EGETABU KIA
EZRA
Ogochaakera
Egetabu gia Ezra nigo kere okogendereria kw’egetabu ki’amang’ana ebiro kegokwanera igoro y’okoirana kw’Abaisraeli bake korwa obosomba aria Babiloni n’okoirania obogima n’ogosasiima ime ya Yerusalemu. Amang’ana aya nigo abekire ase ebika ebi bikobwatia: (1) Ekeombe egetang’ani ki’Abayahudi kiairanete korwa Babiloni ase ogochika gwa Koresi omorwoti a Pasia; (2) Hekalu koagachwa na gosaberwa na koirania ogosasiima kwa Nyasae ime ya Yerusalemu; (3) Ase emiaka meke yare kobwatia ekeombe kende ki’Abayahudi gekairana gocha Yerusalemu inse y’oborai bwa Ezra, oyio orenge n’obomanyi bwa igoro kegima ase richiiko ria Nyasae, oyio ogokonya abanto kweroberia ase amang’ana ekemoika n’oboamate bw’ekenyoro ase okorenda amanang’ana ekemoika noboererania korwa ase chisokoro bw’Abaisraeli.
Okobagwa kw’egetabu eke:
Okoirana kw’eritang’ani korwa ase obosomba 1:1—2:70
Hekalu ekoagachwa naende, egwatananwa na gochenwa 3:1—6:22
Ezra okoirana amo nabasomba bande 7:1—10:44
Ⅰ
Koresi okorua ogochika Abayuda bairane
Ⅰ Ase omwaka bw’eritang’ani bw’okogamba gwa Koresi, omorwoti bw’Abaayemi, Omonene agaikerania ayakwanete goetera ase Yeremia. Agaseegeta na koberora omoika bw’omorwoti oria, akamosukia arike ring’ana na koriraria ase chinsemo chionsi chi’oborwoti bwaye, ogoteeba.
Ⅱ “Amang’ana aya naro inche Koresi, omorwoti bw’Abaayemi, ngoteeba: Omonene, Nyasae o igoro, ong’eire amarwoti onsi are ase ense. Ere onchikiire imoagachere enyomba aaria Yerusalemu, omochie ore ase ense y’Abayuda.
Ⅲ Onde bwensi ore ase egati yaino, ore bw’abaanto baye, tiga atiire gochia Yerusalemu, aaria ase ense y’Abayuda, erinde aagache enyomba y’Omonene, Nyasae bw’Abaisraeli, na Nyasae oye abe amo nere. Ere nere Nyasae ogosasimwa Yerusalemu.
Ⅳ Onye onde bw’abaanto baye otigarete ase obosomba, nere origetie akonywe airane, abaamate b’aase agwo babakonye chifeta, ne chitaabu, na ebinto binde, ne chitugo, amo nebiegwa bi’ogwancha ase enyomba ya Nyasae aaria Yerusalemu.”
Ⅴ Erio abateneneri be chiamate chi’Abayuda na Ababenjamini amo nabakuani na Abalawi, kera omonto oyo Nyasae akunire omoika oye ng’a atiire, erinde aagache naende enyomba y’Omonene aaria Yerusalemu, bakebeka ang’e.
Ⅵ Abanto bonsi abamenyete amo nabarabwo bakabakonya ase okobaa ebikorero bie chifeta, na ebie chitaabu na ebinto binde, ne chitugo, na ebinto bi’erigori rinene, amo n’ebinto baruete ase ogwancha.
Ⅶ Boigo omorwoti Koresi akairania ebikorero bi’enyomba y’Omonene, biria Nebukadinesaro arusetie Yerusalemu na akabigacha ase enyomba ye chinyasae chiaye.
Ⅷ Ebikorero ebio Koresi, omorwoti bw’Abaayemi, akabia Mitiredati, omoteneneri bwe chikungo. Mitiredati akabibara, akabirika inse erio akabia Sesibasari, omogambi bw’Abayuda.
Ⅸ Oyo noro omobaro bw’ebinto ebio: Chibakuri chiroisirie korwa ase chitaabu, emerongo etato (30), ne chibakuri chiroisirie korwa ase chifeta, elifu eyemo (1,000), na ebitaabo bi’ogosambera ubani, emerongo ebere na kianda (29);
Ⅹ chibakuri chinke chiroisirie korwa ase chitaabu, emerongo etato (30), na echiroisirie korwa ase chifeta, amagana ane, na ikomi (410), naende ebikorero binde, elifu eyemo (1,000).
Ⅺ Ebikorero bionsi biaroisirie korwa ase chitaabu ne chifeta nigo biarenge chilifu isano, na amagana ane (5,400). Ebio bionsi Sesibasari akabiira Yerusalemu; ekero abanto baria barenge ase obosomba baruete Babiloni, bakagenda Yerusalemu.