Ⅳ
Modekai okoboria obokonyi korwa ase Esiteri
Ⅰ Ekero Modekai atebeetigwe amang’ana onsi akorirwe, agatandora chianga chiaye, akeboyia chigunia na kweaka ribu, akagenda ase egati y’omochie okorera neriogi rinene, ore nobororo obonge,
Ⅱ agaika ase egeita ki’omorwoti. Tasoete, ekiagera monto onde tarenge gwancherwa asoe ase egeita ekio obegete chigunia.
Ⅲ Ase ande onsi ase amang’ana y’ogochika koria kw’omorwoti konya ararigwe, Abayahudi bakaba nekerero ekenene mono; bakaba bakweng’ata, bakorera na kobokia amagombo. Abange babo bakaba beboyetie chigunia na beagete ribu.
Ⅳ Ekero abaiseke abasoomba b’Esiteri na abakoreri b’enyomba yaye bamotebeetie amang’ana igoro ya Modekai, eke agendererete gokora, Esiteri agaichana akaba n’obororo obonge; agatomera Modekai chianga ng’a arusie chigunia abeeke chianga chiria, korende ere agachianga.
Ⅴ Erio Esiteri akarangeria Hataki, oyo omorwoti achorete koba omokoreri bw’Esiteri, akamotoma agende ase Modekai amoborerie engencho y’amang’ana ayio, naende ninki kiagerire achandegete igo.
Ⅵ Hataki akagenda ase Modekai agwo ase eraaro y’omochie, bosio bw’egeita ki’enyomba y’omorwoti.
Ⅶ Modekai akamoteebia amang’ana onsi amonyorete; boigo akamoteebia omobaro bwe chitaabu Hamani arire eira kobeeka ase ekungo y’omorwoti, ng’a Abayahudi bonsi baitwe basirigwe kegima.
Ⅷ Boigo Modekai akaa Hataki riruube ririikire amang’ana ’ogochika koria kwaruetwe Susa igoro y’ogosirigwa kw’Abayahudi, erinde orokie Esiteri na amoteebie amang’ana onsi, boigo amoteebie ng’a agende ase omorwoti komosorora na komosaba amaabera ase abanto baye.
Ⅷa Inyora ase kwaruete, ere akamoteebia ekero kware koragera korwa ase okoboko kwane. Ase engencho Hamani oyio ore oyokabere ase okogamba orobeirie goetera ase omogambi erio tobekwe ase ogokwa,
Ⅷb Saba Omonene erio okwane n’omorwoti ase engencho yaito na ototorie korwa ase amakweri!
Ⅸ Hataki akagenda, agateebia Esiteri amang’ana onsi Modekai atebeete.
Ⅹ Esiteri agakwana na Hataki, akamoteebia airane ase Modekai, amoteebie,
Ⅺ “Omonto onde bwensi, abe omosacha gose omokungu, oragende ase omorwoti ase egoora ime atarangeiri, goika aitwe akwe. Okwo n’ogochika. Abasomba bonsi b’omorwoti na abanto bonsi be chingongo chi’oborwoti mbamanyete amang’ana ayio. Enchera n’eyemo yoka y’ogotooreka: eraarente omorwoti abe okomoragera n’enyimbo yaye y’oborwoti eroisirie korwa ase etaabu, ebe ekemanyererio ng’a rirorio natigwe abe moyo. Korende bono tindarangerigwa kogenda ase omorwoti ase engaki y’omotienyi oyomo.”
Ⅻ Ekero Modekai atebetigwe amang’ana y’Esiteri,
ⅩⅢ akamotomera abanto nokoiraneria oko: “Tokaga ng’a ekiagera ore ase enyomba y’omorwoti aye notooreke kobua Abayahudi bande.
