Ⅰ Korende Simioni oyio okwanetwe agwo ritangani buna nere otebetie Apolonio igoro yenibo na akareta emechando ase ense yonsi akangainereria igoro y’Onia Omokuani omonene kagoteeba nga nere oreterete Heliodoro emechando eyio yamonyorete. Ⅱ Simioni akaroberia gosoera Onia buna nigo are mamincha y’oborwoti. Onia nigo arenge omonto omwororo na nigo arendete Hekalu na goetania onsi nigo aganetie kera oyomo arende amachiiko onsi. Ⅲ Endamwamu ya Simioni ekagenderera kobera mono goikera abanto baye bagaita abanto abange. Ⅳ Onia akamanya nga mangana tamobereti maya, na buna Apolonio omwana o Menestheo, oyio orenge omogabana omonene o Siria amo na Foiniki arenge kobeka Simioni chinguru ase kera obobe arenge gokora. Ⅴ Bono ere agachiera omorwoti korende tari ase engencho yogosoera abamwabo, korende ase engencho y’Abayahudi bonsi, ase oboamate bwabo bw’enka na obwaisiko. Ⅵ Nigo amanyete nga onye omorwoti takobwaterana nere morembe tore konyorekana boigo na Simioni nigo arenge kogenderera n’oboriri bwaye. Ⅶ Magega k’omorwoti Seleuko akure Antioko oyio omanyekanete buna Epifane akaba omorwoti, Yasoni momura omwabo Onia akenyorera obokuani obonene ase enchera etabwenereti. Ⅷ Akagenda korora omorwoti akamoirera chitaabu chikiro 12,000 na akaria eira nga namente chikiro chinde 2,700 agwo magega. Ⅸ Kero kende Yasoni nigo aete omorwoti chitaabu chiria erio agachee egetii ase abasae bakwegere gokora chigosorio, na echinde ase engencho yokorika abanto ba Yerusalemu koba abantiokia. Ⅹ Ekero omorwoti aikeranetie ayio na Yasoni akaba Omokuani omonene, ere agakora abanto ba Yerusalemu bagatiga chingencho chi’okomenya kwabo bagachaaka komenya buna Abagiriki. Ⅺ Agasiria chinchera chiria chi’ogwanchereria ase Abayahudi okwo baetwe na Yohana ise Eupolemo oyio magega yaye ochiete gokora okobwatana kw’obosani n’Abarumi. Bono Yasoni agasiria chingencho chi’okomenya gwaito buna Abayahudi akareta chingencho chinyia chi’okomenya echio chiarenge mamincha y’amachiiko aito. Ⅻ Yasoni akaagacha egetii ki’echigosori ase omogooko mono ange n’egetunwa gi’Hekalu erio agateebia abana baito abasae begere chingencho chi’ekegiriki. ⅩⅢ Kobwatekana n’obobe obonge bwa Jasoni Omokuani omonene oyio orenge omorianania na otamosigete Nyasae, okogania gw’okomenya buna Abagiriki na kwegera chingencho chiabo gokaba okonene, ⅩⅣ goikera nonya n’abakuani tibatwara monguso ekero bakorwa ebingwanso. Bagatiga ase achenu naende bagatiga korwa ebingwanso; ekero bare koigwa esirimbi yogochaka chigosorio, nigo bare gosoa egetii gochaka chigosorio. ⅩⅤ Tibaroche kende gionsi koba eki’engencho ekio chisokoro chiabo chiairete koba ekiengencho, nigo rioka barengereretie chingencho chi’ekegiriki. ⅩⅥ Ase engencho yayio onsi, bakanyora emechando emenene, abanto aba abwo bare kobwatia chinchera chiabo echio bakagerete buna n’echindonge bakabaonchokera bakaba ababisa babo bagachaaka kobachanda. ⅩⅦ Tikeri gento kiya gotiga kobwatia amachiiko a Nyasae buna togochia korora gochia motwe. ⅩⅧ Rituko erimo ekero omorwoti are kogokera