EGETABU GIA KABERE KIA
MAKABI
Ogochaakera
Egetabu eke gia kabere kia Makabi nobwenge bwechiforiumu isano chia Jasoni mosinto o Cyrene. Egetabu eke nigo kegokwanera igoro yabiria biakoregete ase egati y’Abayahudi korwa chingaki chia Omokuani omonene Oniasi o gatato (ange 180 nyuma Yeso ataraiborwa), goika ogokwa kwa Nikanori (161 nyuma Yeso ataraiborwa), boigo amang’ana aye nigo anga buna aria are ase Makabi y’eritangani. Amang’ana akobekwa chinguru mono naria igoro yokoba omoigweri ase amachiiko boigo n’eng’eria ya Nyasae ase baria bagokwa ase ekeene.
Okobagwa kw’egetabu eke:
Amarube gochia ase Abayahudi ba Misiri boigo n’obwenge 1:1—2:32
Okoamereria kw’Obokuani obonene 3:1—4:50
Antioko Epiphanes n’ogochandwa kw’Abayahudi 5:1—7:42
Obobui bwa Yudasi 8:1—15:39
Ⅰ
Riruube gochia ase Abayahudi ba Misiri
Ⅰ Korwa ase Abayahudi ba Yerusalemu na Judea, gochia ase abamwabo bare Misiri, amaiga n’omorembe.
Ⅱ “Nyasae abasesenie, na aikeranie okobwatana okwo akorete n’abasomba baye abegenwa: Aburaamu, Isaka, na Yakobo.”
Ⅲ Tiga Nyasae abae okogania gw’okomosasiima na gokora okogania kwaye ase omoyo bw’okwerwa.
Ⅳ Nyasae abae okobua gw’okobwata amachiiko aye. Nigo togosaba Nyasae abae omorembe,
Ⅴ aigwe ogosaba kwaino, ababere ebibe biaino na tabeba chingaki chi’emechando.
Ⅵ Nigo togendererete kobasabera korwa aa Yudea.
Ⅶ Ase omwaka 169, ekero Demeturio o kabere arenge omorwoti, intwe Abayahudi ’ntwabarikerete tokabateebia igoro y’emechando n’obororo twanyorete ase emiaka eria magega Yasoni gokora obosaria ase omochie oria omochenu.
Ⅷ Yasoni n’ekeombe kiaye nigo basambete egesieri gi Hekalu na goita abanto batabwati mamocho. Nigo twasabete Omonene ere akaigwa ogosaba gwaito. Nigo twaretete ekeegwanso gi’echitugo chiato boigo n’okwama gwaito okuya, togokia etaya ase Hekalu na tokabeka emegati emechenu.
Ⅸ Ase engencho eyio twabasoroire mochengere rituko rinene buna riria ri’echiema ase kera omotienyi o Kisilevu ase omwaka 188.
Riruube gochia ase Arisitobulo
Ogokwa kw’Omorwoti Antiokia
Ⅹ Korwa ase abanto ba Yerusalemu na Yuda, boigo n’ekegambero ekenene ki’abagaaka n’Abayuda ngokorikera tore aye Aristobulo, omoiborwa bw’abakuani na omworokia bw’omorwoti Tolemai, n’abayahudi bare misiri. Twagokwanirie na gokoganeria obogima obuya.
Ⅺ Twamwakeire Nyasae mbuya mono ase engencho atotoretie korwa ase emechando emenene agatokonya korwa ase omorwoti.
Ⅻ Nyasae nere otosereretie ababisa baito korwa ase omochie oito omochenu.
ⅩⅢ Omorwoti Antioko ekero aigete Persia na omoganda omonene bw’abarwani oyio orenge kororekana otabweke, abarwani abwo b’esegi nigo banachanetwe ebingese ebingese aria ase hekalu ya Nanea ase engencho y’echiira chiria abakuani b’enyasae eria ekuungu yare korokwa Nanea bariete
ⅩⅣ Antioko konya osoire ase Hekalu amo na bake bab’amasemia baye ng’a achie konywoma enyasae eria ekuungu, korende okogania kwaye okonene n’okogenda kwenyorera enibo eria yagachire aria Hekalu.
ⅩⅤ Ekero abakuhani baigorete ebigachero, Antioko n’abanto baye bake igo bagasoa ime ase Hekalu gosakora enibo, ekero basoa abakuani bagasieka emerangwa rimo rioka,
ⅩⅥ erio bakabaruta amagena korwa ase bebisete ase omorangwa o bobisi, bakababutabutorana emebere yabo na gotuguta emetwe yabo isiko ase abanto.
ⅩⅦ Nyasae oito atogigwe ase kera engencho ase engencho obaeire egesusuro abasaria abwo.
