Ⅱ
Yeremia okobisa eema y’egesasiimero
Ⅰ Kobwatekana n’amangana a kare, nigo tomanyete nga omobani Yeremia nigo achigete abanto abwo bare koirwa obosomba babise ensemo gete y’omorero bw’emesa y’ekengwanso buna twarorire aiga.
Ⅱ Nigo tomanyete buna magega y’okobaa amachiiko nigo abachigete baria bare koirwa obosomba tibeba amachiiko o Omonene Nyasae gose kongaineka ekero bararore emegwekano y’ogosasimwa gose chinibo chinyinge.
Ⅲ Ase amang’ana anga buna ayio nigo ababegete chinguru babeke amachiiko ase chinkoro chiabo.
Ⅳ Amang’ana ayio ayio a kare nigo boigo agotoinyoria buna Yeremia akaragwa na Nyasae erio agachiika eema eria y’omosangererekano n’esanduki y’okobwatana birwe goika egetunwa aria ase Musa atenenete agwo kare na korigereria ense eria abanto ba Nyasae barieretwe eira.
Ⅴ Ekero Yeremia aigete ase egetunwa igoro akarora ribwago rinene, erio akabisa eema eria amo n’esanduki y’okobwatana amo n’emesa eria y’egesasiimero, erio agasieka egesieri ki’eribwago riria.
Ⅵ Abasani ba Yeremia bake bakamobwatia na kobeka ekemanyererio ase enchera eria aetete korende tibanyorete ribwago riria.
Ⅶ Ekero Yeremia aigwete buna bakorire igo akabatogonyera agateeba: Ase agwo nigo aragenderere koba ase abobisi goika engaki eria Nyasae arasangererie abanto baye na kobarorera amaabera.
Ⅷ Engaki eyio Omonene nabaorokerie ebinto ebio, obonene bw’Omonene n’erire riria mbirorekane, buna yabete engaki eria ya Musa, na buna Sulemani asabete Hekalu ebekwe ensemo ase obonene.
Buna Solomoni achengerete omoyega
Ⅸ Boigo nigo eriikire ase okoiranerera kw’amachiiko buna Sulemani omorwoti omongaini aruete ekengwanso chingaki chi’okobeka ensemo Hekalu magega kobakorire koyeagacha;
Ⅹ ekero asabete omorero nigo ochete korwa igoro ogasamba ekengwanso buna yakoregete kare chingaki chia Musa.
Ⅺ Musa nigo atebete buna ekengwanso ki’ebibe nigo giasambetwe n’omorero ase engencho getarietwe.
Ⅻ Sulemani agachengera rituko erio rinene ase egeka ki’amatuko atanonatato (8).
Enyomba y’ebitabu ya Nehemia
ⅩⅢ Amang’ana ayio nigo ariikire boigo ase okoiranerera kw’abarwoti na okoiranerera kwa Nehemia oyio ochagete okogacha kw’ebitabu na gosangereria amariko a Daudi, amarube abarwoti igoro y’ebingwanso n’ebitabu igoro y’abarwoti n’ababani.
ⅩⅣ Yuda boigo nere konya osangererie ebitabu ebio biasirete engaki y’esegi ebio tobwate aiga bono.
ⅩⅤ Onye mobiganetie toma abanto bache kobioyia.
Ogochikwa ase ogochengera omoyega
ⅩⅥ Ase engencho bwango iga ngochengera tore rituko rinene ri’okorwa Hekalu ase oboyia, nigo tokobarikera nainwe boigo mochengere rituko erio.
ⅩⅦ Nyasae otoririe abanto baye bonsi, naende otoiraneirie ense yaito enchenu, oborwoti, obobani n’ obokoreri bwe Hekalu
ⅩⅧ buna achigete ase amachiiko. Ototoririe korwa ase obobe n’emechando yonsi, na agachena Hekalu, naitwe twegenete buna goetera ase amaabera aye natosangererie bwango iga ase Hekalu enchenu korwa kera egesaku ense engima.
Amang’ana okoigora y’omoriki
ⅩⅨ Yasoni Omokurene nigo ariigete ase ebitabu bitano omogano igoro ya Yuda, Makabi n’abamwabo, ogochenwa gwe Hekalu enene, na okobekwa ensemo kw’emesa y’egesasiimero.
ⅩⅩ Nigo agokwanera igoro yokoamererania igoro ya Antiokia Epifane na igoro y’omwana oye Eupatori,
ⅩⅪ na boigo igoro y’amaroro a igoro ayio banyorete baria barwanete mono korwanerera edini y’ekeyahudi. Omobaro bw’abarwani esegi baito nigo barenge abake mono. Nonya nigo baboerete ense yonsi na goseria abarwani esegi b’echinse chinde.
ⅩⅫ Bakairaneria abanyene Hekalu yabo eyio yamanyekanete ense yonsi, bagatoria omochie o Yerusalemu, na koirania amachiiko ayio konya atugutirwe. Nigo bakorete ayio onsi ase engencho Omonene abete omuya na omonyamaabera ase bare.
ⅩⅩⅢ Bono nkorika inde ase obweng’e ase egetabu ekemo aria arigetwe na Yasoni ase ebitabu bitano.
ⅩⅩⅣ Ase engencho amang’ana ayio nigo ariikire ase obogare ayio araroisie omonto erio taigwa buya omogano oyio.
ⅩⅩⅤ Bono inche natemire mono kwororobia amang’ana ase engencho y’abasomi: baria bagosoma ase okwegokia mbagoke, na baria batagete komanya igoro y’amang’ana akoregete tibakonyora mochando.
ⅩⅩⅥ Koringa obweng’e bw’amang’ana buna aya n’emeremo emekongu, eyio eganeti omonto kogiramora na kogesa botuko.
ⅩⅩⅦ Nigo ere emeremo emekongu buna okwarigania omoyega bw’abaanto ao ao. Korende inche nigo ngokerete emeremo eyio erio nkonye abasomi baane.
ⅩⅩⅧ Ngotema inde mono sana tindika amang’ana amange; emeremo eyio namotigeire oria otongete ense ritangani. Inche nigo ntagete korika ase obweng’e aria akoregete.
ⅩⅩⅨ Inche tindi omoroisia bw’enyomba engeni eyio ogokora kera egento, korende inche n’omwaki chirangi na emeremo yane n’okoroisia enyomba erorekane buya.
ⅩⅩⅩ Omonto bw’emegano goika amanye ogosoma kwaye, aringorie kera ring’ana na koriera buya mono.
ⅩⅩⅪ Korende omonto oria okorika amang’ana ase obweng’e nancheire kobeka amang’ana aye ase obweng’e.
ⅩⅩⅫ Ase igo bono gotamenta amang’ana amange nachakire omogano one. Ekiagera n’oboriri korika amang’ana amange ase omochakano bw’egetabu ki’omogano, na korika amang’ana are ime ase obweng’e.