ⅩⅣ Naki onye aye kogokira‐kiri kegima ase engaki eye, ogokonywa na ogotooreka nigo korache ase Abayahudi korwa ensemo ende, korende aye na abanto b’enyomba ya iso mosirigwe. Ande, ning’o omanyete gose nase engencho y’engaki buna eye kwabeire enting’ana y’omorwoti?”
ⅩⅤ Naende Esiteri agatoma okoiraneria oko gochia ase Modekai ogoteeba:
ⅩⅥ “Genda osangererie Abayahudi bonsi bare aa Susa, erio mweng’ate ase engencho yane. Timoria gose konywa ase amatuko atato, omobaso na obotuko. Inche amo nabasoomba baane abaiseke ntweng’ate boigo. Nyuma y’ayio ningende ase omorwoti mamincha y’amachiiko; onye ngochia gosirigwa, insirigwe.”
ⅩⅦ Erio Modakai akagenda agakora buna Esiteri amochigete.
Ogosaba kwa Modekai
ⅩⅦa Erio Modekai akagenda na goikerania ogochika gw’Esiteri.
Ase okweinyoria emeremo emenene omomene akorete ere akagenda, agakora onsi buna Esiteri amochiigete.
ⅩⅦb Omenene, Omonene, Omonguru Omworoti
kera ring’ana nigo rire inse y’okobua kwao,
naende onde taiyo oranyare gotenena ase obosio bwao
ase okwerwa kwao ase ogotooria Israeli.
ⅩⅦc Naye gwakorire igoro na ense
na ebikone bionsi bire inse y’erioba
naye omonene bw’ense,
na onde tari orakoamererie, aye omonene
ⅩⅦd nigo omanyete amang’ana onsi
nomanyete, aye omonyene
nonya n’obwerori, ogwesika gose ogwetakooria,
gokambetereria gokora onsi ayio nakorete
nkanga korambereria inse ase ogosasiima
ase obosio bw’omerori Hamani
nabo narenge konyara konyunyunta ebisanyi biamagoro aye n’omogooko
ekero narenge koba nobomaene ase oborendi bw’Abaisraeli.
ⅩⅦe Korende keria inche nakorire, nagekorire
kobua kobeka obonene bwa mwanyabaanto
bosio bw’obonene bwa Nyasae Omobui;
tingomotung’amera onde bwensi
otatiga asore aye bweka omonene
ase ogokora boigo, tinkonyara gokora obwerori.
ⅩⅦf Ase igo, aye Nyasae Omonene, Omobui
omorwoti, Omonene o Aburaamu
abera abanto bao!
Ogotagorwa gwaito ’nkoroberiigwa kore,
yabekirwe emeroberio y’ogosaria oboererania bwa amang’ana ao y’echisokoro,
ⅩⅦg tobaisa koombia omwana oo
oyio gwatooretie korwa Misiri erinde obe oyoo,
ⅩⅦh igwa okogombereria kwane
bwabere oboererania bwa amang’ana ao
oonchore okweumia gwaito kobe omochengo,
erio tomenye, Nyasae Omobui, toterere erieta riao
tokiria ebikoba biaito,
erio biria bia abakogotogia basire.
ⅩⅦi Naende Abaisraeli bakarera n’ehinguru chiabo chionsi, ekiagera amakweri abatogoreretie amaiso.
Ogosaba kwa Esiteri
ⅩⅦk Enting’ana Esiteri naende akebisa ase Omonene korwa ase obwoba bw’ogokwa okobe okwo kwamotang’aneire. Erio enting’ana Esiteri akeaboria emiambaro eria y’ogokumia, na kobeka emiambaro y’amagombo. Riika riokweyaka amanukato agotiokera igoro, agatuba omotwe oye n’eriibu n’esike y’eng’ombe. Akaonchora mobere oye ase ogwesusura, akaonchora ogwesoka kwaye kwa botaambe kw’omogooko n’ekieni bono gokaba n’eubi eyio yamorenterete ogwechanda gwasansorete etukia yaye. Enting’ana ekarera ase Omenene Nyasae bw’Abaisraeli ase amang’ana aya akobwatia:
ⅩⅦl Aye Nyasae Omonene one, omorwoti oito, aye omomoima
inchwo onkoonye, ekiagera inde inche bweka,
naende inche tindi na mokonyi onde goetania aye,
naende nigo inde ang’e gweita inche omonyene.
