Ⅰ Simioni akaigwa buna Turifo konye osangereirie riicho rinene riabarwani esegi, erio koyerwania ense ya Yudea na koyesiria. Ⅱ Akarora boigo buna abanto batengechiigwe nobwoba. Erio akageenda Yerusalemu akarangeria egeikaranso, Ⅲ na goteema kobaremia abanto, ogoteeba: “Inwe imomanyete amang’ana amanene inche amo na momura ominto neamate yonsi ya tata twakorire ase engencho ya amachiiko na Hekalu. Boigo, imomanyete igoro ye esegi eyio twakorire na buna twachaandegete. Ⅳ Bamura baminto bonsi baitirwe ase okorwanerera amachiiko, Hekalu negesaku kia Abaisraeli; niche bweka ntigarete. Ⅴ Na bono tindi gochia korigia korwanerera obogima bwane ase chingaki chinde chionsi chi’obokong’u, ase engencho inche tinyeroochi koba omuya kobua abamura abwo baminto. Ⅵ Inche ning’akane egesiomba ase engencho yegesaku kiane, Hekalu, abakungu na abana baino ekiagera ebisaku bionsi biasangererekanire amo ase obobisa erio bitosirie.” Ⅶ Amang’ana ayio akabaremia abanto kegima, Ⅷ nabarabwo bakairaneria ase eriogi rinene: “Aye naye bono omorai oito ase ribaga ria momura omino Yuda na Yonathani. Ⅸ Gendereria esegi yaito, naintwe ng’a tokore kende gionsi keria aye oratoteebie.” Ⅹ Erio Simioni akabasangereria abasikari bonsi agakora bwango gokora chinyasi chia Yerusalemu na gokong’ia oborendi bwaye. Ⅺ Akamotoma Yonathani mosinto bwa Abisalomu kogenda Yopa, ere amo nabarwani esegi abange. Yonathani akabaseria abanto barenge Yopa akayoira omochie oyio. Ⅻ Turifo akaimokia abarwani esegi abange akagenda gosagaana Yudea. Ere nigo amoimogetie Yonathani, momura omwabo Simioni buna omosibwa. ⅩⅢ Simioni nigo abagete ekambi yaye agwo Adida ase arochie omweya. ⅩⅣ Ekero Turifo aigwete buna Simioni obogoirie oborai ase ribaga ria momura omwabo Yonathani, na buna bwebekire ang’e korwana esegi amo nere, akamotomera amang’ana abwatetie: ⅩⅤ Nigo imobeegete momura omino inse yoborendi ekiagera ere taakanete amadeni ase ekegancha kiomorwoti ase chingaki chioborai bwaye. ⅩⅥ Bono intomere chitaabu chikiro 3,000 na abana baye babere babe abooswa erio intwe tokomoigorera ere tabaisa gotioyeria*. Agwo intwe ng’a tomoigorere. ⅩⅦ Ekiagera ere atatagete korenta obobisa ase egati ya Abayahudi, nonya omanyete buna nigo bakomong’aina, agachiika arenterwe chibeesa echio na abana babere ba Yonathani, ⅩⅧ erio magega yaye tibacha goteeba buna: “Onye ndiria Simioni amoete chifeta na abana baria baye babere anga Yonathani tarenge goitwa.” ⅩⅨ Erio Simioni agakora buna Turifo aboretie korende Turifo akabuna chiira chiaye na kogenderera komosiba Yonathani. ⅩⅩ Naende Turifo akagenda motwe ase ogosagaana na koyesamba ense ya Yudea akayeetanana Yudea yonsi goetera enchera ekogenda Adora. Korende Simioni na abarwani esegi baye bakaba bakomotunyana kera ase ere arenge kogenda. ⅩⅪ Ase ebiro ebio bionsi, Abasikari baria ababisa bareenge ime ye eburi ya Yerusalemu bakaba bakobatoma abatomwa baabo komomanyia Turifo achiche bwango ase ogoetera enchera yerooro erio abarentere endaagera. ⅩⅫ Turifo akabaarigania abariini chibaarasi baye bonsi ase engencho yorogendo, korende ase obotuko obwo obokendu bokaba obonge mono goika agasinywa koriina egetunwa. Ere agatenenia orogendo orwo, akagenda bwoye Gileadi. ⅩⅩⅢ Ekero aigete ang’e na Basikama, agachiika Yonathani aitwe; Yonathani agatindekwa aroro agwo. ⅩⅩⅣ Erio Turifo akairana gochia bwoye. ⅩⅩⅤ Simioni akabatoma abanto bagende koywoyia omobere o Yonathani ere akamotindeka momura omwabo agwo Modeini omochie bw’echisokoro chiaye. ⅩⅩⅥ Kera oyomo ase Abaisraeli bonsi akamoreera ase obororo obonene na komokumeria ase amatuko amange. ⅩⅩⅦ Simioni akaagacha omorobiri bwokoinyoria igoro ase chimbeera chia ise na abamura bamwabo. Omorobiri oyio ogatubwa bosio na magega ne rigena riasenirie buya na nigo orenge kororekana korwa are. ⅩⅩⅧ Boigo akaagacha Emerobiri etano na ebere ase engencho ya ise, na ng’ina na abamura bamwabo bane. ⅩⅩⅨ Akaagacha chitinga chiogotenenia emetobwa emetambe emetambe mbarabare ye Emerobiri eyio. Na igoro ye emetobwa eyio akabeeka ebirwanero biechingeencho ao ao, erio bibe ebimanyererio bitasire kare na