Ⅲ
Ⅰ Ase engaki enkeigo, amang’ana ayio, omorwoti Ahaswero agakiinia Hamani, mosinto bwa Hamedata Omoagagi, akamoa obonene kobua abanene bande bonsi abarenge amo nere.
Ⅱ Omorwoti akarua ogochika ng’a abasoomba baye bonsi barenge kobeera ase egeita kiaye batung’ame bosio bwa Hamani ase okomosasiima. Bonsi bagakora bo, korende Modekai ere akanga gokora bo.
Ⅲ Erio abasoomba bande b’omorwoti abarenge kobeera agwo ase egeita bakabooria Modekai, Inee! “Nase ki kwangire koigwera ogochika kw’omorwoti?”
Ⅳ Bakaba bagokwana nere rituko ase rituko ng’a aigwere ogochika koria, korende tabeete ogotegerera amang’ana abo. Ere abateebia “inche n’Omoyahudi naende tingotung’amera Hamani”. Ase ayio abasoomba baria bagateebia Hamani, erinde barore gose amang’ana a Modekai nancherwe.
Ⅴ Hamani akaba nendamwamu enene mono ekero aroche ng’a Modekai tarenge gotung’ama ase okomosasiima,
Ⅵ na ekero amanyete ng’a Modekai n’Omoyahudi orenge, akarora ng’a tari Modekai bweka arae egesusuro, korende ere akaria eira goita Abayahudi bonsi abarenge ase oborwoti bw’Ahaswero.
III: ABAYAHUDI BAGOSOA ASE EMECHANDO
Ogochika gokorwegwa ase ogoita na gosiria Abayahudi
Ⅶ Ase omwaka o ikomi na kabere bw’okogamba kw’omorwoti Ahaswero, omotienyi bw’eritang’ani okorokwa Nisani, Hamani akarwa ogochika obomera bogaakwa obwo bware korokwa Puri, erio banyore rituko na omotienyi arenge gocha goikerania ebirengererio biaye biogoita Abayahudi, erio bagaikera rituko ria ikomi na gatato r’omotienyi o ikomi na kabere okorokwa Adari.
Ⅷ Erio Hamani agateebia omorwoti Ahaswero, “Mbare aa abanto b’egesaku gete besiarerete, bamenyete ase egati y’abanto be chingongo chionsi chi’oborwoti bwao. Amachiiko y’abanto abwo nigo are n’ogwatananeka korwa ase amachiiko y’abanto bande. Barabwo tibari korenda amachiiko ao, aye omorwoti. Ase ayio, aye omorwoti, okoremereria koba n’abanto aba tigokorenta bitoki binde ebiya asore.
Ⅸ Aye omorwoti, amang’ana aya karakogwenere, karue ogochika ng’a abanto aba baitwe basirigwe kegima. Kerakogookie aye gokora ogochika okwo, inche nindete chifeta chitalanta chilifu ikomi (10,000) ne chifeta echio nigo chirabeekwe ase ekungo yao, aye omorwoti.”
Ⅹ Erio omorwoti akarusia ebonyi yarenge ase ekiara kiaye gi’okoboko, yabwate ekemanyererio kiaye, akayea omobisa oria bw’Abayahudi, Hamani, mosinto bwa Hamedata, Omoagagi,
Ⅺ Omorwoti agateebia Hamani, “Chibesa echio gwachieirwe, na abanto kwabaeirwe, okore ande onsi orarore akogwenerete.”
Ⅻ Ase ayio, ase rituko ria ikomi na gatato, ri’omotienyi bw’eritang’ani, Hamani akarangeria abariiki b’omorwoti erio akabateebia, bariike amang’ana y’ogochika koria omorwoti aruete bayaonchore ase kera omonwa na kera engencho yokoriika ase oborwoti bwonsi erio bayatome gochia ase abagaambi abanene b’oborwoti, na ase abagabana, na ase abanene b’abaanto be chingongo chionsi ase oborwoti bwaye. Amang’ana ayio nigo arigetwe akabeekwa erieta ri’omorwoti Ahaswero amo nekemanyererio ki’ebonyi eria yaye.
ⅩⅢ Amarube aria akaegwa abanto abaango bakayaminyokia gochia ase chingongo chionsi chiare ase oborwoti boria. Nigo arenge goteeba ng’a ase rituko erimo rioka, rituko ria ikomi na gatato ri’omotienyi o ikomi na kabere, noro Adari, Abayahudi bonsi, abanto abake na abagotu, abakungu na abana, baitwe tibarorerwa mabeera basirigwe kegima, na ebinto biabo bisakorwe.
ⅩⅢa Amang’ana y’amaruube ayio achikirwe nigo abegetwe maiso marore buna ekobwatia: Korwa ase omorwoti Ahaswero gochia abagabana be chingongo 127 gochakera India goika Ethiopia, na gochia ase abakonyi babo abarai b’emechie:
ⅩⅢb Ase engencho inde n’okobua gw’okogambera ense yonsi, nanachire buna inche tinkogamba ase chinguru, korende ningambe n’obotoereru na koa abanto bane obosibore na obogima obwororo na korenta omorembe oyio abanto bonsi baganetie.
ⅩⅢc Goetera ase ogosemania amo n’abasemia baito buna toranyare goikerania aya onsi, twamanyigwe n’oyomo ase erieta Hamani oyio ore oyobwamasikani na bweruete gokora emeremo ase omokia na ase obwegenwa,
ⅩⅢd ng’a omoochogano nore bw’abanto ase ense yonsi abwo babwate ebirengererio bitari biya abwo bakoamereria kende gionsi na batari koigwera amachiiko ayio are oo ase engencho yaito ntwensi.
ⅩⅢe Ase engencho abanto aba bare mamincha ya kera egento na nigo babwate emeroberio yabo y’ogoochogania omorembe:
ⅩⅢf Nigo tokogochika ng’a abanto abwo bonsi bakwanirwe ase riruube eri erio riarigetwe na Hamani oyio ochorotwe erio korenda amaganio aito ayio naende ore tata oito okabere baitwe bonsi basirigwe nonya n’abakuungu n’abana baitwe n’omoro bw’ababisa babo batari kororerwa mabera ase rituko ria ikomi na kane ase omotienyi oikomi na kabere Adar ase omwaka oyio,
ⅩⅢg ekero abanto aba bonsi basirigwe erio nario toranyare gotwara omorembe n’oboitongo ase ense yaito.
ⅩⅣ Amarube aya airwe n’embeo ase okogamba kwane ase chingongo chionsi ase obogambi boria koraareria abanto bonsi bebeeke ang’e goika rituko riria riike.
ⅩⅤ Ase Ogochika koria kw’omorwoti amang’ana ayio akabeekwa maiso marore ase eburi ya Susa, gokabetereria abanto baria abaango bakaminyoka gochia ase chingongo chionsi. Erio omorwoti na Hamani bagaikaransa konywa, korende omochie o Susa okaba nogoichana.