Ⅰ Ekero Yonathani arooche amang’ana abeire amaya asare, ere agachoora abatomwa erio bagende Rumi kobokia obwanchani na abanto ba Rumi. Ⅱ Ere boigo agatoma amarube abwate amang’ana yokogania okwo goika Siparta ne chinsemo chinde. Ⅲ Abatomwa abwo bakagenda Rumi agwo ase baariganetigwe negeikaranso ekenene kia abagaaka. Bagateeba: Ere Yonathani Omokuani omoneneamo na egesaku gionsi kia Abayahudi batotomire erio tonyaare kobokia oboamate boria bwaito bw’eritang’ani na Abaroma. Ⅳ Abaroma bakabaa amarube yokobamanyekania ase kera omonene ba kera ense erio banyore ogwancherwa kwogoeta na koirana gochia sobo ase obuya. Ⅴ Eri nario riruube Yonathani abariikerete Abasiparta: Ⅵ “Omokuani omonene Yonathani, ase Egeikaranso Ekenene giense, abakuani bonsi, na abanto bonsi ba Yudea, ase abaminto ba Siparta: Amaiga ase more. Ⅶ Ase amatuko a magega, omorwoti oino erio namoriikerete Omokuani oito omonene Onia, komomanyia buna ebisaku ebi biaito mbire noboamate buna riruube eri rimanteranetigwe rikoorokia. Ⅷ Erio Onia akamoarigania omotomwa oria na amasikani amanene na koiraneria riruube riaino koraria maiso marore oboamate nobosaani bore gati yaito. Ⅸ Nabo bono nonya titori noboamate buna obwo, ase engencho chinguru chiaito chikorwa ase amariiko amachenu ayio are ase amaboko aito, Ⅹ bono nigo tokobariikera ase okobokia oboamate bwaito bw’obosani na obomwabo tore nabwo amo nainwe. Titotageti gosaria oboamate bwaito; emiaka nemenge yaetire korwa twanyorete riruube riaino. Ⅺ Intwe nigo tokobainyora kera engaki ekero tobwate ribaga: ase amatuko aito amanene na ayande agwenerete, ase chisadaka na amasabo aito, buna eganeirie abamwabo koinyorana. Ⅻ Boigo nomogooko oito buna inwe mwenyoreire ogkiina. ⅩⅢ Korende intwe twabeire togotwara obokong’u ne emechando boigo chiseegi kera engaki, ase engencho ebisaku bitoetanaine biabeire bigotorwania. ⅩⅣ Ase chingaki echio chi’eseegi intwe titwaganetie kobachaanda inwe gose abande ase abasani baito. ⅩⅤ Ekiagera obokonyi bwaito nigo bokorwa ase Omonene, ere oyionotobuereire ababisa baito na gototooria korwa ase chinchara chiabo. ⅩⅥ Nigo twabachorire Numenio mosinto bwa Antioko na Antipata mosinto o Yasoni, na kobatoma Rumi kogenda kobokia obosani na okobwatana gwaito na Abaroma. ⅩⅦ Boigo twabatomire baike ase more na korenta amaiga aito boigo riruube eri rigokwanera okobokigwa kwoboamate bwaito bw’obomwabo. ⅩⅧ Intwe twasemeirie buna intonyoore amairanerio ase riruube eri.” ⅩⅨ Eri rikobwatia neriruube riaino ritang’ani gochia ase Onia: ⅩⅩ “Omorwoti Ario o Siparta ase Omokuani omonene Onia, amaiga ayio. ⅩⅪ Nigo yarorekanire ase amariiko gete buna intwe Abasiparta amo nainwe Abayahudi ntobwate oboamate, naboigo buna ebisaku biaito bibere na ababiare ba Aburahamu. ⅩⅫ Ase engencho twamanyire ayio, twabasabire komoranche inwe motoe amang’ana aino. ⅩⅩⅢ Naintwe nigo tokobariikera kobamanyia buna intwe ntore ang’e gosanga nainwe chinibo chiaito amo ne chitugo chiaito ekero nainwe morakore boigo. Twabachiikire abatomwa baito babamanyie amange kobua ase amang’ana ayio.” ⅩⅩⅣ Erio Yonathani akanyoora amang’ana buna abanene ba Demeturio konye bachire naende bare na abarwani esegi abange ase ogocha komorwania. ⅩⅩⅤ Yonathani tatagete kobaa ribaga koyesoanana ense yaye. Ere akarwa Yerusalemu akageenda korwana na barabwo ase ensemo ya Hamathi. ⅩⅩⅥ Agatoma chiroti ime ase ekambi yababisa, chirochio chikairana na komoteebia buna ababisa nigo babwate omoroberio bw’okobaachera Abayahudi ase obotuko. ⅩⅩⅦ Ekero erioba riagwa, Yonathani akabachiika abasikari baye bonsi kwebeeka ang’e, nebirwanero bire koboko, ase esegi ende yonsi eratuboke mosiabano ase obotuko. Boigo akabeeka abasikari barende chinsinyo chionsi chiekambi. ⅩⅩⅧ Ekero ababisa baigwete buna Yonathani na abanto baye bebekire ang’e ase esegi, bagasogwa nobwoba obonene, bagatama na gotiga emerero kegwoka ime yekambi. ⅩⅩⅨ Yonathani amo na abanto baye