chigosorio ase omochie o Turo echio chiare koba magega y’emiaka etano, ⅩⅨ omoriri oyio Yasoni agatoma abanto korwa Yerusalemu gochia Tirza abwo barenge abantiokia baire chifeta chikiro 10,000 ase engencho yokongwansera enyasae eria Herkule. Korende abanto abwo tibarora nga buna chifeta echio n’echinyinge ase ogokorera ekengwanso; ⅩⅩ ase igo bagachira bakaroiseria chimeri chi’echisegi. ⅩⅪ Ekero Apolonio mosinto o Menestheo atometwe Misiri angaki omorwoti Filometori arenge kogokera ogosoa kwaye obogambi, Antioko akanyora amang’ana buna Filemetori nigo arenge mamincha yaye, Antioko akaba n’obwoba igoro y’okogamba kwaye, akarwa agwo akagenda Yopa, akamanya korwa Yopa gocha Yerusalemu. ⅩⅫ Ekero aigete akaariganigwa n’abanto abange barenge n’omogooko mono bagoaka eriogi bare n’echitochi. Erio Antioko ere akaraa omoganda oye bw’esegi gochia Foiniki. ⅩⅩⅢ Magega y’emiaka etato, Yasoni agatoma Menelao momura omwabo Simioni oyio okwanire korwa igoro aa, airere omorwoti chitaabu erio aikeranie amang’ana gete y’engencho. ⅩⅩⅣ Korende ekero Menelao atenenete ase obosio bw’omorwoti, akagokia omorwoti mono ekiagera nigo arwete chitaabu chikiro 10,000 goetania chiria Yasoni arwete erio ere achorwe koba Omokuani omonene. ⅩⅩⅤ Ase igo Menelao akairana gochia Yerusalemu ore n’amakaratasi korwa ase omorwoti ayio akomwanchera koba Omokuani omonene, korende ere tarenge obwenerete koba Omokuani omonene ekiagera nigo abwate enkoro ekobera bwango na nigo arenge omotindi mono buna enyang’au. ⅩⅩⅥ Bono Yasoni oyio ourete momura omwabo ekerogo kw’obokuani ase enchera embe nere akaurwa ase enchera embe erio ekamobetereria agatama gochia ase ense ya Amoni. ⅩⅩⅦ Menelao akagenderera koba Omokuani omonene korende akaba atari goakana chitaabu chiria arierete omorwoti eira buna nabe gakomoa. ⅩⅩⅧ Korende Sostrato oyio orenge omoteneneri omonene bw’abarwani esegi akaba gakona koinyoria Menelao igoro y’echitaabu chiria ekiagera nere oganeirie gochisangereria, goikera bonsi babere bakarangerigwa gocha ase omorwoti ase engencho y’ering’ana eri. ⅩⅩⅨ Menelao agachora momura omwabo ore korokwa Lisimako koba omokonyi oye na Sostrato agachora Krate koba omoteneneri omonene bw’abarwani esegi ba Kuporo. ⅩⅩⅩ Ase chingaki echio, amang’ana agakoreka amabe ase omochie o Tarso noria o Malo eyio konya omorwoti aeire Antioki omokungu oye o sere. ⅩⅩⅪ Ase igo omorwoti akaimoka bwango akagenda Kilikia koreta omorembe agatiga Androniko oyio orenge oyomo bwa’abateneneri baye koba omokonyi oye. ⅩⅩⅫ Menelao akanyora ribaga eri erio akaa Androniko ensemo y’ebinto bi’etaabu ebio arusetie ase Hekalu ya Yerusalemu; ebio konya aoneirie omochie o Turo n’emechie ende eyio yasinyaine na Yerusalemu. ⅩⅩⅩⅢ Onia ekero aigwete aya akagenda akaerokia ase Hekalu eyemo agwo Dafne, ange n’omochie bw’Antiokia. Agwo agachaaka komomochia Menelao maiso marore. ⅩⅩⅩⅣ Menalao akaebereria Androniko bobisi akamoteebia aite Onia. Androniko agachiera Onia akamwebereria akamokora koba omosani oye na akamoriera eira yokomorenda taitwa korende