Ⅲ
Ogosaba kwa Habakuki
Ⅰ Oko nogosaba kw’omobani Habakuki.
Ⅱ Aye Omonene, naigure chinkuma chiao, nairokire.
Omonene, ogokora kwao tiga kobe okoyia ase emiaka eye,
tiga komanyekane ase emiaka eye.
Ekero ore nendamwamu oinyore amaabera.
Ⅲ Nyasae ngocha are korwa Temani
ee, Ere oyore Omochenu ngocha are korwa ase egetunwa gia Parani.
Obonene bwaye mbotube igoro chionsi,
na ense neichorwe nogotogigwa kwaye.
Ⅳ Okobara kwaye nigo konga buna okw’erioba,
gokomoreka korwa ase okoboko kwaye,
aroro agwo obobui bwaye nao bobisire.
Ⅴ Amarwaire agoita nigo atang’aine bosio bwaye,
na amaakwa nigo akobwatia chimbaratero chiaye.
Ⅵ Ekero agotenena, ense nigo agotengechigwa,
na ekero akorigereria, abanto b’ebisaku nigo bakonyegerigwa.
Ebitunwa biarengeo korwa kare nigo bikorimera gochia inse.
Ere nigo agotaara ase chinchera chiaye chia kare.
Ⅶ Nkarora chinyomba chire Kusani chichandegete,
ne chieema chi’ense ya Midiani chikanyegerigwa.
Ⅷ Inee! Aye Omonene nigo ogechirie ne chindooche,
gose endamwamu yao nigo ere igoro ase chirochio?
Inee! Nigo ore nekeririanda ase chinyancha,
ekiagera nigo gwachete ne chibarasi chiao koriinete chigari chiao chi’obobui?
Ⅸ Obota bwao bwaorokigwe maiso marore
amo nemegwe ye ring’ana riao kwarierete ebisaku eira.
Nigo gwatandorete ense ne chindooche.
Ⅹ Ebitunwa nigo biakorooche, bikanyegerigwa,
amaache e chiooro agaeta;
chindiba chigaaka amariogi,
chikaimokia amaboko abo gochia igoro.
Ⅺ Ekero emegwe yao yarenge korunda na komesa,
ne ritimo riao riarenge komekameka,
na erioba na omotienyi bigatenena aase abo.
Ⅻ Aye nigo gwaetete ase ense kore nekeririanda,
okamionogorera abanto b’ebisaku inse kore nendamwamu.
ⅩⅢ Aye nigo gwasogete ase ogotooria abanto bao,
ee, okarentera omoakwa amaguta oo ogotooreka.
Nigo gwasenyentete ekerama ki’enyomba y’omokori amabe,
okayetagora korwa ase oboroso goika ase egechuria.
ⅩⅣ Aye nigo kwabeetete emetwe y’abasikari babo namatimo abo abanyene,
ekero batocherete buna ekembugumbugu kegocha gotoserebania
bare nomochengo gotosiria buna abataka bagosirigwa bobisi.
ⅩⅤ Nigo gwaetete ase enyancha ne chibarasi chiao,
ogaetera ase emerindo yarenge koeera ne chinguru.
ⅩⅥ Ekero naigwete amang’ana ayio, enda yane egatengechigwa,
ebikoba biane bikaiguswa ekero naigwete okoeera okwo,
amauga ’omobere one akarwara na kogunda,
ngatengechigwa aase nateneine.
Nimbe ndemereretie ase rituko riria ri’emechando,
ekero omobisa arache korwania egesaku giaito.
ⅩⅦ Emeko tegosicha,
na emesabibu tekwama;
emezeituni nigo erabe bosa tiyama,
na emegondo tekwama chindagera.
Amaicho e ching’ondi nasirigwe korwa ase ameri,
na amaicho e chiombe takobao.
ⅩⅧ Nonya naboigo ningokere Omonene, ninchengere Nyasae ore ogotooreka kwane.
ⅩⅨ Nyasae oyore Omonene, nere chinguru chiane;
nigo agokora amagoro aane abe amaango buna ay’ensune,
nigo agontaaria ase ebitunwa biane igoro.
Ase omoteria. Ogoteera kogoterwa ase okobugigwa kw’amakano aane.