RIRUUBE RIA PAULO OMOTOMWA ASE
ABAEFESO
Ogochaakera
Ekerenga ki’eriruube ria Paulo ase Abaefeso n’omooroberio Omonene ng’a ase ekero ki’ogoikeranigwa kw’engaaki nabeekeranie ebinto bionsi bibe n’obomo ase Kristo, ebinto bire igoro, na ebire ase ense, ase ere oyio. (1:10) boigo n’ogokuurera abanto komenyera omooroberio oyio bw’ogokumia ase obomo bwa Mwanyabaanto nere Kristo Yeso. Ase ensemo y’eritangani, bw’egetabu eke, nigo akoagaacha ekerenga eke kiobomo ase ogokwanera chingeencho Nyasae tata achoorete abanto, enchera bakwaberwa na gosiborwa korwa ase chingataare chi’ebibe goetera ase Yeso Kristo omwana, boigo engencho eira enene egoikeranigwa ase enchera y’Omoika Omochenu. Ase ensemo yakabere, okuurera abasoomi komenya ase chinchera chiria chiranyare kobabeeka bonsi ase oboamo na Kristo. Ase chinkwana chinyinge, nigo tokworokererigwa obomo obo amo na Kristo: Ekanisa nigo enga omobere na Kristo buna omotwe; gose buna oboagacho na Kristo buna rigena riekona; boigo buna omokungu na Kristo buna omosacha oye. Riruube eri nigo rikoimokereria igoro kegima ekerengererio kiobuya bw’Omonene goetera ase Kristo. Kera ring’ana nigo ribekire ase ebiicha y’obwanchani, ekeng’wanso, okwaberwa obuya, n’obochenu oboikeranu.
Okobagwa kw’egetabu eke
Ogochaakera 1:1-2
Kristo na Ekanisa 1:3—3:21
Obogima oboyia ase okoba ime ya Kristo 4:1—6:20
Ogokoorera 6:21-24
Ⅰ
Ⅰ Inche Paulo, omotomwa o Kristo Yeso ase ogwancha kwa Nyasae, nkobariikera nde inwe abachenu abamomenyete Efeso, abeegeni ba Kristo Yeso:
Ⅱ Obuya bobe ase more na omorembe bikorwa ase Nyasae Tata oito, na ase Omonene Yeso Kristo.
Ogosesenigwa kw’omoika ase Kristo
Ⅲ Nyasae, Ise Omonene oito Yeso Kristo, atogigwe, ere oyotosesenetie ase Kristo nogosesenigwa gwonsi kw’omoika aase aaria igoro,
Ⅳ buna atochoorete ase ere ritang’ani ense etarabekwa oboroso, erinde tobe abachenu, totari na komocha ase obosio bwaye.
Ⅴ Ase obwanchani bwaye Nyasae atochorete korwa kare, erinde tokorwe koba abana baye ase enchera ya Yeso Kristo, koreng’ana nokogania kw’ogwancha kwaye,
Ⅵ erinde obonene bw’obuya bwaye botogigwe, obo atoeire buna ekeegwa ase Omwanchwa oye.
Ⅶ Ase are ere ntore nokoboorigwa ase amanyinga aye, na okwaberwa kw’ebibe biaito ase obonge bw’obuya bwaye,
Ⅷ obo ere akabomenta ase tore ase chiseemi na obong’aini bwonsi.
Ⅸ Nyasae agatomanyia obobisi bw’ogwancha kwaye, koreng’ana nokogania kwaye buna aroberetie ase Kristo,
Ⅹ ng’a ase ekero ki’ogoikeranigwa kw’engaaki nabeekeranie ebinto bionsi bibe n’obomo ase Kristo, ebinto bire igoro, na ebire ase ense, ase ere oyio.
Ⅺ Ime yaye twanyorire omwando, koreng’ana buna twachooretwe korwa kare ase okorigia kwaye ere oy’okorete onsi koreng’ana nogwancha kwaye,
Ⅻ erinde intwe abatwatang’anete komosemeria Kristo togere obonene bwaye botogigwe.
ⅩⅢ Ase ere oyio, inwe abamwaigure ring’ana ri’ekeene, enchiri y’ogotooreka kwaino, na komwaikire komwegena ere, mokabekwa ekemanyererio n’Omoika Omochenu, oria mwarieretwe eira.
ⅩⅣ Oyo nere ore intenenera ase omwando oito, goika okoboorigwa kw’abare aba Nyasae, ase ogotogigwa kw’obonene bwaye.
Ogosaba gwa Paulo
ⅩⅤ Ase engencho eyio, ekero naigwete amang’ana y’okwegena kwaino more nakorokwo ase Omonene Yeso, na obwanchani bwaino ase abachenu bonsi,
ⅩⅥ tintigeti koiraneria ng’a mbuya mono ase engencho yaino, na kobainyora ase ogosaba kw’ane.
ⅩⅦ Nasabire ng’a Nyasae Omonene oito Yeso Kristo, Tata Obonene, abae omoika bw’obong’aini na bw’okomaanorerwa, erinde momomanye;
ⅩⅧ naende ng’a amaiso ye chinkoro chiaino abekwe omobaso, erinde momanye ogosemeria koria abarangereretie monyore, na komanya obonda bw’obonene bw’omwando oye buna bore, obo abachenu baeirwe.
ⅩⅨ Nasabire ng’a momanye obonene bw’okobua kwaye botari nekerengo, obo bwatoikeire intwe abatwegenire koreng’ana nogokora gw’okobua kwaye okonene.
ⅩⅩ Ere nigo akorete emeremo eyio ase Kristo ekero amoboogetie korwa ase abakuure, akamoikaransia ensemo y’okoboko kwaye gw’okorio aaria igoro,
ⅩⅪ igoro mono kobua okogaamba gwonsi, na okobua, ne chinguru, na oborwoti, na igoro ya kera erieta rigwatorwa, tari ase ense eye yoka, korende neria egochia‐gocha boigo.
ⅩⅫ Naende akabeeka ebinto bionsi inse y’amagoro aye, akamobeka abe omotwe igoro y’ebinto bionsi ase ekanisa,
ⅩⅩⅢ eyio ere omobere oye, ogoikerania kwaye ere oyogoikerania ebinto bionsi ase bonsi.