Ⅱ
Ogotooreka okonene
Ⅰ Ase ayio, netogwenerete gotegerera mono kobua na kobwata ayatwaigure, titocha gosira.
Ⅱ Ring’ana riria riakwanetwe gochia ase Chisokoro chiaito nabamalaika nigo riarenge eri’ekeene, na kera oyotaribwatetie gose korigwera nigo anyorete egesusuro keria kiamobwenerete.
Ⅲ Inee, naki intwe toranyare gwetooria onye twangire ogotooreka okonene buna oko? Ritang’ani Omonene naraaretie ogotooreka oko, naende baria bamoigwete batoenekeirie buna n’eriekeene.
Ⅳ Naende Nyasae akamenta oborori bwaye nebimanyererio, na amakumia, na ebikone bie chinguru ao ao amo na kogabera abanto ebiegwa bi’Omoika Omochenu koreng’ana nogwancha kwaye.
Oria ogotoraa gochia ase ogotooreka
Ⅴ Naki tari inse y’abamalaika Nyasae abegete Ense eria egochi‐gocha, eyio togokwana.
Ⅵ Korende nigo egotebekana aase gete ase amariiko:
“Mwanyabaanto inki aisaine aye Nyasae ogendererete komorengereria?
Mwanyabaanto inki aisaine aye okomorenda?
Ⅶ Kwamokorire omoke kobua abamalaika ase ekero egeke,
kwamobekeire egutwa y’obonene na amasikani.
Ⅷ Okabakora koba abateneneri igoro ase ebinto bionsi.”
Naki ase okobeeka ebinto bionsi inse yaye tatigete gento kende atabegete inse yaye. Korende goika bono titorarora ere okogambera ebinto bionsi bibekire inse yaye.
Ⅸ Korende twarorire Yeso oyio ase ekero egeke okoretwe koba omoke kobua abamalaika, erio goetera ase obuya bwa Nyasae akwe ase engencho ya kera omonto. Bono nigo tokomorora obekeirwe egutwa y’obonene na amasikani ase engencho y’ogochandwa kwaye kw’amakweri.
Ⅹ Naki ase engencho ya Nyasae, na ase okobua kwaye, ebinto bionsi mbireo. Ase ayio yamogwenerete ere goikerania Omochaki bw’ogotooreka gwaito goetera ase emechando, erio aire abana abange ase obonene. Ekiagera Yeso nere okoraa gochia ogotoreka
Ⅺ Naki ere oyogochena amo nabwo bagochenwa nigo babwate ise oyomo. Nakio gekogera Yeso atari korora obosoku kobaroka abamwabo.
Ⅻ Agateebia Nyasae,
“Nindarie erieta riao ase abaminto,
ase egati y’omosangererekano ningotogie ase ogoteera.”
ⅩⅢ Naende nigo agoteeba,
“Nimosemerie Nyasae.”
Naende oteeba,
“Rora, inche nao inde aiga amo nabana baria naetwe na Nyasae.”
ⅩⅣ Ase ayio, ekiagera abana buna akobaroka babwataine ase amanyinga ne chinyama, Yeso naboigo abwataine nayio ayio, erio ase enchera y’amakweri asirie ere oyore nokobua igoro y’amakweri, engencho yaye Saitani,
ⅩⅤ naende ase enchera eyio asibore abwo bonsi barenge abasomba ase obogima bwabo bwonsi, ekiagera bairogete amakweri.
ⅩⅥ Naki ayio namaene, ere tagwechandera abamalaika, korende nigo agwechandera oroiboro rwa Aburaamu.
ⅩⅦ Ase ayio, yamogwenerete abe buna abamwabo ase amang’ana onsi, erinde anyare koba Omokuani omonene, Omonyene amaabera, na omwegenwa ase ogokorera Nyasae, na koba ekeng’wanso gi’okobwatania ase ebibe bia Mwanyabaanto.
ⅩⅧ Ekiagera ere omonyene achandetwe na goteemwa, nanyare gokonya abwo bagoteemwa.