bakarora emerero eyio ime yekambi korende barabwo tibamanya aria agendererete goika bogakia mambia. ⅩⅩⅩ Erio Yonathani agasoka kobwatia ababisa. Korende tanyara kobaikeera ekiagera baigete kwamboka orooche rwa Eleuthero. ⅩⅩⅪ Ekaba Yonathani agekiora akabwatia enchera ye ensemo na kobarwania Abazabadea, ekemo kiebisaku bia Abaarabu. Akababua na gosakora chinibo chiabo. ⅩⅩⅫ Erio akarwa agwo akageenda goika Damesiki, ase okwemanyia ensemo eyio yonsi. ⅩⅩⅩⅢ Simioni nere agasooka agaeta ase ense eria akagenda motwe goika Asikeloni ne chiburi chietanaineo. Naende agekiora akagenda Yopa, akayoira omochie oyio mosiabano, ⅩⅩⅩⅣ ekiagera aigwete buna abamenyi be ensemo eyio mbarenge ang’e kobatigera abasikari batometwe na Demeturio eburi ya Yopa. Simioni akabeeka ekeombe kia abasikari koyerenda eburi eyio. ⅩⅩⅩⅤ Ekero Yonathani airanete akarangeria egeikaranso kia abagaaka ba abanto koroberia gochia koagaacha emechie ase Yudea, ⅩⅩⅩⅥ komenta obotambe bwechinyasi chia Yerusalemu na koagaacha enyasi entambe gati yeburi nomochie, erio gwatanana eburi eyio erio ababisa tibanyaara koonia gose kogora kende gionsi. ⅩⅩⅩⅦ Abanto bagakora emeremo amo ase ogokong’ia enyasi yomochie, ase engencho ensemo yenyasi ya moocha konye yagure; akayeriosia boigo ensemo yarenge korokwa Kefenatha. ⅩⅩⅩⅧ Simioni nere akaywagaacha boyia omochie bwa Adida ase eraaro ya Shefela, akayokong’ia na koyobeekera ebisieri nechiboriti. ⅩⅩⅩⅨ Magega yayio, turifo akaroisia chinchera chi’okomiyeria Antioko erio ere abe omorwoti o Asia. ⅩⅬ Nonye nabo, akoboa buna Yonathani tarenge gochia gwancherana nere kobwatekana nomoroberio oyio, boigo buna ere nabo arenge gochaakia esegi erio gotanga ring’ana erio. Igo Turifo akaba okomorigia amobwate na komoita; erio ere agasoka akagenda Beth-sheani. ⅩⅬⅠ Korende Yonathani agasoka na kogenda komorwania agwo Beth-sheani ore na absikari bachooretwe 40,000. ⅩⅬⅡ Ekero Turifo arooche obonge bwa abarwani esegi ba Yonathani, akoboa gchaaka obochege. ⅩⅬⅢ Erio akamoarigania Yonathani ase amasikani onsi, akamomanyekania ase abaseemia baye bonsi, akamoa ebiegwa na kobachiika abaseemia baye na abasikari baye bamoigwere Yonathani buna barabwo barenge komoigwera ere omonyene. ⅩⅬⅣ Erio akamobooria Yonathani: “Ninki gekogera kwabachaandete abasikari aba abange iga naye nomanyete buna intwe titobwati esegi ase egati yaito? ⅩⅬⅤ Ninki keragere aye tobairania gochia inka? Aye chora abanto bake batigare amo naye erio aye onkobe inche gochia Tolemai. Ekero ndakoe omochie oyio o Tolemai, amo nechiburi chinde, na abasikari, na abanene baabo bonsi. Erio inche ningende inka k’obwane. Ekio nakio kiandetete aiga.” ⅩⅬⅥ Yonathani akamwegena. Erio ere akabatoma gochia inka abarwani baye be esegi gochia Yudea. ⅩⅬⅦ Agetigareria abanto 3,000; 2,000 akabatiga agwo Galili na 1,000 boka bagatigara nere. ⅩⅬⅧ Korende buna Yonathani achia gosoa Tolemai, abamenyi ba aroro bagasieka ebiita bi’omochie bakamobwata ere na goita bonsi baria atigarete nabarabwo. ⅩⅬⅨ Erio Turifo akaimokia ebiombe bia abasikari baye bagochiera amagoro na baria bakoriina chibarasi goika Galili na ase rikura ria Yesireeli gochia kobaita abasikari baria ba Yonathani batigarete. Ⅼ Ase amanyinga abo, abasikari baria ba Yonathani bakamanya buna Yonathani amo na abasikari abwo atigarete nabwo babwatirwe na goitwa. Bakabeekana chinguru na kweroberia ase esegi. ⅬⅠ Ekero abarwani aasikari ba Yonathani berobeirie gokora esegi ase okoranerera obogima bwabo, bakairana magega. ⅬⅡ Erio abasikari baria Abayahudi bakairana Yudea bare buya, korende bare nobwoba. Egesaku ekegima gekarusia egekuuro ekenene giokomoreera Yonathani amo na ababwatani baye. ⅬⅢ Naboigo ebesaku biabebekaine bono bigachaaka goteema kobasiria Abayahudi. Barabwo nigo bakagete buna Abayahudi tibari na morai onde gose omokoonyi oye naende. Bagateeba: “Bono tiga inwe tobaite na gosiria okoinyorwa kwabo korwa ase oboiko bw’ense.”