Onia tegena mangana ayio, ere akaba n’obwoba obonge, omoerio Androniko akamobua ebirengererio akamorusia ase Hekalu akamoita rimo rioka. ⅩⅩⅩⅤ Abayahudi n’abanto bande b’echinse chinde bagaichana mono igoro y’ogoitwa oko. ⅩⅩⅩⅥ Bono ekero omorwoti airanete korwa Kilikia, Abayahudi ba Antiokia bakamochiera bakemurungania igoro y’ogoitwa okwo kw’oboriri; nonya n’Abagiriki bakaorokia obororo igoro y’obobe obwo. ⅩⅩⅩⅦ Omorwoti Antioko agaichana mono goika akaiyeria amariga kobua mono ekero ainyorete buna Onia arenge omonto bw’omoroberio. ⅩⅩⅩⅧ Obororo obonene bokamosoa goika agatandora chianga chi’Andronika, erio akamoetanania omochie bwonsi goika aria ase aiterete Onia, agwo nere akamoita agakwa. Igo nabo Omonene aete Androniko egesusuro ekio aganeirie. ⅩⅩⅩⅨ Chingaki echio ekero Lisimako agokonywa na momura omwabo, Menelao konya okorire amang’ana amange amabe ase omochie, ebinto ebinge bi’erigori konya biaibirwe korwa ase Hekalu. Ekero amang’ana ayio amanyekanete abanto bagacha bare ebiombe ase ebiombe bakaba mamincha ya Lisimako. ⅩⅬ Omoerio oye ebiombe biria bi’abaanto bakaba n’obororo goika onde tabanyara, erio Lisimako akaira abarwani esegi chilifu isato (3,000) babwate ebirwanero erio korwania ebiombe ebio bi’abaanto, abarwani esegi abwo nigo bare koragwa na Aurano, eyio orenge omokoro korende orenge omoriri mono. ⅩⅬⅠ Ekero Abayahudi abwo barenge isiko y’ Hekalu baroche buna baboereirwe, bagachora amagena, chinko boigo n’amagena korwa ase emesa eria y’abatabau bakarutera Lisimako n’omoganda oye. ⅩⅬⅡ Bagaita abanto bake korwa ase omoganda oria o Lisimako, na bagatiga abande bare n’echingoma, na bonsi baria batigarete bagatama gotoria amagima abo. Lisimako oyio orenge oboibi bw’ebinto bi’Hekalu agaiterwa ange n’ekegancha gi’Hekalu. ⅩⅬⅢ Ase engencho y’amang’ana aya, Menelao agasoerwa. ⅩⅬⅣ Ekero omorwoti aigete omochie o Turo, abanene b’Abayahudi bagatoma abanto batato ase are komotebia igoro y’amamocho a Menelao. ⅩⅬⅤ Ekere Menelao aroche buna ekiina kiamoengeire, akaa Tolemai omwana o Dorimere riaki erio aebererie omorwoti amokorere ogwanchereria. ⅩⅬⅥ Tolemai akaebereria omorwoti bagasoka nere isiko erio baregokia, ekero bare agwo isiko akamoebereria aonchorerie ebirengererio biaye, ⅩⅬⅦ na koraria nga Menelao tabwati komocha konde gwonsi. Bono Menelao agatigwa akagenda ore omosibore nonya okorete ogosaria oko gwonsi; korende abanto baria batato abwo batarenge n’okomocha nonya batemete kw’erwanerera ase obosio bw’ekegambero, bakanacherwa ekiina gi’ogokwa. ⅩⅬⅧ Abanto baria batato abwo bare korwanerera omochie o Yerusalemu, abanto baye, amo n’ebinto ebichenu ebio konya biaibiru korwa Hekalu, bakaegwa egesusuro bwango bwango bomaene botaiyo. ⅩⅬⅨ Abanto ba Tirza bakaorokia okogechigwa kwabo igoro y’obobe obwo, korende bakaorokia amasikani bagatindeka emebere ya baria batato baitetwe n’amasikani. Ⅼ Menelao akagenderera koba Omokuani omonene ase engencho ya baria barenge n’okobua korende ere akagenderera koba omobe mono goika akaba omobisa omonene ase abanto bamwabo.