Ⅰ Omwaka o 172, omorwoti Demeturio o Kabere agasangereria abarwani baye be esegi na kogenda Media gosaba obokoonyi bonde erio agende korwania Turifo esegi. Ⅱ Ekero Arisake o Gata’narimo, omorwoti o Persia na Media aigwete buna Demeturio osaaganire ense yaye akamotoma oyomo bwabachiiki baye be esegi agende amo na abasikari baye bake bamobwate Demeturio na komomorentera kare moyo. Ⅲ Abasikari bakabasagaana na kobabua abarwani be esegi ba Demeturio na komoira Demeturio ase omorwoti Arisake. Omorwoti akamobeka Demeturio ime ase echeera. Ⅳ Ebiro bionsi Simioni arenge moyo, ense ekaba nomorembe. Nere agatakera egesaku kiaye obobui; oborai bwaye bokabagookia abanto nesiko ere anyorete ase obogima bwaye. Ⅴ Ogotogigwa kw’obonene bwaye bokaba ekero airete chingegu chia Yopa, akaigora enchera yogoika ebisinga bia Mediterania. Ⅵ Akamenta oboagare bwechimbebe chi’egesaku kiaye na gotwara obobui bw’ekeene ase ekerogo kiaye. Ⅶ Akabairania abasibwa abange bechiseegi goocha ense yaabo; akayogambera omochie o Gazara na Beth-zuri amo neburi ya Yerusalemu. Akayechena eburi eyio na tarengeo omonto onde orenge komoamererania nere. Ⅷ Abayahudi bakarema ase emegondo yaabo ase omorembe, ense ekarua okwama kwaye na amatunda akaama ase obonge. Ⅸ Abagaaka bakaba baikaransete ase chieero, abanto bonsi bagakwanera amang’ana amaya; na abasae nabarabwo bakeboyia chianga chi’eseegi chikomekameka. Ⅹ Simioni akayoa omochie endaagera na kwementera ebirwanero biokwerendera. Chinkuma chiaye chigaika chinsinyo chionsi chi’ense. Ⅺ Akarenta omorembe ase ense na omogooko bwa Abaisraeli torenge nekerengo. Ⅻ Bonsi bagaikaransa nomorembe inse yemesabibu nemete yaabo na onde tarengeo okobagosa. ⅩⅢ Tatigarete monto onde ase ense orekobarwania, abarwoti ababisa bonsi bakarimigwa ase engaki eyio. ⅩⅣ Simioni akaba gakobakoonya abataka bonsi ase egesaku kiaye, agatunyana amachiiko na korusia obobe na abasaria bonsi aroro. ⅩⅤ Agachabera Hekalu egatogigwa na akameenta ebibeekerero biogosasiimera. ⅩⅥ Ekaba chinkuma chigasarera goika Rumi na Siparta buna Yonathani okuure na abanto bakaigwa bobe kegima. ⅩⅦ Korende ekero Abasiparta baigwete buna Simioni obeire Omokuani omonene ase ribaga ria momura omwabo, naende buna nigo areenge koraa Yudea na ebichie biaye buya, ⅩⅧ bakariika ase oboyia igoro ase amabati ye etai okobwatana kwabo kwobosani kw’eritang’ani okwo bakorete na Yuda naboigo Yonathani bamura bamwabo na komoirera amariiko ayio. ⅩⅨ Amariiko ayio akaba kagosomwa ase emesangererekano agwo Yerusalemu. ⅩⅩ Eye nekaratasi yeriruube erio riaruete ase Abasiparta: Abanto ba Siparta amo na abagaambi baabo ase Omokuani omonene Simioni, abarai na abakuani bonsi ba Boyahudi, nase abaminto Abayahudi bonsi: Amaiga ayio. ⅩⅪ Abanto mwatotomerete gocha ase abanto baito batomanyirie igoro yogotogigwa nobonene more nabwo. Ogocha kwabo kwabeire omogooko ase tore intwe. ⅩⅫ Twayariikire onsi aria batotebirie ase amarario aito ase abanto bonsi buna ekobwatia: “Numenio mosinto bwa Antioko na Antipateri mosinto o Yasoniabarai bancheire kegima na Abayahudi nigo bachete naende ase tore koroisia okobwatana kwabo kwobosaani naintwe ase oboyia. ⅩⅩⅢ Abanto baito bakagooka, na kobaarigania abatomwa abwo ase amasikani amanene nabo bakabeeka ensemo yamariiko ayio yokobwatana ime ase ebiinyorio bi’egesaku giato erio abanto baito ba Siparta batware ensemo eyio ya amariiko ase okoyegacha. Omokuani omonene Simioni oeirwe egetari gienseemo yamariiko ayio” ⅩⅩⅣ Ayio gaetire, Simioni akamotoma Numenio Rumi erio aire ekeegwa kienguba enene yetaabu ebwate chikiiro 500, erio goikerania okobwatana gati ya Abayahudi na Abaroma. ⅩⅩⅤ Ekero Abayahudi baigwete ayio onsi, bakebooria barabwo abanyene: “Inchera ki inwe toranyaare komoiraneria buya Simioni amo na abana baye? ⅩⅩⅥ Ekiagera ere Simioni, bamura bamwabo neamate yonsi ya ise nigo batenenete bokong’u, bakarwana esegi, bagaseeria ababisa b’Abaisraeli na gotorentera obosibore.” Erio bakariika ekeinyorio igoro yaye ase ebisamunye bi’etai na kobibeeka igoro ase emetobwa ase