Ⅸ
Nyasae ogosesenia Nuhu na gokora okobwatana nere
Ⅰ Nyasae agasesenia Nuhu amo nabamura baye, akabateebia: “Moibore, momeneteke, moichore ase ense.
Ⅱ Ching’iti chionsi chire ase ense chibooboe na kobairoka inwe; chinyoni chia igoro, ne ching’iti chikwagura igoro ase ense, ne chinswe chionsi chi’enyancha; echio chionsi chiabekirwe ase amaboko aino.”
Ⅲ Kera egetongwa kere moyo na gekwagura inakebe endagera yaino; buna nabaete chinyeni na ebimeri binde bigokina, naboigo nabaeire nebio bionsi.
Ⅳ Korende timoria chinyama chire nobomoyo, engencho yaye echire namanyinga ime yabo.
Ⅴ Amaene, amanyinga y’obogima bwaino ninyaganie ’nyaakanwe; korwa ase kera eng’iti ninyaganie, na korwa ase kera omonto oyogoita oyomwabo ninyaganie ’nyaakanwe obogima bw’omonto oyio.
Ⅵ Onde bwensi oraitere amanyinga a Mwanyabaanto,
amanyinga y’omonto oyio neere naiterwe na Mwanyabaanto,
ekiagera Nyasae nigo atongete Mwanyabaanto
ase omobwekano oye ere omonyene.
Ⅶ Nyasae agateeba: “Na inwe moibore, momenteke, mosaraare, na mobe abange ime ase ense.”
Ⅷ Erio naende Nyasae agateebia Nuhu amo nabamura baye,
Ⅸ “Rora, inche ngokora nde okobwatana kw’ogotianania nainwe, amo na ororeeria rwaino roraiborwe korwa magega yaino;
Ⅹ naende na kera egetongwa kere moyo kere amo nainwe, chinyoni chionsi ne ching’iti chigotugwa, ne ching’iti chionsi chi’orosana echio chire amo nainwe, chionsi echiasokire korwa ase obwato ime.
Ⅺ Ngokora nde okobwatana kw’ogotianania nainwe, ng’a kende gionsi kere moyo tigekomerwa naende n’amaache y’etoigo, gose etoigo tegocha koba naende egosaria ense magega y’ayio.”
Ⅻ Naende Nyasae agateeba: “Eke nakio ekemanyererio gi’okobwatana kwane kw’ogotianania nakorire egati yane nainwe, na kera egetongwa kere moyo amo nainwe, na ase ebiaare bigochiagocha.”
ⅩⅢ Erio naende Nyasae agateeba: “Inche nabekire omokubinyongo one ase amare, noro nobe ekemanyererio gi’okobwatana oko egati yane na ense.
ⅩⅣ Ekero nkwara amare igoro y’ense, na omokubinyongo nobe okororekana ase amare.
ⅩⅤ Erio nimbe nkoinyora okobwatana kwane, okwo nakorire egati yane nainwe, amo na kera egetongwa kere moyo. Amache takoba naende etoigo egoita ebitongwa bionsi bire moyo.
ⅩⅥ Ekero omokubinyongo okoba ase amare, na inche nkoyorigereria, ning’inyore okobwatana kwane gwa kare na kare, okwo nakorire egati yane, buna inche Nyasae na kera egetongwa kere moyo ase ense.”
ⅩⅦ Nyasae agateebia Nuhu: “Eke nakio ekemanyererio gi’okobwatana okwo nakorire egati yane na ebitongwa bionsi bire moyo ase ense.”
Abana ba Nuhu
ⅩⅧ Abana ba Nuhu abarwete ase obwato nabwo aba: Shemu, na Hamu, na Yafeti. Hamu nere ise Kaanani.
ⅩⅨ Aba batato nabwo baareenge abana ba Nuhu, na korwa ase abwo Mwanyabaanto bakaranda ase ense engima.
ⅩⅩ Nuhu akaba omoremi, akaba oyo bw’eritang’ani gosimeka emesabibu, nero ekoroisigwa edivai.
ⅩⅪ Ere akanywa edivai; erio agatinda, akaraara ore getirianda ase eema yaye ime.
ⅩⅫ Hamu, ise Kaanani, akamorora ore getirianda, agateebia bamura bamwabo babere baareenge isiko amang’ana aya arooche.
ⅩⅩⅢ Erio Shemu na Yafeti bakabogoria engobo, bakayebeeka amareko abo igoro, bakagenda kemagega‐magega, bakabisia ise obogetirianda bwaye. Amaiso abo nigo arigereretie aase bakorwa, na tibarora obogetirianda bwa ise.
ⅩⅩⅣ Ekero Nuhu atindokire korwa ase okonywa kwaye kw’edivai, akamanya eke omwana oye omoke amokoreire,
ⅩⅩⅤ agateeba,
“Kaanani aragererigwe;
nigo arabe omosomba bw’abasomba ase abamwabo.”
ⅩⅩⅥ Naende agateeba,
“Omonene, Nyasae o Shemu, nasesenigwe,
na Kaanani abe omosomba oye.
ⅩⅩⅦ Nyasae amentere Yafeti obomenyo,
tiga amenye ase chiema chia Shemu,
na Kaanani abe omosomba oye.”
ⅩⅩⅧ Magega y’etoigo eria Nuhu akamenya naende emiaka amagana atato, na emerongo etano (350).
ⅩⅩⅨ Nuhu nigo akoorete emiaka amagana kianda, na emerongo etano (950), erio agakwa.