Ⅴ
Esiteri okoarigania omorwoti na Hamani ase omoyega
Ⅰa Ase rituko ria gatato Esiteri gakoorire gosaba, akabeeka chianga chiaye chi’obokanyeku, erio akaboyia chianga chioboting’ana. Buna akomekameka igo akarorekana, akarangeria Nyansae, oyio orendete abanto baye na okobatooria. Akaira abaiseke abarendi baye bagachia koganya amo n’ere. Esiteri ore n’etukia enterere mono, akeegemera oyomo obo, n’oria onde akamobwatesia kobogoria engoba yaye.
Ⅰb Oichire n’okomekameka n’obuya bw’ekieni kiaye, obosio bwaye bokamesia omogoko amo n’obwanchani. Korende enkoro yaye ekagongera n’obwoba.
Ⅰc Ekero konya aetire korwa kera egesieri gochia ekende, akenyora oteneine bosio bw’Omorwoti. Omorwoti oyio nigo aikakansete bweboyetie n’echiaanga chiaye chi’obonene, okomekameka buna amagena ya amaabera amo n’amagana aande y’engencho - akarorekana ore oyobwogokumia keegima.
Ⅰd Akarigereria igoro, agaichorwa n’echinguru chi’omorero, ore n’endamwamu egwoka. Enting’ana eria ekagwa k’egiregete inse, erangi y’ekieni keria egasira korwa obosio bwaye, n’omotwe oye okagwera omoiseke oria onde orenge ensemo oganyererete.
Ⅰe Korende Nyasae agaonchora enkoro y’omorwoti oria ekaba n’oboitongo gochia ase are. Erio omorwoti akaimoka korwa ase ekerogo kiaye kiobogambi ogoaka eriogi, erinde akamobogoria ase amaboko aye okona komweebereria n’amang’ana amororo igo goika akaba buya.
Ⅰf Akamoboria: “Esiteri ninki ekebe?” Inche n’oyomino, rema. Tori gokwa, ogochika gwaito nigo kore ase abanto baande abake - abbake niinchuo asende.
Ⅱa Akaimokia enyimbo yaye y’obogambi eyio yaroisirie n’amagena ya maabera agatorera Esiteri ase ebigoti biaye, akamoagata okomoteebia: kwana naiche, Esiteri akamoteebia “Inyiborie!” nigo okororekana buna oyomo bw’Abamalaika ba Nyasae. Enkoro yane nigo yaichorwa, n’omoichano bw’echinguru chiao. Nigo ore oyo bw’okororekana kw’ogokumia. Nyasae one Omobui, enkoro yao nigo eichire n’obuya.
Ⅱb Korende ekero Esiteri agendererete gokwana amang’ana aya, akagwa inse akagireka. Omorwoti akabwatwa n’amaabera nakogania komotooria. Ekero omorwoti aroche Esiteri enting’ana oteneine ase egoora, Esiteri akanyora ogwancherwa asare. Omorwoti akamworotera enyimbo yaye y’oborwoti eroisirie korwa ase etaabu, arenge nero koboko. Erio Esiteri akagenda gochia ang’e, agakuna mesia y’enyimbo eria.
Ⅲ Na omorwoti akamobooria: “Eting’ana Esiteri, ninki origetie? Inteebia eki oganetie; aye n’okeegwe, nakeba nonya nekeng’ese ki’oborwoti bwane.”
Ⅳ Esiteri akairaneria, “Koranche omorwoti, ochiche mwane reero, aye amo na Hamani, ase endagera nakoroiseirie aye omorwoti.”
Ⅴ Omorwoti akarwa ogochika Hamani aretwe ase obwango, erinde banyare gokora aya Esiteri aganetie. Agwo omorwoti na Hamani bakagenda ase endagera eria Esiteri aroisetie.
Ⅵ Ekero baare konywa edivai, omorwoti akaboria Esiteri, “Ninki origetie? Ekio nokeegwe. Ninki oganetie? Nakeba nonya nekeng’ese ki’oborwoti bwane, nokeegwe.”
Ⅶ Esiteri akairaneria, “Ogosaba kwane na okogania kwane noko:
Ⅷ Onye nanyorire ogwancherwa ase obosio bwao, aye omorwoti, koranche aye amo na Hamani, ankio naende moche mobe abageni baane ase endagera ndache mbaroiserie. Ase ekero ekio nario ndache ngoteebie eki nganetie.”
Ⅸ Ase rituko riria Hamani akarua ase endagera eria, ore nomogooko na omosasoko. Korende ekero aroche Modekai ase egeita ki’enyomba y’omorwoti, na Modekai taimogete atenene amworokie amasikani, agaichorwa nekeririanda asare.
Ⅹ Korende agetanga ase okoremereria, akagenda inka bwoye. Erio akarangeria abasani baye, na Seresi mokaye, bache mwaye.
Ⅺ Hamani agetogia ase bare, agakwana igoro y’obonge bw’obotenenku bwaye, na igoro y’abana baye abange, naende igoro y’obonene bwonsi omorwoti konya amoeire, na buna amokinetie kobua abagaambi bonsi, na abasoomba bonsi b’omorwoti.
Ⅻ Naende Hamani akabora, “Esiteri enting’ana, moka omorwoti, naroisia endagera, tarangeretie onde otatiga inche bweka amo nomorwoti. Nonya ng’ankio nagatorangeretie, inche amo nomorwoti.
ⅩⅢ Korende amang’ana ayio onsi tabwati engencho ase inde ekero nkorora Modekai, Omoyahudi oria, oikaransete ase egeita ki’omorwoti.”
ⅩⅣ Erio Seresi mokaye, na abasani baye bonsi bakamosemia iga, “Tiga orobambo rore nobotambe bw’amaboko emerongo etano rosimisigwe, erio ankio mambia oborie omorwoti ng’a Modekai atongwe igoro ase orobambo orwo, erinde ogende ase omoyega kore nomogooko.”
Ring’ana erio rikagokia Hamani; ere agasimisia orobambo orwo.