Ⅲ
Okoamererania gati ya Oniasi na simioni
Ⅰ Ekero Onia arenge Omokuani omonene, omochie oria omochenu nigo orenge n’omorembe n’okwama okuya, n’amachiiko nigo arenge kobwatigwa buya mono, ekiagera Onia nigo amoirogete Nyasae na akanga ebibe.
Ⅱ Abarwoti ba Siria na ba Misiri nigo basigete Hekalu, na nigo barenge korwa ebiegwa gochia ase Hekalu.
Ⅲ Omorwoti Seleuko o Asia nigo arenge korwa ensemo yonsi eria yaganeirie ase ebingwanso aria ase Hekalu korwa ase enibo yaye omonyene.
Ⅳ Korende Simioni korwa ase egesaku gia Benjamini oyio orenge omoteneneri omonene ase obokoreri bwe Hekalu, nabwate okongusanana na Onia ase engencho y’omoroberio bw’echiiro y’omochie.
Ⅴ Ase engaki eyio Apolonio o Tarso nigo arenge omogabana o Siria enene. Bono Simioni agachiera Apolonio,
Ⅵ akamoteebia buna ekegancha gie Hekalu nigo kebwate enibo enyinge totanyare kobara; na ase engencho enibo eyio ataganeirie ase engencho y’ekengwanso, nabo ekoegwa omorwoti.
Heliodoro ogotomwa gochia Yerusalemu
Ⅶ Ekero Apolonio baumeranete n’omorwoti ekamoteebia igoro y’enibo eyio, omorwoti agachiika Heliodoro, oyio orenge omoteneneri bw’amang’ana y’omorwoti agende oyie enibo eyio aretere omorwoti.
Ⅷ Heliodoro akaimoka kogenda ase atometwe korende agekora buna oria ogotaarera omochie o Siria enene.
Ⅸ Ekero aigete Yerusalemu akariganigwa buya n’Omokuani omonene, agateebia Omokuani igoro y’ogocha kwaye, na akaboria komanya buya mono igoro yaria konya atebigwe.
Ⅹ Omokuani omonene akamoteebia buna enibo neere yagachetwe ase ekegancha gie Hekalu, korende ensemo gete nigo yabegetwe ensemo ase engencho y’ababoraka na abataka,
Ⅺ na ensemo yende nigo yabegetwe ensemo ase engencho ya Hirikano omwana o Tobia omonto omanyekanete mono. Yonsi ase obwamo nigo yarenge chikiro 13,000 chi’echifeta, n’e’etaabu nigo yarenge chikiro 6,500.
Ⅻ Omokuani oria omonene akagenderera komoteebia buna tekonyarekana nonya nga’ke kobaunereria abanto abwo babegete ogosemeria kwabo ase omoroberio na oborendi obuya bwe Hekalu eyio yare gotogigwa ense yonsi.
Heliororo okoroberia gosoa Hekalu
ⅩⅢ Korende Heliodoro agachiika buna goika enibo eyio eirwe ase ekegancha ki’omorwoti korengana buna achiigete.
ⅩⅣ Ase igo agachiika rituko arenge gocha ase Hekalu gotenenera okobarwa kw’eniibo eria. Egekorwa ekio gekarenta obotantanu ase omochie oria bwonsi.
ⅩⅤ Abakuani bonsi bakabeka chianga chi’obokuani bakagwa inse maumama ase emesa eria y’egesasiimero, bagasaba Nyasae arende enibo eyio, ekiagera nere orwete ogochika nga enibo abanto barure gochia Hekalu erendwe.
ⅩⅥ Kera omonto oroche Omokuani omonene nigo aichanete mono. Agaonchoreria obosio bwaye na obororo bwaye bokarorekana isiko.
ⅩⅦ Nigo arenge gotengechigwa ase obwoba na tanyarete kobisa ogoichana kwaye.
ⅩⅧ Abanto bakarwa ase chinyomba chiabo bakabwatisia abakuani ase ogosaba erio Hekalu teramwa.
ⅩⅨ Abakungu nabarabwo bakebisia chigunia ase ebikuba biabo bagaichora ase chinchera. Abasubati abekungi abwo konya batarancherwa gosoka isiko korwa ase chinyomba chiabo bakamonyoka bagaeta ase ebiita n’echinyasi chi’omochie, nabande bagatigara barigereretie korwa chitirisa.
ⅩⅩ Abwo bonsi nigo baimogetie amaboko abo gochia ase Nyasae bagosaba.
ⅩⅪ Nigo yarenge ogokumia mono korora Omokuani omonene oichanete mono, na korora abanto bonsi baraire inse maumama ase chinchera.
