenge ange gochandwa. ⅩⅢ Magega gakure Abasikari baria bagachanda omomura o kane ase enchera eria eria, ⅩⅣ korende amang’ana aye y’omoerio nigo arenge iga “Nigo inde n’omogooko gokwa ase amaboko ao, ase engencho ntore n’ekeene buna Nyasae natobokie korwa ase abakuure. Korende aye Antioko, tokobokigwa!” ⅩⅤ Abasikari bakabwata omomura o gatano bagachaaka komochanda. ⅩⅥ Omomura oria akarigereria omorwoti ase amaiso akamoteebia nore n’okobua kw’ogotokorera kende gionsi keria oranche, korende nonya naye nokwe. Korende tokagera buna Nyasae otigire abanto baye. ⅩⅦ Ganya orore Nyasae nagochande aye amo n’abanto bao ase chinguru chiaye. ⅩⅧ Abasikari baria bakabwata omomura o gatano na rimo, na magega atarakwa agateeba: “Tongaineka. Intwe nigo togochandwa ase engencho twakorire ebibe ase Nyasae oito. Nakio gekogera amabe aya onsi agotonyora. ⅩⅨ Korende tokagera buna aye tokonyora egesusuro ase engencho y’okoamererania na Nyasae.” ⅩⅩ Ngina nigo abaichanetie mono goetania abamura baye bonsi, na nigo aganeirie koinyorwa ase enchera yabeene. Nonya origereretie abamura baye batano nababere bagokwa rituko erimo, ere agatwara oboremu ase engencho nigo amosemeretie Omonene. ⅩⅪ Omong’ina oyo nigo arenge omoremu buna omosacha, akabeeka abana baye chinguru na kobaremia ase omonwa obo, ⅩⅫ akabateebia “Timanyeti buna gwachagete koba moyo ase enda yane. Tari inche nakoete obomoyo na kobwatania ebiimo bi’omobere oo. ⅩⅩⅢ Nyasae nere okorete ayio; Nyasae oyio otongete ense na bionsi biria bire oo. Nigo are omonge bw’amaabera ere nakoiranerie obogima bwao, ase engencho nigo bwanchete amachiiko aye mono goetenia buna bweanchete aye omonyene.” ⅩⅩⅣ Antioko namanyete buna omong’ina oria nere are gochecheria ase igo agatema mono gosorora omwana oye mw’omoerio oyio orenge moyo atigane n’echingencho chi’echisokoro chiaye. Akamoriera eira na gotiana buna namoe enibo enyinge na komobeka amenye buya na komoa ekerogo ekenene na komokora abe omosani oye. ⅩⅩⅤ Korende omomura oria taigwete mangana aria. Erio Antioko agatema gokwana na ng’ina erio akwane n’omwana oye erio gotoria obogima bwaye. ⅩⅩⅥ Magega y’okoebererigwa mono omong’ina oria agancha. ⅩⅩⅦ Omong’ina oria akabwaterera omwana oye agakwana ase omonwa oye agateeba: “Omwana one indorere amaabera. Inyora buna nigo kwabete inda yane emetienyi kianda, naende nakorerire ase emiaka etato. Nakorendire nagokoa kera egento keria oganetie goika rituko riarero. ⅩⅩⅧ Ase igo omwana one nagosoroire origererie igoro n’ense. Rigereria buya mono kera egento okorora omanye buna bionsi ebio nigo biatongetwe na Nyasae boigo agatonga Mwanyabaanto. ⅩⅩⅨ Tobaisa koiroka omoiti oyo. Ancha gokwa ase ogwancha kwao na bworokie buna aye n’omoremu buna abamura bamino, erio ase amaabera a Nyasae nkonyore aye amo nabarabwo rituko ri’okobokigwa.” ⅩⅩⅩ Magega ng’ina atarakora gokwana ayio, omomura oria agateeba: omorwoti Antioko, inki oganyete? Nangire tikoigwera amachiiko ao. Amachiiko nkoigwera naria oka are ase amachiiko ayio Musa aete chisokoro chiaito. ⅩⅩⅪ Kwabeire gokorengereria obobe bwonsi obwo kwabeire kogokorera abanto baminto, korende tokonyara gwetanga korwa ase endamwamu ya Nyasae. ⅩⅩⅫ Nekeene nigo togochandeka ase engencho y’ebibe biaito. Nyasae oito ore igoro ogechigwe naitwe, nigo agendererete gotosusura erio totware amasikani. Korende ayio nigo arabe ayekero egeke, ase engencho intwe n’abanto baye ere natwabere. ⅩⅩⅩⅢ Nyasae oito ore moyo obeigwe naitwe, na nigo agendererete gotochunchuga erio tobe n’amasikani. Korende ayio nayekero egeke, ase engencho intwe n’abanto baye ere natwabere. ⅩⅩⅩⅣ Korende aye n’omonto omobe goetania ebitongwa bionsi. Ase igo aye tibwengaina buna nobe omonene ekero ogendererete gochanda abanto ba Nyasae ⅩⅩⅩⅤ Tokonyara gwetanga korwa ase endamwamu ya Nyasae omonguru oyio okorora onsi. ⅩⅩⅩⅥ Abamura baminto nigo bachandeka ekero egeke ase engencho y’obwegenwa bwaito ase okobwatana kwa Nyasae, korende bono barabwo banyorire obogima bwa kare na kare. Korende aye nogambigwe na Nyasae buna oganeirie ase engencho y’obwerorio bwao. ⅩⅩⅩⅦ Bono korwa inde omobere one ase engencho y’amachiiko y’echisokoro chiaito, buna abamura baminto bakwete. Korende bono nigo ngosaba Nyasae arorere abanto baye amaabera, korende aye akoe egesusuro egetindi goika oancherane buna Nyasae bweka nere Nyasae. ⅩⅩⅩⅧ Nigo ngosaba buna inche n’abamura baminto tobe ab’omoerio konyora egesusuro kia Nyasae ekio ase ekeene kianyorire ense yaito yonsi. ⅩⅩⅩⅨ Amang’ana ayio y’ogokumia akagechia omorwoti Antioko mono goika agachiika omomura oria achandwe mono goetania abamwabo. ⅩⅬ Ase igo omomura oria agakwa kare nogosemeria okonene ase Nyasae. ⅩⅬⅠ Magega yaye ng’ina nere agaitwa. ⅩⅬⅡ Narorire nga narure omogano oisaine igoro buna Abayahudi bachandetwe na kobetererigwa koria chinyama chianda chi’eching’ondi chi’ekeng’wanso.