Ⅰ Korwa ase ebisinga bi’enyancha, Antioko omwana bw’omorwoti Demeturio, akariika riruube rikobwatia ase Simioni, Omokuani omonene na omorai bwa Abayahudi, naboigo ase egesaku gionsi: Ⅱ Omorwoti Antioko ase Omokuani omonene okoraa na ase egesaku ki’Abayahudi: Amaiga ayio! Ⅲ Buna inwe momanyete, oborwoti bw’echisokoro chiane bwasagaanirwe na kobogorigwa na ababegu. Neruure koboirania na boigo koboiraneria amasikani aye yeritang’ani. Inche nasangereirie ekeombe ekenene kia abasikari bogokomboa na boigo koarigania chimeli chi’eseegi. Ⅳ Ekerenga kiane nogosagaana ense eyio na kobarwania esegi baria basaretie ense yaito na koyeira emechie emenge. Ⅴ “Bono inche nigo nkobaikeraneria okwaberwa gwonsi gwechibaango nogoakana konde mwarobereretigwe na abarwoti baria bantang’anerete. Ⅵ Inche bono nabaeire ribaga riokweroiseria chitaabu chiaino abanyene echio inwe morabe mogokorera oboonchorerio bwaino ase ense yaino. Ⅶ Teri ebaango ende erasabwe ase omochie o Yerusalemu ne Hekalu. Ebirwanero bionsi mweroseirie ne chiburi mweagacheire echio mobwate ase amaboko aino ng’a bibe enibo yaino. Ⅷ Komenta nayio, amadeni onsi aria inwe mogosabwa gochia ase ekegancha kiomorwoti gose aria mwarenge gocha gosabwa ase amatuko a motwe nigo aratinyigwe erimo ase erimo. Ⅸ Erio kegima ekero inche ndaabe nasoire ase oborwoti bwane, inche ninkoe aya oborwoti bwao ne Hekalu amasikani amanene goika obonene bwe ense yaino bomanyekane ense yonsi.” Ⅹ Ase omwaka o 174, Antioko akayesagaana ense yechisokoro chiaye. Abasikari ang’e bonsi bagasangererekana na kobwatana nere; abake kegima bakabwatana na Turifo. Ⅺ Ekero Turifo akominyokigwa na Antioko, agasoa Dori omochie oyio ore mbarabare yenyancha. Ⅻ Ere konye omanyire buna amang’ana amobereire bobe, ase engencho abasikari baye bonsi konye bamotigire. ⅩⅢ Antioko akayoonchokana omochie o Dori ore na abasikari bachorire 120,000 amo na abechibaarasi 8,000. ⅩⅣ Nabwate chimeli ase enyancha echio boigo chiarenge gosagaana. Omochie oyio nigo onaaretigwe chinsemo chionsi na omogwa torengeo omonto arenge gosoera gose gosookera. ⅩⅤ Ase ebiro ebio ebio, Numenio na abamwabo bagaika Yerusalemu korwa Rumi bare ne riruube rikobwatia erio riarigetwe na abarwoti ao ao: ⅩⅥ “Korwa ase Lukio, omonogeri bwa abaroma, ase omorwoti Tolemai: Amaiga ayio! ⅩⅦ Abatomwa korwa ase abasani na ababwatani baito, Abayahudi, bachire aiga seito koroisia boyia okobwatana naintwe koria gwakoretwe ritang’ani kwobosaani na okobwaterana. Aba nigo batomire n’Omokuani omonene Simioni amo negesaku gionsi kia Abayahudi, ⅩⅧ barabwo barentire ekeegwa kienguba ye etaabu ebwate oborito bwechiratiri 500. ⅩⅨ Bono intwe twaetirie tomoriikere abarwoti b’echinse ao ao na kobaboori tibabaisa kobakorera Abayahudi bobe bonde bwonsi ase emechie yaabo, gose ense yaabo; tababarwania Abayahudi esegi gose kobwaterana na ababisa baabo bakobasagaana. ⅩⅩ Twaetirie koyebogoria enguba batorenteire na kobarenda. ⅩⅪ Ase igo, bono keraabe ogwatananeka konde gwonsi kwabeire ase Yudea na gotamera ense yao, oiranie abanto abwo ase Simioni, Omokuani omonene, nere nabae egesusuro kobwatekana na amachiiko ya Abayahudi.” ⅩⅫ Lukio akamoriikera riruube erio erio omorwoti Demeturio, Atalo, Ariarathe na Arisake, ⅩⅩⅢ na ase chinse chikobwatia: