Ⅹ
Ororeeria rw’abana ba Nuhu
Ⅰ Oro narwo ororeeria rw’abana ba Nuhu: Shemu, na Hamu, na Yafeti. Na aba batato bakaibora abana abamura magega y’etoigo eria.
Ⅱ Abana ba Yafeti nabwo aba: Gomeri, na Magogu, na Madai, na Yavani, na Tubali, na Mesheki, na Tirasi.
Ⅲ Na abana ba Gomeri nabwo aba: Asikenasi, na Rifati, na Togama.
Ⅳ Na abana ba Yavani nabwo aba: Elisha, na Tarisisi, na Kitimu, na Rodani.
Ⅴ Aba nabwo chisokoro chi’abaanto abwo bamenyete mbarabare ye nyancha na as’ebisinka. Barabwo nororeeria rwa Yebita abwo bamenyete kera oyomo ase egesaku kiaye, ne chingongo chiabo na kera oyomo ase omonwa oye areenge gokwana.
Ⅵ Na abana ba Hamu nabwo aba: Kusi, na Misiri, na Putu, na Kaanani.
Ⅶ Na abana ba Kusi nabwo aba: Seba, na Havila, na Sabuta, na Raama, na Sabiteka. Na abana ba Raama nabwo aba: Seba na Dedani.
Ⅷ Kusi akaibora Nimurodi. Nimurodi akaba omonto bw’eritang’ani oyorenge nokobua ase ense.
Ⅸ Ere nigo areenge omotwari omokong’u bwe ching’iti, ase obosio bw’ Omonene. Ase ayio, igo abanto banarete goteeba igoro y’omonto: “Igo anga buna Nimurodi, omotwari omokong’u bwe ching’iti, ase obosio bw’ Omonene.”
Ⅹ Omochakano bw’obogaambi bwaye nigo bware Babiloni, na Ereku, na Akadi, (na Kaline); eyio yonsi nigo yaare ase ense ya Sinari.
Ⅺ Akarwa ase ense eria, akagenda goika Asuri, akaagacha Ninawi, na Rehoboti‐Iri, na Kala,
Ⅻ na Reseni, omochie omonene oyorenge egati ya Ninawi na Kala.
ⅩⅢ Misiri neere esokoro ya Abaludi, na Abanami, na Abalehabi, na Abanafutu,
ⅩⅣ na Abapaturusi, Abakasiluhi, (korwa ase bare nao Abafirisiti barwete), na Abakafitori.
ⅩⅤ Kaanani akaibora Sidoni, omwana oye omotangi, na Heti,
ⅩⅥ na Abayebusi, na Abaamori, na Abagirigasi,
ⅩⅦ na Abahivi, na Abaarikiti, na Abasini,
ⅩⅧ na Abaarivadi, na Abaseremari, na Abahamati. Erio magega y’ayio eamate ya Kaanani egesiarera.
ⅩⅨ Orobebe rw’Abakaanani rogachaka korwa ase Sidoni, rokagenda enchera ya Gerari, rogaika Gasa, naende ase enchera ya Sodomu, na Gomora, na Adima, na Seboimu, rogaika Lasa.
ⅩⅩ Aba nabwo abana ba Hamu, buna bareenge ase chiamate chiabo, na emenwa yabo, ne chinse chiabo, na ebisaku biabo.
ⅩⅪ Shemu, oyorenge sokoro y’abana b’Eberi, naende oyio neere orenge omomura omonene omwabo Yafeti, akaiborerwa abana.
ⅩⅫ Abana ba Shemu nabwo aba: Elamu, na Asuri, na Arifakisadi, na Ludi, na Aramu.
ⅩⅩⅢ Na abana ba Aramu nabwo aba: Usi, na Huli, na Geteri, na Masi.
ⅩⅩⅣ Arifakisadi akaibora Sela, na Sela akaibora Eberi.
ⅩⅩⅤ Eberi akaibora abana babere abamura. Omomura omotangi nigo aare korokwa Pelegi, ekiagera ase amatuko aye nario ense yaatananegete, na oyomwabo nigo aare korokwa Yokitani.
ⅩⅩⅥ Yokitani akaibora Alimodadi, na Selefu, na Hasarmaweti, na Yera,
ⅩⅩⅦ na Hadoramu, na Usali, na Dikila,
ⅩⅩⅧ na Obali, na Abimaeli, na Seba,
ⅩⅩⅨ na Ofiri, na Havila, na Yobabu. Abwo bonsi nabwo abana ba Yokitani.
ⅩⅩⅩ Ensemo eria bamenyete nigo yachakerete Mesa gochia Sefari, ase ebitunwa bia moocha.
ⅩⅩⅪ Aba nabwo abana ba Shemu, buna baareenge ase chiamate chiabo, na emenwa yabo, ne chinse chiabo, na ebisaku biabo.
ⅩⅩⅫ Echio nachio chiamate chi’abana ba Nuhu, koreng’ana na ororeeria rwabo ase ebisaku biabo; na korwa ase bare ebisaku bigesiarera ase ense yonsi magega y’etoigo.