Ⅴ
Chora Kristo gose amachiiko
Ⅰ Kristo agatosibora, erinde tomenye ase obosibore; gaki tenena bokong’u, timobwatwa naende ase obosibwa bw’obosomba.
Ⅱ Igwa, inche Paulo nkobateebia nde inwe, ng’a moise kwarokigwa, rirorio Kristo takoba nengencho ende ase more.
Ⅲ Naende ngoteebia nde kera omonto oyokwarokigwa, ng’a rirorio osibirwe ase ogoikerania amachiiko onsi.
Ⅳ Mwatananirwe korwa ase Kristo, inwe abamorigetie konyora oboronge korwa ase amachiiko, mwagure korwa ase obuya.
Ⅴ Naki intwe ase Omoika ntoganyete oboronge boria tosemeretie ase enchera y’okwegena.
Ⅵ Naki ase Kristo Yeso okwaroka tikogokonyorera kende, gose ogotaroka, korende okwegena okwo nakwo kogokora emeremo ase obwanchani.
Ⅶ Nigo mwarenge kominyoka buya; ning’o obatangete timoigwera ekeene?
Ⅷ Okoebereria okwo tikwarwete asare ere oyobarangeretie inwe.
Ⅸ Ememera emeke nigo ekobotia ribomba rigima.
Ⅹ Ase Omonene ninde nogosemeria ase more ng’a timokoba nebirengererio binde ebiao, korende ere oyokobachanda nabogorie okogambigwa kwaye, naba onde bwensi.
Ⅺ Korende baminto, onye inche ngendererete nonya mbono koraria amang’ana y’okwaroka, nase ki rende nkona‐gochandwa? Igo ekegocha ki’omosalaba kiarusigwe.
Ⅻ Anga nancha ng’a abwo bakobachanda begombayie abanyene.
Obosibore goika bogamberwe nobwanchani
ⅩⅢ Inwe abaminto, nigo mwarangeretigwe monyore obosibore; korende ogosiborwa kwaino tikoba ogw’okobwatia chingencho chiaino chi’ebibe, mbuya mokorerane inwe ase inwe ase obwanchani.
ⅩⅣ Naki amachiiko onsi aikeranigwe ase ring’ana erimo, na rirorio nario eri, “Mwanche omogisangio oo buna bweanchete.”
ⅩⅤ Korende kerabe mokoromana na koriana, rigereria timocha gosirania inwe ase inwe.
Okwama kw’Omoika na ogokora gwe chingencho chi’ebibe
ⅩⅥ Gaki nigo nkobateebia, mogenderere ase Omoika na timogoikerania okogania gwe chingencho chiaino chi’ebibe.
ⅩⅦ Naki okogania gwe chingencho chi’ebibe nigo gokoamererania n’Omoika na okogania kw’Omoika nigo gokoamererania ne chingencho chi’ebibe; naki ebi iga bikorwana goika timokonyara gokora ayamorigetie gokora.
ⅩⅧ Korende komokoraagwa n’Omoika, rirorio timori inse y’amachiiko.
ⅩⅨ Ogokora gwe chingencho chi’ebibe nigo kore maiso marore na korokwo nobotomani, eubi, obonyaka,
ⅩⅩ ogosasiima emegwekano, oborogi, obobisa, eriomana, ribero, endamwamu, obong’iti, okwerusanania, ogweatanana,
ⅩⅪ emoko, oboiti, ogotinda, chigosori chimbe, na amang’ana ande buna ayio. Nabakuureire buna narenge kobakuurera ritang’ani, ng’a abwo bagokora amang’ana anga buna ayio, tibakonyora omwando bw’oborwoti bwa Nyasae.
ⅩⅫ Korende okwama kw’Omoika nobwanchani, omogooko, omorembe, oboremereria, obwororo, obuya, obwegenwa,
ⅩⅩⅢ oboitongo, okwerita ase onsi; machiko ande tari arange amang’ana buna ayio.
ⅩⅩⅣ Abwo bare abakristo Yeso baabambire chingencho chiabo chi’ebibe amo nokogania okobe na okorengereria kwabo.
ⅩⅩⅤ Onye intwe twabeire moyo ase Omoika, togenderere boigo ase Omoika.
ⅩⅩⅥ Titoba nokogania kw’ogwetogia abanyene, titochegania, gose koba nemoko intwe ase intwe.