Ⅱ
Ⅰ Nyuma y’amang’ana ayio, ekero endamwamu y’omorwoti Ahaswero yakanyekire, akaba okoinyora igoro ya Vasti, buna akorete, naende buna ogochika kwaruetwe igoro yaye.
Ⅱ Erio abasoomba abarenge gokorera omorwoti bakamoteebia: “Tiga abaiseke abekungi abanyakieni barigigwe barentwe asore, aye omorwoti.
Ⅲ Aye omorwoti, chora abateneneri ase chingongo chionsi chi’obogambi bwao obachiike basangererie abaiseke abekungi abare abanyakieni, babarente ase enyomba y’abakuungu ere agwo ase eburi ya Susa. Barabwo babekwe inse y’oborendi bwa Hegai, omokoreri oria ogombaetigwe, oyio otenenerete abakungu bamenyete ase enyomba yao. Abaiseke abwo baegwe amaguta abo bakweaka.
Ⅳ Omoiseke oria orakogokie aye omorwoti, otige abe enting’ana ribaga ria Vasti.”
Ogosemia okwo gokagwenera omorwoti, ere agakora buna asemetigwe.
Ⅴ Agwo ase eburi ya Susa, narengeo Omoyahudi oyomo ore korokwa Modekai, mosinto o Yairi, o Simei, o Kisi, bw’ororeria rwa Benjamini.
Ⅵ Modekai oyo nigo arenge oyomo bwa baria bairetwe ase obosomba chingaki chiria omorwoti Yekonia, omorwoti bw’Abayuda, abwo Nebukadinesaro, omorwoti o Babiloni airete ase obosomba amo nabaanto bande.
Ⅶ Modekai narerete omoiseke oyomo, omwana o isemoke. Omoiseke oyio nigo arenge korokwa Adasa, na erieta rinde n’Esiteri. Nigo abwate omobere omuya, naende nigo arenge omonyakieni mono. Ekero abaibori baye bonsi bakwete ere agatigara bweka, Modekai akaba akamorera buna omwana oye.
Ⅷ Ekero ogochika koria okoyia kw’omorwoti kwararetigwe, na abaiseke basangereretigwe agwo ase eburi ya Susa, bakabeekwa inse y’oborendi bwa Hegai, oyorenge omorendi bw’abakuungu ase enyomba y’omorwoti; Esiteri nigo arenge oyomo obo.
Ⅸ Omoiseke oria akagokia Hegai mono, akanyora ogwancherwa nere. Ase obwango obwo Hegai akamoa amaguta akweaka erinde arorekane ore omonyakieni, na akamoa endagera yamogwenerete. Boigo akaa Esiteri abaiseke batano na babere abachoretwe asare korwa ase enyomba y’omorwoti bakaba bakomokorera. Hegai akaira Esiteri amo nabakoreri baria baye bamenye aase aagiya mono ase enyomba eria y’abakuungu.
Ⅹ Bono Esiteri konya taremanyekania ekiagera konya Modekai omosemirie, omokanirie ng’a tabaisa kwemanyekania ase abanto b’ense eria amenyete ng’a ngesaku ki are, gose noyo bw’enyomba ki.
Ⅺ Kera rituko Modekai nigo abeete okona‐gotaara ase eraaro, bosio bw’enyomba y’abakuungu baria, erinde amanye buna Esiteri agendererete komenya agwo, na igoro y’obogima bwaye.
Ⅻ Kera oyomo ase abaiseke abwo nigo abeete okweroisia omobere oye ase engaki y’emetienyi ikomi n’ebere. Ase engaki y’emetienyi etano nomo emetang’ani nigo baare koba bakweaka amaguta a manemane, na emetienyi etano nomo ende babe bakweaka amaguta ande agotioka buya ase okweroisia emebere yabo. Erio ekero engaki yaigete; kera omoiseke, oyomo oyomo, akaba okorentwa ase omorwoti Ahaswero.
ⅩⅢ Ekero kera omoiseke arenge gochia ase obosio bw’omorwoti, nigo arenge koegwa korwa ase enyomba y’abaiseke baria egento kende gionsi arenge kogania koira.
ⅩⅣ Kera omoiseke nigo arenge kogenda ase omorwoti chingaki chia mogoroba, erio ase rituko rikobwatia ekero bwakiire oirana gochia ase enyomba ende y’abakuungu inse y’oborendi bwa Saasigasi, oyorenge omoteneneri bw’abakuungu ba sere‐sere b’omorwoti. Tarenge koirana gochia ase omorwoti eria kabere, otatiga onye omorwoti ogogetigwe nere, naende amorangerie ase ogwatora erieta riaye.
ⅩⅤ Korende ekero engaki y’okogenda ase omorwoti yaigete ase Esiteri, oyio orenge omoiseke bw’Abihaili, ise moke Modekai, oyio omorerete buna omwana oye, taboretie gento kende akoira otatiga ebi Hegai, omosomba bw’omorwoti, oria otenererete abaiseke baria, amosemetie. Bono Esiteri nigo agogetie abanto bonsi baare komoorora.
ⅩⅥ Ase ayio, omwaka o gatano na kabere bw’okogamba kw’omorwoti Ahaswero, omotienyi o ikomi okorokwa Tebeti, Esiteri akarentwa ase omorwoti, agwo ase enyomba yaye y’oborwoti.
ⅩⅦ Omorwoti akaba ogwancha Esiteri kobua abakungu bande bonsi. Esiteri akamogwenera akanyora obuya n’ogwancherwa ase omorwoti kobua abaiseke bande bonsi abekungi. Omorwoti akamobeekera egutwa y’oborwoti ase omotwe oye, akamobeka akaba enting’ana ribaga ria Vasti.
ⅩⅧ Omorwoti agakora omoyega omonene bw’amasikani ase Esiteri, akarangeria abanene bonsi b’obogambi na abasoomba baye aroro. Boigo akaraareria abanto bakeanerigwe ebango ase ense yaye, naende akarua ebiegwa ebinge buna omorwoti agwenerete akore.
Modekai na Hamani
ⅩⅨ Ekero Esiteri, buna abaiseke bande bonsi abekungi, asangererekanete ase engaki ya kabere, Modekai akaba ogoikaransa ase egeita ki’omorwoti.
ⅩⅩ Esiteri konya taramanyia abanto b’ense eria ng’a ngesaku ki are, gose noyo bw’enyomba ki. Modekai nigo amosemetie igo, na Esiteri akamoigwera buna konya abeire okomoigwera ekero akinetigwe nere.
ⅩⅪ Ase engaki eyio Modekai arenge kobeera agwo ase egeita ki’enyomba y’oborwoti, abasoomba babere b’omorwoti abwo bagombaetigwe, Bigitana, na Teresi, abwo barenge korenda ase egesieri ki’enyomba, bakaba n’endamwamu ase omorwoti, bakarigia enchera y’okomoita.
ⅩⅫ Modekai akamanya ayio, akayateebia Esiteri enting’ana, nere akayateebia omorwoti ribaga ria Modekai.
ⅩⅩⅢ Obotuki bogakorwa, na amang’ana akanyorekana ng’a n’amaene arenge; abanto baria babere bakabwatwa, bagatongwa ase chimbambo igoro. Amang’ana ayio akarikwa ase obosio bw’omorwoti ase Egetabu ki’amang’ana arenge gokoreka.