Ⅰ Yohana mosinto o Simioni, agasooka korwa Gazara, akagenda gochia komoteebia ise amang’ana aria Kendebeo akorete. Ⅱ Simioni akabateebia abana baye abanene Yohana na Yuda, “Inche amo na abamura baminto neamate yonsi ya tata ominto, twabeire tokorwana esegi ya Abaisraeli ase obogima bwaito bwonsi, na ase ebiro ebinge twanyaarire koyetooria Israeli. Ⅲ Bono inche nagotire, bono inwe ase ebisio bia Omonene mwaichoire chinguru chia abanto abanene. Goika inwe bono mobogorie ribaga riane neria abamura baminto ase ogokerwanerera egesaku giaito. Omonene tiga abe nainwe ase okobarwanerera.” Ⅳ Yohana akaroisia ekeombe kia abarwani be esegi b’Abaisraeli kere na abasikari ebiata bakorwanera chibaarasi 20,000, agasooka kogeenda komorwania Kendebeo. Ekero baruure ase okoraara Modeini, Ⅴ mambia chuni ase rituko riarenge kobwatia, bakaroria ensemo yomweya. Agwo bakarora ekeombe ekenene kia abasikari bagochiera amagoro na baria be chibaarasi bagochicha kobarwania, korende ase egati yabo bonsi ndwarengeo orooche. Ⅵ Yohana na abarwani baye be esegi bakeroberia ase okorwana esegi na ababisa, na ekero abasikari barorekanete kwoboa gotamboka orooche, Yohana akabatang’ana erio abanto baye bakamobwatia. Ⅶ Yohana akabaatanana abasikari baye na kobeeka abariini be chibaarasi gati ya abasikari bagochiera amagoro, ase engencho abasikari b’ababisa bariinete chibaarasi barenge abange kobua. Ⅷ Ebituureri bikabugigwa na esegi egachaaka. Kendebeo na abarwani esegi baye bagaitwa mono, bakabugwa na gosiria abasikari abange. Baria baminchoretie korwa ase amakweri, bagatama gochia Keduroni eburi yaabo. Ⅸ Konye Yuda oakirwe chingoma ase esegi korende momura omwabo Yohana akabaromeng’ana ababisa goika Keduroni, omochie oyio Kendebeo aagachete boyia Ⅹ Abasikari abwo bareenge gotama bakagenda kwebisa ase chinyasi chiarenge ase emegondo ya Ashidodi erio Yohana akayosamba omochie oyio. Ase rituko erio abasikari 2,000 ba ababisa bagaitwa; Yohana akairana Yudea kare buya. Ⅺ Omokuani omonene Simioni, konye omochoorire Tolemai mosinto bwa Abubo, erio ere abe omochiki bwe esegi ase omweya o Yeriko. Nere Tolemai nigo abwate chifeta n’echitaabu chinginge kegima, Ⅻ ase engencho amonywomerete Simioni Omokuani omonene. ⅩⅢ Korende ere nigo arenge nobote obonene, akarigia koira oborai bw’ense. Ere agakoraobobisi bw’okomoita Simioni na momura oye. ⅩⅣ Simioni na Matathia na Yuda nigo barenge gotaarera emechie ao ao erio kwemanyia amagania ya abanto. Omotienyi o Shebati, engencho yaye oyoikomi na rimo ase omwaka o 177, bagaika Yeriko. ⅩⅤ Tolemai kare nobobisi bw’okomoita Simioni amo na abamura baye, akabaarigania ase eburi enke yarenge korokwa Doki eyio ere omonyene aagachete. Akabakorera omoyega omonene korende ere nababisete abanto eburi eyio ime. ⅩⅥ Ekero Simioni na abamura baye babeete batindire, Tolemai na abanto baye bagasooka nemioro koboko bagasoa chimbero ime ase eero yomoyega, bakabaita Simioni na abamura baye babere amo na abande ase abakoreri baabo. ⅩⅦ Ase ogokora oko okobe kwobobegu, Tolemai akairaneria obobe ase amaya. ⅩⅧ Erio Tolemai akariika amang’ana aria akorete, akamoirera omorwoti. Ase amang’ana ayio agasaba airerwe abasikari bagokonyana nabwo na boigo buna ere aegwe oboteneneri bwe’emechie ene erio koba eyaye. ⅩⅨ Akabariikera abanene be esegi na kobaarigania ase chiira chi’okobaakana eng’eria ye chifeta, etaabu nebiegwa ebinge. Erio akabatoma abande ase egati ya abanto baye bagende Gazara komoita Yohana, ⅩⅩ na abande kogenda kobwata omochie o Yerusalemu na egetunwa gie Hekalu. ⅩⅪ Korende omonto oyomo akamonyoka chimbero na gotang’ana Gazara bosio bwa abanto abwo ba Tolemai, akamoteebia Yohana buna ise na bamura bamwabo baitirwe na buna Tolemai abatomete abasikari bamoite Yohana. ⅩⅫ Yohana akarera mono ekero aigwete ayio, korende ase engencho amanyetigwe amang’ana ayio ritang’ani, akababwata na kobaita abanto abwo batometwe bache komoita. ⅩⅩⅢ Amang’ana ande a Yohana: chiseegi chiaye, amakora aye yoboremu, oboagaachi bwaye bwechinyasi na okobua konde ere enyorerete, ⅩⅩⅣ bionsi nigo biriikire ase ebiinyorio bioborai bwaye buna Omokuani omonene, korwa buna ere abonyoorete ise gakuure.