Omorero ogosamba ekengwanso kia Nehemia
ⅩⅧ Ase rituko ri’emerongo ebere n’atano ase omotienyi o Kisilevu nigo togocha gochengera rituko rinene r’ogochenwa gwe Hekalu, buna togochengera rituko rinene ri’echiema. Nigo twaroche nga mbuya tobainyorie ayio, erio nainwe mochengere rituko erio rinene. Moinyore buna omorero ochete engaki Nehemia arwete ekengwanso magega y’ogokora kwagacha oboyia Hekalu n’egesasiimero.
ⅩⅨ Ekero abagaaka baito konya bairirwe ase obosomba aria Persia, abakuani bake baria bamoirogete Nyasae nigo bairete omorero moke igo korwa ase emesa y’egesasiimero, bakayobisa bobisi nyaro ase egesima ekiomo. Omorero oyio nigo bayobisete buya tomanyekana na monto onde bwensi.
ⅩⅩ Emiaka emenge magega ko Nyasae aroreire abanto amaabera, omorwoti o Persia akairania Nehemia gochia Yerusalemu. Nehemia agateebia baria b’ororeria rwa Abakuani barigie omorero oria. Bakairania amang’ana gocha ase tore buna tibanyoreti morero oria korende n’amache, amache amarito. Nehemia akabateebia babuche amache aria amarito bayarete.
ⅩⅪ Ekero ebinto bionsi biganeirie ase engencho y’ekengwanso biabegetwe ase emesa aria y’amatabau, Nehemia agateebia abakuani baria baumore amache aria amarito igoro ase chiinko na igoro ase ekengwanso keria.
ⅩⅫ Bagakora igo ase chingaki echio chionsi n’erisase erio riatubire n’amare rigachaka kobara, erio kera egento ekio kiarenge igoro ase emesa eria y’amatabau y’esadaka gekabwatwa omorero. Abanto bonsi bakarigereria na gokumia mono.
ⅩⅩⅢ Ekero omorero oria ogendererete gosamba ekengwanso keria, Yonathani, Omokuani omonene agachaaka gosaba erio n’abanto bande bonsi bakamoitaberia bakoragwa na Nehemia.
Ogosaba kwa Nehemia
ⅩⅩⅣ Ogosaba kwa Nehemia nigo kwarenge iga: Omonene Nyasae omotongi o bionsi! Aye n’oyobwogokumia na omonyanguru, boigo n’omonyamaabera na ekeene. Aye bweka naye omorwoti. Onde taiyo ore omuya otatiga aye;
ⅩⅩⅤ Onde taiyo ore omonyaboronge na ogokora amaya otatiga aye. Aye n’omonyanguru na omochia kare. Aye nigo ogotoria Abaisraeli korwa ase obobe bwonsi; nigo gwachorete chisokoro chiaito okababeka ensemo ase engencho y’obokoreri bwao.
ⅩⅩⅥ Ancherana ekengwanso eke togokoruera ase engencho y’abanto bao Abaisraeli bonsi; renda abachore bao na obakore babe abachenu.
ⅩⅩⅦ Osangererie abanto baito abwo baseberekanete. Osibore baria bare abasomba ase chinse chingeni. Ororere abanto baito amaabera abwo bakounererigwa na gochaywa, erio abanto b’ebisaku binde bamanye buna aye naye Nyasae oito
ⅩⅩⅧ kae baria bare abatindi na baria batari gwekanya egesusuro.
ⅩⅩⅨ Anchera abanto bao basoe ase ense yao enchenu buna Musa abateebetie.
Omorwoti o Parsia okoigwa igoro y’omorero
ⅩⅩⅩ Erio abakuani bagatera ogoteera.
ⅩⅩⅪ Na ekero ekengwanso kiaerete koyia, Nehemia agachiika amache aria atigarete aumorwe igoro ase amagena aria amanene
ⅩⅩⅫ erio omorero ogoka rimo rioka, korende okarimigwa n’erioki ri’omorero oria oronge ase emesa y’egesasiimero.
ⅩⅩⅩⅢ Amang’ana ayio agakwanwa kera ase. Omorwoti o Persia akaigwa buna amache gete anyorekanire ase abakuani babisete omorero bw’emesa yokoruera ekengwanso magega konya batarairwa obosomba. Boigo akaigwa buna Nehemia n’abasani baye nigo bare kobeka amache aria erio basamba ekengwanso.
ⅩⅩⅩⅣ Omorwoti ekero aunengetie amang’ana ayio akanyora buna n’ekeene, akarwa ogochika ase aria akagitwa erio akayakora koba ase achenu.
ⅩⅩⅩⅤ Ase igo omorwoti akanyora chitaabu chinyinge mono korwa ase aria, echio are koa monto onde bwensi anchete.
ⅩⅩⅩⅥ Nehemia n’abasani baye bakaroka amache ayio “nafthari”, engencho yaye ogochenwa; korende ange abanto bonsi nigo bakoroka amache ayio ’naftha.