Omonene okorenda Hekalu yaye
ⅩⅫ Ekero bagendererete gosaba Omonene omonyanguru arende enibo eyio yagachetwe inse y’oborendi bwaye,
ⅩⅩⅢ Heliodoro ere akagenderera n’omoroberio oye.
ⅩⅩⅣ Korende ere amo n’abarendi baye baigete ase ekegancha gi’Hekalu, Omonene bw’emeika yonsi n’okobua gwonsi agakora egento ki’ogokumia erio kera oyomo oyosoete ase Hekalu ime amo na Heliodoro agasogwa n’obwoba nakoererwa chinguru.
ⅩⅩⅤ Ase egekorwa ekio bakarora ebarasi n’omorini oye. Ebarasi nigo yabekeire ase omogongo oye ebirogo ebiya bw’ogoikaransera na omorini bw’ebarasi nigo abegete chianga chikomekameka korende nigo arenge gotengechigwa. Mobasokano ebarasi eria agaonchokera Heliodoro agachaaka komoita n’amagoro aye amotwe.
ⅩⅩⅥ Erio agwo abamura babere bakaoroka bosio bwa Heliodoro bagatenena oyomo ase okoboko gw’okorio n’oyonde okoboko gw’okobee; bagaita Heliodoro batari mabera.
ⅩⅩⅦ Heliodoro akagwa inse akagireka. Abanto baye bakamoimokia bakamobeka ase egetanda ki’abarwaire bakamosokia isiko.
ⅩⅩⅧ Ase egeka egeke omonto oyio osoete ase ekegancha gie Hekalu amo n’omoganda omonene amo n’abarendi baye, korende bono nigo agosokigwa isiko ore ase egetanda ki’ababwaire. Abanto bonsi bagaichana na gokumia mono okobua kwa Nyasae.
Oniasi ogosabera Heliodoro
ⅩⅩⅨ Kobwatekana n’egekorwa ekio kia Nyasae, Heliodoro agatigara oraire ase emechando atari konyara gokwana gose atari n’ogosemeria konde.
ⅩⅩⅩ Abayahudi bakamotogia Omonene oyio okorete amakumia ase engencho y’amasikani ye Hekalu yaye. Bono agwo ase Hekalu abanto abwo baichanete bare n’obwoba bakagoka mono na gochengera ayio.
ⅩⅩⅪ Abasani bake ba Heliodoro, bagacha ase Onia Omokuani omonene bakamoboria asabere Heliodoro erio Nyasae amotangere amakweri ayio konya amoikeire.
ⅩⅩⅫ Bono Omokuani omonene akarwa ekengwanso kare n’okwegena buna Nyasae nagweni Heliodoro, ekiagera tatagete omorwoti akagere buna Abayahudi nabwo bakorerete Heliodoro amabe ayio.
ⅩⅩⅩⅢ Ekero Onia Omokuani omonene arenge korwa ekengwanso, abasae baria babere baria baorogete agwo ritangani babegete chianga chiria babegete riria ritangani bakaorokera Heliodoro bakamoteebia: “Omosike mono Omokuani omonene ase engencho goetera ase ere Omonene otoririe obogima bwao.
ⅩⅩⅩⅣ Inyora buna Omonene nere okoa egesusuro. Bono aye genda bwoo otebie kera omonto igoro y’echinguru chia Nyasae.” Ekero bakorete gokwana ayio bagasira.
Heliodoro ogotogia Nyasae
ⅩⅩⅩⅤ Bono Heliodoro akarwera Nyasae ekengwanso na akaria chiira chinyinge, ekiagera Omonene atoretie obogima bwaye. Gakorire ayio agatiga Onia erio akairana gochia ase omorwoti amo n’omoganda oye bw’esegi.
ⅩⅩⅩⅥ Agateebia kera omonto amang’ana ayio Omonene omonyanguru akorete.
ⅩⅩⅩⅦ Ekero omorwoti aboreti Heliodoro amoteebie buna niing’o oragende Yerusalemu engaki ende, Heliodoro akamoteebia:
ⅩⅩⅩⅧ Onye kobwate omobisa gose onye komanyete monto onde ore mamincha y’omogambi bwao oyio nere ogotoma. Nigo arairane gasusuire mono onye gakoba n’egesio gi’okoirana ekiagera aria Yerusalemu chinguru chi’ogokumia chia Nyasae nigo chigokora emeremo.
ⅩⅩⅩⅨ Nyasae ore igoro nigo arendete Hekalu na nigo agosiria onde bwensi oraganie koyesaria.
ⅩⅬ Oyo noro omogano buna ebigancha bi’ Hekalu biarendetwe korwa ase Heliodoro.