RIRUUBE ASE
ABAIBERANIA
Ogochaakera
Riruube gochia ase Abaiberania nigo riarigetwe gochia ase ekeombe kia’baKristo abegeeni, abwo konya babeire ange gokwa omoyo ase okwegena kwabo ase engencho yokoamererania kwarorekanete korwa ase abanto gete. Omoriki bweriruube eri nigo akobabeka chinguru nakobatebia batenene bokong’u ase okwegena kwabo. Nigo boigo akobamanyia buna Yeso Kristo nere ogotoreka gwekeene goetera ase Nyasae. Ase okobeka amang’ana aye chinguru nigo akoorokia ebiene bitato.
1. Yeso nomwana obeene o Nyasae oyio oigwerete Nyasae goetera ase ogochandeka kwaye ase engencho yaito. Yeso buna omwana o Nyasae nigo aetanetie ababani bonsi b’okobwatana ogokoro, boigo nabamalaika nonya Musa omonyene.
2. Nyasae nigo araretie Kristo koba Omokuani okare na kare goetania abakwaani bonsi b’okobwatana ogokoro.
3. Goetera ase Yeso Kristo, oyo bwegenire nigo agotorigwa korwa ase ebibe, obwoba namakweri, na Kristo buna Omokuani Omonene nigo akorwa ogotoreka gwekeene, okwo kware kworokigwa goetera ase ebingwanso ase egesaku kia’baiberania.
Goetera ase okorwa emegwekano ao ao yabwo batenenete bokong’u ase okwegena ase egesaku kia’baisraeli (11), omoriki nigo akoboria abasomi baye babe abegeeni, boigo na ase egesieri 12 nigo agotebia abasomi baye bagenderere ase okwegena goika omoerio babegete amaiso abo ase Yeso, na koremereria ogochandeka okwo korabachere. Egetabu eke nigo kegokorera ase amang’ana y’obosemia na ogokurera.
Okobagwa kw’egetabu eke
Ogochaakera: Kristo ogotobarera kegima obonene bwa Nyasae 1:1-3
Kristo nomonene kobua abamalaika 1:4—2:18
Kristo nomonene kobua Musa na Yoshua 3:1—4:13
Obokuani bwa Kristo nobonene kobua obokuani bonde bwonsi 4:14—7:28
Okobwatana gwa Kristo nokonene kobua okobwatana konde gwonsi 8:1—9:22
Okong’wanswa gwa Kristo nokonene kobua ebing’wanso binde bionsi 9:23—10:39
Okwegena nokw’engencho enene mono 11:1—12:29
Kogokia Nyasae 13:1-19
ogosaba kw’ogokorera 13:20-21
Amang’ana y’omoerio 13:22-25
Ⅰ
Ring’ana ria Nyasae goetera ase Omwana oye
Ⅰ Agwo kare, Nyasae nigo are gokwana n’echisokoro chiaito ebiro ebinge ne chinchera chinyinge goetera ase ababani,
Ⅱ korende ase amatuko aya y’omoerio okwanire naintwe goetera ase Omwana oye. Ere oyo Nyasae aragete koba omonyamwando bw’ebinto bionsi, na goetera asare agatonga ense.
Ⅲ Ere nigo agotobareria obonene bwa Nyasae, na buna Nyasae are, nere naboigo are, naende nigo akobogoria ebinto bionsi ne ring’ana riaye ri’okobua. Gaikire gokora ogosibigwa kw’ebibe, agaikaransa ensemo y’okoboko gw’okorio kw’Obonene igoro.
Obonene bw’Omwana o Nyasae
Ⅳ Omwana agakorwa koba omonene kobua abamalaika, buna erieta eri anyorete ri’omwando rire rinene kobua ayabo.
Ⅴ Ekiagera Nyasae tatebetie momalaika onde bwensi,
“Aye, naye Omwana one,
reero nakoiboire”?
Gose naende,
“Inche nimbe asare ise,
nere ase ’nde nabe Omwana one”?
Ⅵ Korende ekero Nyasae arenge ange gotoma Omwana oye omotangi gocha ase ense, nigo atebete:
“Abamalaika bonsi ba Nyasae goika bamosasime.”
Ⅶ Korende igoro y’abamalaika Nyasae nigo agoteeba,
“Nyasae nigo agokora Abamalaika baye koba chimbeo,
na abasomba baye koba ebibemberi b’omorero.”
Ⅷ Korende igoro y’Omwana Nyasae agateeba,
“Oboruoti bwao aye Nyasae, mbobeo kare na kare,
nigo okogambera abanto bao ase oboronge.
Ⅸ Nigo bwanchete oboronge, na kogechete ogosaria;
ase ayio, Nyasae, oyore Nyasae oo, ogoakire amaguta,
okorenteire omogooko kobua oyo bw’abande bamino.”
Ⅹ Naende agateeba.
“Naye Omonene, kwabegete oboroso bw’ense korwa omochakano,
na igoro chionsi nemeremo y’amaboko ao.
Ⅺ Ebio inabisire, korende aye nigo oragenderere kobao,
birobio inabigote buna chianga,
Ⅻ nobiringe buna egetambaa gi’okwambara, na birobio nabionchoke buna chianga.
Korende aye naye oria oria ore buna kwarenge,
na obogima bwao tibokoba nomoerio.”
ⅩⅢ Nyasae tatebeti onde ase abamalaika baye:
“Ikaransa ensemo y’okoboko kwane gw’okorio,
goika mbabeeke ababisa bao babe inse y’amagoro ao”?
ⅩⅣ Abamalaika ngento ki gotatiga emeika y’ogokorera Nyasae, batomire gokorera baria barache konyora omwando bw’ogotooreka?