ⅩⅢ
Obokoreri obokomogwenera Nyasae
Ⅰ Mogenderere nobwanchani inwe ase inwe.
Ⅱ Timweba koroisia abageni, naki ase enchera eye abande mbaroisetie abamalaika, batamanyete.
Ⅲ Inyora abwo basibire ase echela, buna nainwe mosibire amo nabarabwo, naende barabwo mbakoreretwe bobe, ekiagera naboigo nainwe more nomobere.
Ⅳ Okonyuomana gosikwe nabaanto bonsi, na ebiraarero bibe bitari nobosooku, naki abanyaka na abatomani Nyasae nabagaambie ekiina.
Ⅴ Timoba abanchi chitaabu, moisaneke nebi more nabio, ekiagera ere omonyene oteebire, “Tinkogotiga nonya ng’ake, gose tingokoremera.”
Ⅵ Ase ayio, ntonyare goteeba noboremu,
“Omonene nere omokonyi one, tinkwoboa.
Mwanyabaanto, inki arankorere?”
Ⅶ Inyora abwo baare kobatang’ana, abaabateebetie ring’ana ria Nyasae. Naende morengererie mono omoerio bw’obogima bwabo, mobe abegi b’okwegena kwabo.
Ⅷ Yeso Kristo buna arenge igoro, na buna are reero, nabo arabe goika kare na kare.
Ⅸ Timoirwa bogeka namorokererio ao ao, ayare ay’ekegeni, ekiagera mbuya chinkoro chibekwe chinguru ase obuya, gose tari ase emeroberio y’okoria endagera ase eyio barabwo bagendererete neyio tibanyora gokonywa konde.
Ⅹ Ntore negesasiimero aase baria bagokorera Eema batari ne ribaga koria ebinto bikoruegwa aroro.
Ⅺ Naki emebere ye ching’iti chiria amanyinga abo are korentwa ime Aase Aachenu n’Omokuani omonene ase engencho y’ebibe, nigo yare gosamberwa isiko y’omochie.
Ⅻ Ase ayio, Yeso nere agachanderwa isiko y’egeita, erinde achene abanto namanyinga aye ere omonyene.
ⅩⅢ Ase ayio, togende asare isiko y’omochie, tobwatane nere ase okoramwa kwaye,
ⅩⅣ ekiagera aiga titori nomochie oragenderere, korende nigo tokorigia oria orache gocha.
ⅩⅤ Gaki, goetera asare togenderere koa Nyasae ekeng’wanso gi’okomotogia, engencho yaye okwama kw’emenwa yaito eyekoorokia erieta riaye.
ⅩⅥ Timweba gokora amaya, na gosanga nabande, naki ebing’wanso binga buna ebi nabio bikomogwenera Nyasae.
ⅩⅦ Moigwere abwo bakobatang’ana, na mobasike, ekiagera barabwo nigo barendete emioyo yaino buna abanto barache korua omobaro, erinde banyare gokora ayio ase omogooko. Onye bagocha koyakora ase okweumia anga taba na gokonywa konde ase more.
ⅩⅧ Tosabere, naki ntore nobomaene ng’a chinkoro chiaito tichigotogambia, ntorigetie koba norogendo oruya ase amang’ana onsi.
ⅩⅨ Na inche nabasoroire mono kobua gokora ayio, erinde ng’iranigwe ase more bwango.
Ogosesenigwa na ogokwania kw’ogokoorera
ⅩⅩ Bono Nyasae bw’omorembe oyomorentete naende korwa ase amakweri Omonene oito Yeso, oyore omorisia omonene bwe ching’ondi goetera ase amanyinga y’okobwatana gwa kare na kare,
ⅩⅪ ere abakore mobe abaikeranu ase kera ogokora okuya, monyare gokora obwanchani bwaye, naende akore ime yaino ayagwenerete ase obosio bwaye goetera ase Yeso Kristo. Asare ere obonene bwa kare na kare. Amina.
ⅩⅫ Abaminto, nababoririe, moremererie ring’ana eri ri’ogosorora, ekiagera nabarikeire ase amang’ana amake.
ⅩⅩⅢ Manya ng’a oyominto Timotheo oikire gosiborwa. Amo nere ntoche kobarora karache bwango.
ⅩⅩⅣ Nkwanerie abwo bonsi bakobatang’ana, na abachenu bonsi. Abwo baruete Italia baabakwanirie.
ⅩⅩⅤ Obuya bobe amo nainwe mwensi. Amina.