ⅩⅦm Inche nigo norokereretigwe korwa obwana bwane,
ase egekuba kienyomba yaito
eyio aye Nyasae Omobui gwachorete
Israeli korwa ase ebisaku bionsi
naboigo chisokoro chiaito korwa ase egati ya bonsi,
babe omwando oo kare na kare
naende kwabakoreire buna kwabarierete chiira.
ⅩⅦn Korende intwe twakorire ebibe mamincha yao,
naboigo gwatoereirie gochia ase ababisa baito
erio korwa esiko gochia ase chinyasae chiabo,
Nyasae Omobui, aye n’omoronge ore.
ⅩⅦo Korende barabwo tibaisanegeti
ase obororo bw’obosomba bwaito;
batianire gochia ase emegwekano yaabo
gosiria ogochika koria ebikoba biao aye omonyene biatorete
batiinyie amorokererio ao
bakirie emenwa ya baria bakogotogia
barimie egesasiimero kiao n’obonene bw’enyomba yao
ⅩⅦp ase ribaga riaye baigore emenwa y’abanto bense
baterere ogotogigwa ase emegwekano etaisaini gento
naboigo batung’amere omorwoti obwate omobere bwechinyama.
ⅩⅦq Omonene, tobaisa gotiga enyimbo yao
ase amang’ana ataiyo
Totiga ogosarigwa kobe ogosekerererwa
Onchora emeroberio ebe mamincha ya baria bayeroberetie
na bakore barabwo babe ekemanyererio
ase omonto oria okoroberia amabe igoro yaito
ⅩⅦr inyora, aye Nyasae Omobui, eorokie
ase engaki y’emechando yaito.
Korende inche, ong’e oboremu
Omorwoti bw’echinyasae na Omonene bw’obobui bwonsi!
ⅩⅦs Mbekere amang’ana y’okoebereria ime ase ebikoba biane
ekero nkorigererania n’endo;
oonchore ekeririanda kiaye gochia ase omobisa oito
erio aikere ogosirigwa kwaye
naboigo bonsi banga ere!
ⅩⅦt Korende ase tore intwe, ototoorie n’okoboko kwao
boigo onkoonye, ekiagera inde inche bweka
naende tindi nonde otatiga aye bweka, Nyasae Omobui.
ⅩⅦu Aye nore nobomanyi ase ebinto bionsi,
boigo nomanyete inche nigo ngechete esiko korwa ase abanto bategeneti Nyasae,
naende nigo ’nchaayete oborere bwa abanto bataarogeti,
bw’omorwa isiko onde bwensi.
ⅩⅦw Aye nomanyete ng’a nigo nde n’ebitango ebinge,
naende nigo nchaayete ebimanyererio bi’obonene bwane,
na tindi gokieboyia buna ebietubo bi’ebioge biane ekero nkoorokera omosangererekano,
nigo ngechaayete buna richanchabe rigotioka,
naende tindi koyieboyia ase amatuko ane y’ogotimoka.
ⅩⅦx Omosomba oo tana koragera ase emesa eyemo na Hamani,
gose kogokera emeyega y’abanene
gose konywa chidivai chiogotwera inse.
ⅩⅦy Gose omosomba oo tana kwegokia
korwa rituko riria aetwe obonene goika rero,
otatiga ase ore, aye Nyasae Omobui, Nyasae o Aburaamu.
ⅩⅦz Aye Nyasae, oria obwate chinguru chibuete bonsi,
tegerera eriogi ria abatari na nguru,
totoorie korwa ase amaboko y’abakori amabe,
’nsibore korwa ase obwoba bwane!