Ⅵ
Bogorerania chigurube inwe ase inwe
Ⅰ Abaminto, onye omonto obuirwe nokomocha konde, inwe abamore ab’Omoika nebagwenerete koirania omonto oyio ase omoika bw’obwororo. Erigererie aye omonyene, tobaisa goteemwa.
Ⅱ Bogorerania chigurube inwe ase inwe, nario moraikeranie amachiiko a Kristo.
Ⅲ Naki omonto karekage ng’a ere naisaine, ere taisaini kende; igo akweng’aina ere omonyene.
Ⅳ Korende kera omonto arenge emeremo yaye omonyene. Onye ore nengencho y’ogwetogia, tiga ayietogerie bweka omonyene, na tereng’ania nomogisangio oye.
Ⅴ Naki kera omonto nebogorererie egurube yaye omonyene.
Ⅵ Korende ere oyokworokererigwa ring’ana, abwatane nere oyokomworokereria ase ebinto ebiya bionsi.
Ⅶ Timong’aineka; Nyasae tagokorerwa echeche. Naki kende gionsi omonto agosimeka, nakio arache kogesa.
Ⅷ Naki ere oyogosimeka ase chingencho chiaye chi’ebibe nache kogesa ogosareka korwa ase chingencho chiaye chi’ebibe, korende ere oyogosimeka ase Omoika nache kogesa obogima bwa kare na kare korwa ase Omoika.
Ⅸ Titorosa gokora amaya, ekiagera natogese ekero engaki eraike, totakweti emioyo.
Ⅹ Nabo gatorabe ne ribaga tokorere abanto bonsi amaya, korende kobua mono abwo bare ab’okwegena.
Ogokuurera na ogosesenigwa
Ⅺ Rigereria, buna chinuguta chire chinene echi nabariikeire nokoboko kwane omonyene.
Ⅻ Bonsi abwo barigetie kororekana buya ase emebere yabo, abwo nabwo bakobabetereria ng’a mwarokigwe, erinde tibachandwa ase engencho y’omosalaba o Kristo.
ⅩⅢ Naki nonya mbarabwo abanyene abaarogete tibabwateti amachiiko, korende mbarigetie inwe mwarokigwe, erinde banyare gwetogeria emebere yaino.
ⅩⅣ Ogwetogia kobe are nainche, otatiga inyetogerie omosalaba Omonene oito Yeso Kristo, ase oro ense yabambirwe ase ’nde, na inche ase ense.
ⅩⅤ Naki okwaroka tai gento, gose ogotaroka tai gento, korende negento koba egetongwa ekeyia.
ⅩⅥ Omorembe na amaabera bibe amo na bonsi abaragenderere ase ogochika oko, na amo n’Abaisraeli ba Nyasae.
ⅩⅦ Korwa bono monto onde tanchanda; naki nabogoirie ekemanyererio kia Yeso ase omobere one.
ⅩⅧ Abaminto, obuya bw’omonene oito Yeso Kristo bobe amo nemioyo yaino. Amina.