RIRUUBE RIA PAULO OMOTOMWA ASE
FILEMONI
Ogochaakera
Filemoni nigo arenge omokristo omanyekaine mono oyio okageire koba omobwatani bw’ekanisa ya Kolosai. Filemoni nigo abwate omosomba ore korokwa Onesimo. Omosomba oyo konya otamire korwa ase omonene oye ase engencho baetanete. Onesimo bakaumerana na Paulo oyio ase chingaki echio orenge echera. Goetera ase Paulo Onesmo akaba omokristo. Paulo nigo akoriika riruube gochia ase Filemoni komoboria airanerane nomosomba oye oyio Paulo atomete ase are. Ase riruube eri Paulo nigo agotebia Filemoni aariganie Onesmo tari rioka buna omosomba, korende buna omokristo omwabo.
Okobagwa kw’egetabu eke
Ogochaakera 1-3
Omogoko igoro ya Filemoni 4-7
Paulo ogosabera Onesimo 8-22
Ogokoorera 23-25
Ⅰ
Ⅰ Inche Paulo, omosibwa ase engencho ya Kristo Yeso, boigo korwa ase oyominto Timotheo ase Filemoni, omwanchwa oito, omokori emeremo amo naintwe.
Ⅱ Na abanto b’ekanisa ekoumerana ase enyomba yao, naboigo Apia, mosubati ominto, na Arikipo, omorwani ore amo naintwe.
Ⅲ Tiga Nyasae tata oito na Omonene Yeso Kristo abae obuya na omorembe.
Obwanchani bwa Filemoni na okwegena kwaye
Ⅳ Oyominto Filemoni, ase ogosaba kwane botambe nigo ngoakera Nyasae one ng’a mbuya mono ekero ngokoinyora.
Ⅴ Ayio nase engencho nkoigwa amang’ana igoro y’obwanchani bwao ase abanto bonsi b’Omonene, na okwegena kwao obwate ase Omonene Yeso.
Ⅵ Nasabire ng’a okobwatana gw’okwegena tore nakorokwo gokore emeremo, erinde omanye mono kobua kera egento ogosesenigwa kore ase tore intwe ase okobwatana na Kristo.
Ⅶ Naki oyominto, nigo nabeete nomogooko omonge na okoremigwa ase engencho y’obwanchani bwao! Chinkoro chi’abaanto b’Omonene bonsi chiasasokire.
Paulo ogosabera Onesimo
Ⅷ Ase ayio, ninde noboremu obonge buna momura omino ase Kristo kogochika eri ogwenerete okore.
Ⅸ Korende ase engencho y’obwanchani bwane ase ore, nanchire kobua kogosorora, buna inche Paulo inde omotomwa, naende inde omosibwa o Kristo Yeso.
Ⅹ Nagosoroire ase ribaga riaye omwana one ase Kristo, Onesimo oyio ekero nare ase egesibo kiane, obete omwana one kemoika.
Ⅺ Agwo kare tarenge taisainegento kende ase ore, korende bono obeire oyo bw’engeencho mono ase ore nainche boigo.
Ⅻ Ere namotomire gocha ase ore, na nigo enga buna nigo abogoretie enkoro yane.
ⅩⅢ Naki inche nigo narenge kogania abeere aiga amo nainche ase nsibire ase engencho y’enchiri, erinde anyare gonkorera ribaga riao.
ⅩⅣ Korende tindigeti okore ing’ana rinde rionsi ase ogokobetereria erio aye onkoonye, korende erio ebe ase ogwancha kwao aye omonyene. Inche tinkonyara gokora ing’ana rinde rionsi otatiga aye gwancheranire narirorio.
ⅩⅤ Aande nakio kiagerete Onesimo agaatananwa korwa ase ore ase ekero egeke, erinde airane koba ase ore ase ebiro bionsi.
ⅩⅥ Naende ere bono tari buna omosomba, korende goetania omosomba; buna oyominto omwanchwa, ase Kristo. Asende mono, na ase ore mono kobua, buna omosomba, naende buna oyominto ase Omonene!
ⅩⅦ Gaki, onye kondengereretie inche buna omobwatani oo, omooroisie koreng’ana buna kware kondoisia inche.
ⅩⅧ Onye okomocheire ase ing’ana rinde rionsi, gose okoriete esira, oyeborie goetera ase ’nde.
ⅩⅨ Inche Paulo nariikire aya nokoboko kwane omonyene, ning’akane. Amaene, ninyare kogoteebia, ng’a nore nesira ase ’nde, ase obogima bwao aye omonyene.
ⅩⅩ Ee, oyominto, ninganetie obokonyi bokorwa ase ore, ekiagera noyo bw’Omonene ore. Buna oyominto ase Kristo, ong’e omoyo!
ⅩⅪ Ninde nobomaene aiga buna ngokoriikera aya, ng’a nokore buna nagosabire ekiagera nomoigweri ore, naende ase ayio nimanyete ng’a nokore goetania.
ⅩⅫ Amo nayio, ondoiserie aase ngocha komenya, naki ninsemeretie ng’a Omonene Nyasae nayairanerie goetera ase ogosaba kwaino mwensi erio imbe nainwe.
Amakwania y’ogokoorera
ⅩⅩⅢ Epafara, oyosibire amo nainche ase engencho ya Kristo Yeso, ogokwanirie.
ⅩⅩⅣ Boigo Mariko na Aristariko, na Dema, na Luka.
ⅩⅩⅤ Obuya bw’Omonene oito Yeso Kristo bobe amo nainwe mwensi.