egetunwa gia Sayoni. ⅩⅩⅦ Eye nenseemo ya aria arigetwe aroro: Ase rituko ria ikomi na gata’nagatato ase omotienyi bwe Eluli, omwaka o 172, engencho yaye ase omwaka o gatato bw’oborwoti bwa Omokuani omonene Simioni, ⅩⅩⅧ ase omosangererekano omonene bwa abakuani, abanto bande, abanene na abagaaka b’ense yonsi, amang’ana akobwatia akararigwa ase tore intwe: ⅩⅩⅨ Kera ebiro esegi yabeire ekorarigwa ase ense yaito, Simioni mosinto o Matathia, Omokuani ase eamate ya Yoaribu amo na abamura bamwabo, nigo beruete koamererania na ababisa b’egesaku giaito ase okorenda Hekalu na amachiiko aito. Ase ogokora okwo, barenteire egesaku giaito esiko enene. ⅩⅩⅩ Yonathani nigo ababwatanetie abanto baito na koba Omokuani omonene ere atarakwa. ⅩⅩⅪ Ekero ababisa ba Abayahudi beruete koyesagaana ense yaito na koyeira Hekalu, ⅩⅩⅫ akabogoria obonene na koyerwanerera ense yaye. Agakorera ekerengo ekenene giechitaabu chiaye bweka omonyene ase okogora ebirwanero na goakana eng’eria ase abasikari b’egesaku kiaye. ⅩⅩⅩⅢ Akayekong’ia emechie ya Yudea na Beth-zuri, omochie ore ase orobebe agwo ase ebirwanero bi’omobisa biabekire nyuma ataracha. Aroro agwo, ere akebeekera ekeombe kiaye kia abasikari. ⅩⅩⅩⅣ Boigo ere agakong’ia engegu ya Yopa, amo nomochie o Gazara oyio obebekaine na Ashidodi oyio ase ababisa bamenyete ere atarabao. Akababeeka Abayahudi ime yomochie o Gazara na kobaa abanto endagera eisaine amagania abo onsi. ⅩⅩⅩⅤ Ekero abanto barooche okwerua gwa Simioni ase ense yaye omonyene, bakamokora ere koba omorai obo naboigo Omokuani omonene. Nigo bakorete ayio onsi ase engencho ya aria ere aikeranetie ase bare boigo ase engencho aorogetie oboronge na nobwegenwa ase egesaku kiaye. Akarigia ase kera enchera kobatenenkia abanto baye. ⅩⅩⅩⅥ Inse yoborai bwaye, abanto bebeisaku bagaserigwa korwa ase ense ya Yudea. Abasikari b’ababisa bagaserigwa korwa ase ense ere sugusu ye Hekalu agwo ase barabwo konye beagaacheire eburi yaabo; abwo nao abasikari abwo barenge korwa ase eburi eyio na goturutumba chinsinyo chie Hekalu. ⅩⅩⅩⅦ Simioni akababeeka Abayahudi baye ime yeburi eyio, akayekong’ia ase oborendi bw’ense agakong’ia boigo oborendi bwa Yerusalemu na komenta obotambe bwechinyasi chio omochie. ⅩⅩⅩⅧ Ase engencho yayio obokuani obonene bwaye, ⅩⅩⅩⅨ akamoa egetari giokorokwa Omosaani bw’Omorwoti’ na komokorera amasikani amanene. ⅩⅬ Nigo Demeturio akorete ayio ase engencho aigwete Abaroma bakobaroka Abayahudi abasani baabo, ababwatani baabo na abamwabo, barabwo boigo bakabaarigania abatomwa ba Simioni ase amasikani. ⅩⅬⅠ Ase igo, Abayahudi na abakuani baabo nigo bagogete buna Simioni nororeeria rwaye nabarai na abakuani abanene baabo goika omobani bw’ekeene arorekane. ⅩⅬⅡ Simioni bono nayerae ense yaabo, nayerigererie Hekalu na kobachoora abanene bakoyerigereria na kobeeka abanto bakoyeraa ense na korenda ebirwanero nechiburi chiaye. ⅩⅬⅢ Goika abanto bamoigwere ase kera ring’ana. Okobwatana gwonsi eserekari eraroisie nigo erariikwe ase erieta riaye, nere nabe oboronge bwokweboyia chianga chi’abarwoti chichabeire netaabu. ⅩⅬⅣ “Takoba omonto ore Omokuani gose onde bwensi orabe noboronge bwerichiiko korusia ekeng’ese kende gionsi kierichiiko eri koonchora gose kogorora richiiko rinde rionsi ria Simioni, korengeria omosangererekano onde bwensi ase ense oyio ere atachiigeti, gose kobeeka chianga chi’oborwoti amo nogochaberwa gwetaabu. ⅩⅬⅤ Onde bwensi oraetanie gose gochaaya ogoetia oko ere naisane koegwa egesusuro.” ⅩⅬⅥ Abanto bagaitabera amang’ana ayio ase ogwancherana ase obomo, bagaitaba komoa Simioni oboronge bwogoikerania amang’ana ayio kobwatekana nogwancherana okwo. ⅩⅬⅦ Simioni agaitaba koyakora na boigo koba Omokuani omonene, omochiki bwe esegi na omonene bwa Abayahudi na abakuani bonsi. ⅩⅬⅧ Ogochika kogaetigwa buna okoraria oko koriikwe ase ebisamunye bia amabaati yetai na kobekwa ase akororekana na bonsi ase omochie bwe Hekalu, ⅩⅬⅨ boigo buna chinsemo echio chiamariiko ayio chibekwe ase ebigachero bie Hekalu, agwo ase Simioni amo na abana baye baraabe bakoyarora.