Ⅰ Nyama y’amatuko make, omorwoti agatoma omogaka oyomo omwathene kobabetereria Abayahudi batige edini yabo, emegiro yabo boigo batige kobwatia amachiiko a Nyasae; Ⅱ boigo na gosaria Hekalu ya Yerusalemu na koyekora koba ey’Olypian Zeu, n’eria ya Gerisimu ayekore koba aya Zeus nyasae bw’abaeti buna abanto abwo bamenyete ase agwo bare gokora Ⅲ Obosaria obwo nigo bware obobe mono. Ⅳ Abanto b’ebisaku bagasoa Hekalu na gokora obobe bwa kera engencho, nonya n’abatayayi bagasoa Ekearu, ebinto bitachenegeti bikaretwa ase Hekalu. Ⅴ Ebinto bitachenegeti bigaichorigwa ase egesasiimero. Ⅵ Nigo yabete akong’u korenda chisabato boigo n’amatuko ande y’emeyega ende, gose gokwana maiso marore buna aye n’omoyahudi. Ⅶ Kera omotienyi ekero bare kogokera rituko ri’okoiborwa kw’omorwoti, Abayahudi nigo bare kobetererigwa koria chinyama chianda chi’ekeng’wanso. Ekero rituko rinene ria Dionisio enyasae eria y’edivai riare goika, nigo bare kobetererigwa kobeka amato y’emete ase emetwe yabo na gotara ase chinchera. Ⅷ Ase obosemia bwa Tolemai, emechie y’abagiriki abwo bare abaamate babo bagatebigwa babetereri Abayahudi koria chinyama chi’ekeng’wanso; Ⅸ na onde bwensi otarenge konyara komenya korengana n’echingencho chi’abagiriki, nigo are goitwa. Tiyabete akong’u komanya buna chingaki chinkong’u ngocha chiire. Ⅹ Abakungu babere bakabwatwa ase engencho barogetie abana babo. Abakungu abwo bagatarigwa omochie bwonsi goeta na abana babo nigo bagugunaine ase chimbeere; na omoerio bakarutwa inse korwa ase chinyasi chi’omochie. Ⅺ Ring’ana rinde Filipo agatebigwa nga Abayahudi gete nigo baumeranete ase gete bobisi erio korenda esabato bobisi, erio Filipo akababoera na kobasamba bonsi amo, korende barabwo tibatemete gwetanga ase engencho basigete esabato mono. Ⅻ Nigo nkobasorora timokwa omoyo ekero mogosoma igoro y’amang’ana y’ogokumia ayio akoregete, korende momanye nga egesusuro eke nigo giancheretwe tari ase ogosiria, korende korongeyia abanto ba Omonene. ⅩⅢ Ekero okoa omonto egesusuro ekio n’ekemanyererio ki’amaabera ribaga agotigwa engaki etambe ataeri gesusuro. ⅩⅣ Omonene Nyasae tari gotokorera buna agokorera ebisaku binde. Abwo bande nigo akobaa egesusuro magega yokoganya ase oboremereria goika ekero basoire ebibe ime. ⅩⅤ Korende intwe nigo agotoaa egesusuro magega totarakora ebibe ebinge mono. ⅩⅥ Ase igo Nyasae nigo agotororera amaabera intwe abanto baye. Neisa koba otoeire egesusuro, ere tagototiga. ⅩⅦ Nigo nabateebia aya ase engencho yokobainyoria. Mono tiga togenderere n’omogano oito. ⅩⅧ Narengeo omworokia oyomo bw’amachiiko orenge korokwa Eleazari, omogaka bw’amasikani mono. Akabetererigwa koria enyama y’embeche.* ⅩⅨ Korende Eleazari akarora nga mbuya gokwa n’amasikani kobua komenya n’omogima botachenegeti. Bono ere agatuguta enyama eria korwa monwa oye erio akagenda ase abanto bare gochanderwa, ⅩⅩ akoorokia nga abanto babwenerete koba abaremu na kwanga koria chindagera chitachenegeti, neisa koba n’obogima bwabo bagosiria. ⅩⅪ Abateneneri baria b’ekengwanso keria getachenegeti abwo barenge abasani b’Eleazari bakamoira ensemo bakamoteebia arete enyama yaye, ere endonge korwegwa ekengwanso, erio ekore buna n’enyama eria y’ekengwanso eria omorwoti achigete akoria. ⅩⅫ Ase ogokora igo ere tarenge goitwa, nigo arenge gokorerwa amaya ase engencho y’obosani bwabo bwa kare. ⅩⅩⅢ Korende Eleazari agakora ogochora kw’amasikani y’emiaka yaye. Korwa obwana bwaye ere nigo abwatete amachiiko amachenu a Nyasae. Ase igo akabairaneria: “Inwe ingite bono iga. ⅩⅩⅣ Omonto omonene buna inche n’obosoku kongainereria. Abanto abake abange tibacha gokaga buna nigo nakanire okwegena kwane magega y’ogoika emiaka 90. ⅩⅩⅤ Ngise gwekora buna nigo nkoria enyama eye, erio ngenderere komenya ake igo, nigo nderetere obosooku obonene n’abanto abake abange nigo barasirigwe. ⅩⅩⅥ Neisa koba netangire korwa ogokwa oko kwa bono, tingwetanga korwa ase okoboko kwa Nyasae gw’echinguru neisa koba kinde moyo gose nakuure. ⅩⅩⅦ Ngise gokwa bono ase oboremu, nigo ndaorokie nga nimbwenerete obogaka bwane. ⅩⅩⅧ Nigo boigo erabe omogwekano omuya gochia ase abanto abake na koborokia buna bagwenerete kwerwa gokwa ase engencho y’amachiiko aito amachenu.” Magega gakorire gokwana aya akagenda gochandwa. ⅩⅩⅨ Abanto baria baria konya bakorire obosani nere ase egeka egeke bakamoochokera ekiagera bakagete buna ere nigo agokwana buna ebarimo. ⅩⅩⅩ Ekero bamoitire ange n’ogokwa, Eleazari agaaka eriogi agateeba: Omonene namanyete onsi. Ere namanyete buna nabo nare gocha gwetanga korwa ase emechando eye nonya n’ogokwa. Boigo namanyete buna naremereirie aya onsi ase omogooko ase engencho imoirogete ere. ⅩⅩⅪ Ase igo Eliazari agakwa. Korende ogokwa kwaye kw’oboremu gokaba gokainyorwa buna egento ki’engencho ase ense yonsi.