RIRUUBE RIA
YAKOBO
Ogochaakera
Riruube korwa ase Yakobo nario riruube rieritang’ani ase amarube aria atarikeiri monto gose kanisa ende beene korende aria eriikeire abanto bonsi. Riruube eri nigo ribwate amorokererio ayio ariikeire abanto bonsi abwo bare ense engima (1:1). Omoriiki nigo akoriika na gotoa obomanyi igoro yobokristo bw’ekeene boigo nagotoorokeria obongaini bw’okomenya buna abakristo. Nigo agokwanera amang’ana buna obotenenku, obotaka, amateemwa, obong’aini, embwa engiya, okwegena nebikorwa, oromeme, eriomana, obwerori, ogwekanya, kogambia abande, kweimokereria igoro, oboitongo, boigo nogosaba.
Riruube eri nigo rikobeeka chinguru amang’ana yokwegena kore nebikorwa ase obogima bwomoKristo (2:14-26) kobua mono ase eamate yabaKristo.
Okobagwa kw’egetabu eke
Ogochaakera 1:1
Okwegena na obong’aini 1:2-8
Obotaka na obotenenku 1:9-11
Amateemwa are ao ao 1:12-18
Okoigwa na ogokora 1:19-27
Ogokuurerwa kw’ogotaba nogwanchereria 2:1-13
Okwegena na ogokora 2:14-26
Omokristo na oromeme rwaye 3:1-18
Omokristo na ense 4:1—5:6
Ogotebereria ao ao 5:7-20
Ⅰ
Ⅰ Korwa ase Yakobo, omosomba o Nyasae na Omonene Yeso Kristo, nabakwanirie inwe abanto ba Nyasae, abamwatananekire gochia chinse chire ao ao.
Okwegena na obong’aini
Ⅱ Abaminto, bara ng’a nomogooko bwoka komorasoe ase amateemwa are ao ao,
Ⅲ ekiagera momanyete ng’a ekero okwegena kwaino kogoteemwa nigo mokweorokereria oboremereria.
Ⅳ Tiga oboremereria obwo bobe nemeremo emeikeranu, erinde monyare koba abaikeranu, na abagima, motaremeiri na ing’ana rinde rionsi.
Ⅴ Korende onye monto onde oino oremeire obong’aini, tiga asabe Nyasae, ere nabomoe, ekiagera nigo akoa abanto bonsi ase obonge, gose tari gotogonyera onde.
Ⅵ Korende oyogosaba, tiga asabe ase okwegena, taba na tang’u‐tang’u, ekiagera oyore ne chitang’u‐tang’u nigo are buna emerindo y’enyancha ekona‐koirwa nomwaga gochia aaria na aaria.
Ⅶ Naki omonto oria takaga ng’a nanyore egento korwa ase Omonene;
Ⅷ ere nigo are nemioyo ebere, na gotiting’ara ase chinchera chiaye chionsi.
Obotaka na obonda
Ⅸ Korende abakristo abare abataka bagoke, ekiagera Nyasae abaimokereirie igoro,
Ⅹ na abakristo abanda, nabarabwo bagoke kobairanigwe inse, ekiagera nigo barasire buna egesicha ki’obonyansi.
Ⅺ Naki erioba korikooroka nomobaso omoororo, nigo rigosamba na kwomia obonyansi. Egesicha ki’obonyansi kiaroroka, na obuya bw’ekieni kiaye bwasira. Naboigo nomonda nere arasire kagendererete kwerigeria.
Gotema na gotemwa
Ⅻ Nasesenirie omonto oria oremereretie ogoteemwa, ekiagera ekero aikire gwancherwa nanyore obogima buna egutwa y’obobui, obogima obwo Nyasae abarierete eira abwo bamwanchete.
ⅩⅢ Omonto karateemwe, tateeba “Nateemirwe na Nyasae” ekiagera Nyasae tagoteemwa namabe, gose tagoteema omonto.
ⅩⅣ Korende kera omonto nigo agoteemwa ekero akong’uswa na kong’ainwa nokogania kwaye omonyene.
ⅩⅤ Na okogania koria okobe gokwabogoirie oborito kwaibora ebibe, na ebibe biria kobiakiinire, biarenta amakweri.
ⅩⅥ Abaminto abanchani, timong’aineka.
ⅩⅦ Kera ekerugwa ekiya, na kera ekeegwa geikeranete nigo gekorwa ase Ise bw’emebaso. Asare koonchoka tikoiyo, gose ekiriri kende gekooncha‐onchoka.
ⅩⅧ Ase ogwancha kwaye ere omonyene agatoibora ase ring’ana riaye ri’ekeene, erinde tobe buna ogotongorwa konde kw’ebitongwa biaye.
Okoigwa ring’ana na korikora
ⅩⅨ Abaminto abanchani, momanye ring’ana eri: Kera omonto abe omwango ase okoigwa, korende abe bwe ng’ora ase ogokwana, na bwe ng’ora ase okoba nendamwamu,
ⅩⅩ ekiagera endamwamu ya Mwanyabaanto teri gokora ayare boronge ase obosio bwa Nyasae.
ⅩⅪ Ase ayio, beka aare ogotacheneka gwonsi, na obonge bw’amabe, na ase obwororo mwanche ring’ana erio riasimekirwe ime yaino, eriranyare kobatooria.
ⅩⅫ Timweng’aina inwe abanyene ase okoigwa ring’ana riaye rioka, korende ribeeke ase ebikorwa.
ⅩⅩⅢ Naki omonto karabe omotegereri bw’ering’ana, gose tari omorikori, oyio nigo anga buna omonto oyokwerigereria obosio bwaye omonyene ase ekerore.
ⅩⅩⅣ Igo akwerigereria, naende ogenda ase agochia, erio kegima bweba buna erora arenge.
ⅩⅩⅤ Korende oyorigereretie amachiiko amaikeranu ay’obosibore, na goikaransa aroro, na taba oyokoigwa na kweba, korende abe omokori okoyakora, oyio nabe oyosesenirie ase ogokora kwaye.
ⅩⅩⅥ Omonto karekage ng’a nkomokorera are Nyasae, na ere tagambereti oromeme rwaye, korende nenkoro yaye akong’aina, igo okomokorera Nyasae kwaye nigo kore okwa bosa.
ⅩⅩⅦ Okomokorera Nyasae okore ogochenu, gotari na komocha ase obosio bwa Nyasae Tata noko: Gochia korora chintakana na ababoraka ase obokong’u bwabo, na kwerenda ere omonyene, na igo taba na kemoa gi’ense.