Sampsame, Siparta, Delo, Mindo, Sikiyoni, Karia, Samo, Pamufulia, Likia, Halikanariso, Rode, Faseli, Kosi, Side, Arado, Goritana, Nido, Kuporo na kurene. ⅩⅩⅣ Ensemo yeriruube erio boigo rikaegwa Simioni Omokuani omonene. ⅩⅩⅤ Omorwoti Antioko, ase eria kabere akayoetanana omochie o Dori, akaba gakoyosagaana boire boire. Ere akaroisia etinga yeseegi; akamotanga Turifo na abanto baye gosoa gose gosooka korwa omochie. ⅩⅩⅥ Simioni agatoma abasikari bachoorire 2,000 komobwatesia Antioko, boigo chifeta, etaabu nebirwanero ebinge. ⅩⅩⅦ Korende Antioko akanga konyora obokonyi obwo, agatugutera are okobwatana ogotang’ani koria akorete na Simioni, akaba omobisa oye. ⅩⅩⅧ Erio Antioko akamotoma Athenobio omonene oye oyio egenete kogenda gokwana na Simioni. Athenobio akamoteebia Simioni: “Inwe nigo mobogoretie Yopa, Gazara, ne eburi ya Yerusalemu emechie eyio ere ase oborwoti bwane. ⅩⅩⅨ Mwachichandire chinsemo echio na korenta amakong’u amange ase ense. Inwe nigo mobwatete chinsemo chinyinge chi’oborwoti bwane. ⅩⅩⅩ Bono inwe inamoiranie chinsemo echio chionsi mwairete na kong’akana inche ebango eyio mwasangereirie korwa ase chinsemo echio moikaranserete isiko ye ense ya Yudea. ⅩⅩⅪ Onye inwe timotageti gokora boigo, inwe nigo mokong’akana chitaabu chikiiro 17,000 ne echinde boigo 17,000 goakanera ogosiria korwa ase chibango echio nasiretie. Onye timotageti gokorera nonya nerio, rirorio inwe mwerareirie esegi nainche.” ⅩⅩⅫ Ekero Athenobio aigete Yerusalemu na kwerorera obotenenku na obonene bwa Simioni, ebibeekerero bi’etaabu, ne efeta ase eero yemeyega na ayande ayogwetogeria, ere akaigora omonwa oye ase ogoichana. Erio bono akariereria riruube rire na amang’ana yomorwoti gochia ase Simioni. ⅩⅩⅩⅢ Simioni akairaneria: “Intwe titwana gwesakorera ense ende yonsi korwa ase chinse chinde chionsi naboigo titwana koiba kende gionsi korwa ase ense ende yonsi. Korende mamincha yayio, intwe nigo tweiraneirie obonda boria bwoka twarieretwe omwando nechisokoro chiaito, chinse echio ababisa baito batourete ase chinchera chitari boronge ase amatuko a magega. ⅩⅩⅩⅣ Bono intwe nigo togokorera ribaga tobwate emeremo kwenyorera omwando oito korwa ase chisokoro chiaito. ⅩⅩⅩⅤ Bono igoro ya Yopa na Gazara, emechie eyio mokoroka buna neyaino, inwe ng’a tobae chitaabu chikiiro 3,400, nonya nabo, abamenyi b’echinse echio barentire ogosaria okonene ase egesaku giaito.” Athenobio tairaneria kende, ⅩⅩⅩⅥ korende akairana ase omorwoti obutiarete nekeririanda. ⅩⅩⅩⅦ Ase ebiro ebio ebio, Turifo konye orinire emeli na gotamera Orithosia. ⅩⅩⅩⅧ Omorwoti Antioko akamochoora Kendebeo abe omochiki bwe esegi ase ensemo yekiambokero, erio akamoa abasikari bagochiera amagoro amo na abechibaarasi, ⅩⅩⅩⅨ na komoa ribaga abeeke ekambi ase okorwania Yudea. Boigo akamochiika ayoagaache boyia omochie o Keduroni na gokong’ia ebisieri biaye, erio ere anyare korwania egesaku kia Abayahudi. Omorwoti omonyene akaba ogendererete komoromeng’ana Turifo. ⅩⅬ Kendebeo agaika Yamunia na gochaaka kobarianania Abayahudi ase okoyesagaana Yudea, kobaira abanto na kobita kegima. ⅩⅬⅠ Akayoagaacha boyia omochie o Keduroni na kobibeka ebiombe bitari bike bia abasikari bagochiera amagoro ana abariini be chibaarasi agwo erio barabwo banyaare gokora ogosagaana na gochirenda chinchera chionsi chia Yudea, buna omorwoti konye achiikire akoreke.