Ⅰ Ekaba ase chingaki echio Antioko IV akaboera Misiri eriakabere. Ⅱ Ase engaki y’amatuko ange emerongo ene (40), abanto ba Yerusalemu kera ase bakarora amaroro, ase amaroro aya bakarora abarini chibarasi babegete chianga chiare komekameka bakorina n’echinguru gochia igoro, baimogeti amatimo n’emioro igoro. Ⅲ Bakeroberia ase omoroberio bare ange koboera. Chinguba chigakanigwa n’amatimo akarutwa buna embura y’embeo, n’echinsara chigaichora kera ase. Chingobo chia kera engencho nigo chiare komekameka buna risase. Ⅳ Kera oyomo ase omochie agasaba na kwegena buna amaroro ayio arete amaya. Ⅴ Amang’ana y’oborimo agaika kera ase buna Antioko okuure. Erio Yasoni agasangereria abanto goetania 1,000 akaboera Yerusalemu mobasokano. Bagaseria abanto abwo baroberie ase chinyasi chi’omochie, erio bakaboera Yerusalemu na koyoira. Menelao agatama gochia ase Hekalu akebisa; Ⅵ ekero Yasoni n’abanto baye bagendererete goita Abayahudi bamwabo batari n’amaabera. Yasoni tamanyete buna kobua abanto bamwabo ase esegi tikiarenge gento kiya. Agekora buna nigo abuire ababisa baye na tari banto bamwabo. Ⅶ Nonya nigo Yasoni tanyarete koira obogambi. Omoerio oye akabetererigwa agatama gochia ase ense y’Abamoni, na omoerio oye ogosaria kwaye gokamoretera obosooku obonene Ⅷ agakwa n’obosoku obonene. Areta oyio orenge omorwoti bw’Abaarabu, akabwata Yasoni akamosiekera echera ekiagera nigo arochigwe buna omosaria, agachaywa ase engencho arwete ense yaye, nigo arenge korigigwa na kera omonto eyio ekamobetereria gotama korwa ense gochia eyende, goika agatama gochia Misiri kwebisa aroro; Ⅸ na omoerio oye agatama gochia Lakedemonia okagerete buna nancherwe kobera aroro ase engencho y’obwamate bwarenge gati yabo n’Abayahudi. Omoerio oye omonto oyio obetereretie abanto abange bagatama korwa ase chinse chiabo agakwera ense engao ayio ase atamete gochia. Ⅹ Yasoni konya oitire abanto abange na gotiga emebere yabo etatindekiri, bono ere agakwa atari na monto onde okomorera; na tatindekwa ase chisokoro chiaye. Ⅺ Ekero amang’ana akoregete Yerusalemu aikerete omorwoti Antioko, ere agakagera buna ense yonsi ya Yudea yasarekire. Bono ere akarwa Misiri ore n’obororo obonene agachaaka korwania Abanto ba Yerusalemu; Ⅻ agachiika abanto baye baite kera omonto bare koumerana nchera gose onde bwensi bw’ebisete. ⅩⅢ Bagaita abanto bonsi, abasacha ase abakungu, abamura ase abaiseke; bagaita nonya n’abana abake. ⅩⅣ Ase egeka ki’amatuko atato, Yerusalemu egasiria abanto 80,000: 40,000 nigo baitetwe ase esegi, n’abande banga buna abwo bakaonigwa gochia obosomba. ⅩⅤ Gotaisaneka naya onsi, Antioko agataka gosoa ase Hekalu enchenu goetania chionsi ense engima, okoragwa na Menelao, oyio orenge omosoeri bw’dini yaye n’abanto baye. ⅩⅥ Antioko akaimokia ebinto ebichenu b’Hekalu n’amakobo aye atachenegeti, boigo akaira ebinto binde ebio abarwoti bande barwete gochia ase Hekalu buna ebiegwa erio komenta omonene n’amasikani y’Hekalu. ⅩⅦ Antioko agaichorwa n’omogoko ase enkoro yaye ase engencho y’obobui bwaye tamanya buna Omonene konya otigire Hekalu yaye enchenu esarigwe ase engencho y’ebibe bi’abaanto ba Yerusalemu. ⅩⅧ Onye konya abanto ba Yerusalemu batakorire abibe ebinge, anga Antioko naetwe egesusuro, tarenge gwancherwa gokora obosaria bonga buna obwo. Nigo arenge gocha koegwa egesusuro buna Heriodoro, oria otometwe n’omorwoti Seleuko korora ekegancha gi’Hekalu. ⅩⅨ Korende Omonene tachorete abanto baye ase engencho y’Hekalu korende nigo achorete Hekalu yaye ase engencho y’abanto baye. ⅩⅩ Ase igo Hekalu nigo yasoete ase obobe bw’ense na magega yaye egasanga ase okogenderera kwabo. Nyasae omonyanguru agatiga Hekalu yaye ase engencho y’endamwamu yaye, korende ekero abanto bairanerete Nyasae Hekalu ekagachwa naende. ⅩⅪ Antioko akaira chikiro 62,000 chi’echitaabu korwa ase Hekalu, erio ase obwango akagenda bwoye. Nigo eimokereretie igoro goika agakagera buna nabo akonyara gokora chimeri chitare ense enyomo n’abarwani baye b’esegi batare amache ime goika engegu. ⅩⅫ Agachora Abagabana abwo bachandete abanto. Ase omochie o Yerusalemu agachora Filipo omonto o Furugia oyio orenge omobe mono goetania Antioko omonyene. ⅩⅩⅢ Ase ense y’ebitunwa bia Gerisimu akabeka Androniko. Goetania aba narengeo oyonde ore korokwa Menelao oyio okorerete Abayahudi bamwabo bobe mono goetania buna abagabana bande bakorete. Antioko nigo angete Abayahudi mono goetania; ⅩⅩⅣ goika akaira omoganda bw’abarwani esegi chilifu 22,000 korwa Misiri gochia Yerusalemu abwo bare goakanwa, aba nigo barenge inse y’oboteneneri bw’omonto orenge korokwa Apolonio. Oyo nigo achigete abarwani baye b’esegi baite abanto bonsi na koira abakungu n’abana obosomba. ⅩⅩⅤ Apolonio agaika Yerusalemu akangainereria buna n’omorembe akorigia, rituko ri’Esabato ekero Abayahudi bonsi batumogete, agachiika abarwani esegi baye baimokie ebirwanero biabo bebange isiko y’omochie. ⅩⅩⅥ Erio akabachiika baite kera omonto orasoke gocha kobarora abarwani abwo b’esegi bagasoa omochie ime ase obwango mono bagaita abanto abange mono. ⅩⅩⅦ Korende Yuda, Makabi na bande ange kianda iga bagatama gochia ebitunwa igoro agwo ase bamenyete buna ching’iti chi’orosana agwo ase bare koria emete y’orosana.