kare. Mbarabare yebirwanero ebio, akabeeka chimeli chikobaachwa. Abanto bonsi barenge goeta ase enyaancha nabo barenge korora ebimanyererio ebio. ⅩⅩⅩ Embeera eyio Simioni aagachete agwo Modeini nao ere nonya ngoika reero. ⅩⅩⅪ Turifo akamokorera bobe omorwoti oria omosae Antioko o gata’narimo, akamoita, ⅩⅩⅫ na kogamba ase ribaga riaye igo akaba omorwoti o Asia. Omorwoti Turifo akarenta obokong’u obonene aroro agwo. ⅩⅩⅩⅢ Simioni agachiagaacha boyia chiburi chia Yudea agachionchokaneria chinyasi chinkong’u chire ne emetobwa emetambe, ebisieri ne chiboriti. Boigo akabeeka emonga yendagera ime yeburi. ⅩⅩⅩⅣ Akabatoma abatomwa ase omorwoti Demeturio o kabere gosaba ense yaye yaberwe terwa ebaango ase engencho Turifo agendererete kobanyunyunta amanyinga. ⅩⅩⅩⅤ Demeturio akairaneria ase riruube rikobwatia: ⅩⅩⅩⅥ “Omorwoti Demeturio ase Omokuani omonene Simioni, omosaani bw’omorwoti, ase egesaku kia Abayahudi na abarai baye: Amaiga ayio! ⅩⅩⅩⅦ Nanyorire egutwa yetaabu nerito riemokendo mwantomera, nainche nigo nde ang’e kegima gokora nainwe okobwatana kwomorembe na kobateebia abariiki baito be ebaango babaabere inwe timorwa ebaango. ⅩⅩⅩⅧ Ebiteebanio biaito bi’eritang’ani biancheranirwe na chiburi mweagacheire ng’a chibe enibo yaino. ⅩⅩⅩⅨ Nababeire amamocho yogotamboka okobwatana gwakoregete goika etariki ya reero, na inche nababeire ogoakana mogosabwa okwo gotigarete kwe ebaango yengeencho nechibaango chinde chionsi echio chiabeire chigosangererigwa agwo Yerusalemu goika reero. ⅩⅬ Abayahudi bonsi bare ne chimbwa chiganeirie ase obokoreri ase enyomba yomorwoti nabo bakoriikwa. Tiga obeo omorembe ase egati yaito.” ⅩⅬⅠ Ase omwaka o 170, chingatare chi’okobatindachera inse abanto be ebisaku binde chikarusigwa ase Abayahudi. ⅩⅬⅡ Abanto bagachaaka koriika amang’ana nokobwatana kwabo ase amang’ana akobwatia: “Ase omwaka o Simioni bw’eritang’ani, Omokuani omonene, omochiki bw’eseegi na omorai bwa Abayahudi.” ⅩⅬⅢ Ase amatuko ayio, Simioni akabeeka ekambi eragete Gazara, akayoetanana omochie na abarwani baye be esegi. Akaroisia etinga yeseegi, agasukia orobebe goika chinyasi chi’omochie. Erio akayesagaana eyemo ye chiburi chiaye na koyeira. ⅩⅬⅣ Abanto barenge ase etinga eria yeseegi bagacharoka na gosoa ime yomochie na ogokururana okonene gokaba ime ya Gazara. ⅩⅬⅤ Abasacha, abakungu baabo, abana baabo bagatandora chianga chiabo na koriina ase chinyasi chi’omochie. Ase eriogi rinene bakamosorora Simioni achiike omorembe obe, ⅩⅬⅥ bagoteeba: “Otwabere gaki, totokorera buna etogwenerete intwe!” ⅩⅬⅦ Ere Simioni agaitaberana nabarabwo na gochiika esegi etenene. Korende ere akabarusia abamenyi bonsi korwa ime yomochie erio agachichena chinyomba chiabo echio chiabwate emegwekano yogosasiima chinyasae. Simioni na abanto baye bagasoa aroro bagoteera chingero na amateera yogotogia. ⅩⅬⅧ Agasokia kende gionsi kiarenge korenta ogotacheneka ase omochie na kobanchera komenya ime ase omochie oyio abanto baria barenge kobwatia amachiiko boka. ⅩⅬⅨ Abanto barenge ase eburi ya Yerusalemu bono nigo barenge batangire kogenda koonia gose kogora kende gionsi. Enchara enene ekababwata na abange bagakwa ase enchara. Ⅼ Erio bakamosaba Simioni anchere omorembe. Simioni agancherana, akabarusia ime yeburi eyio na koyechena. ⅬⅠ Ase rituko riemerongo ebere nagatato na ase omotienyi o kabere omwaka bwe rigana erimo na merongo eta’nebere noyomo (171), okaba omoyega omonene bwokoiraneria mbuya mono ase omochie o Yerusalemu ekiagera okwoboyia gwokoondokia kwaruusetigwe aroro. Simioni na abanto baye bagasoa ime yeburi eria bakobugia ebinubi, ebita na amakano boigo chitebe bagoteera chingeero chi’ogotogia na koiraneria mbuya mono barabwo babogoretie amato yemekendo. ⅬⅡ Erio Simioni agachiika buna rituko erio ribe rigochengerwa kera omwaka. Agakong’ia oborendi bw’egetunwa na Hekalu, ensemo erigereranetie neburi, akayoroisia omochie o Yerusalemu oboikaro bwaye ere amo na abanto baye. ⅬⅢ Yohana omomura oye bono konye obeire omonto omonene. Erio Simioni akamokora koba Omochiki bw’eseegi ase abarwani esegi baye bonsi, nere Yohana agaetia koba ime yomochie o Gazara.