EGETABU GIA
SEFANIA
Ogachaakera:
Sefania nigo akorete oborandia bwaye aria Yuda gati y’emiaka 640 na 620 nyuma Yeso ataraiborwa, chingaki chi’okogamba kw’omorwoti Josia o Yuda ase omwaka 640-609 nyuma Yeso ataraiborwa.
Ekieng’encho mono ase okorandia kwaye nkeria ng’a Nyasae nabae egesusuro abanto ba Yuda na Yerusalemu ase engencho bakorerete chinyasae chi’oborimo. Chingaki echio arabae egesusuro nachi chiria chigokwanerwa buna “Rituko ri’Omonene”. Nonya nebisaku biria bietanaine Yuda boigo mbiegwe egesusuro.
Korende ase amatuko are bosio, abamenyi ba Yerusalemu mbamokorere Nyasae, nere Nyasae nabasesenie neende.
Okobagwa kw’egetabu eke
Rituko ri’ekiina ri’Omonene 1:1—2:3
Abanto baetanaine Abaisraeli bakonacherwa ekiina 2:4-15
Yerusalemu okonacherwa ekiina, naende okoboorigwa 3:1-20
Ⅰ
Ⅰ Eri nario ring’ana ri’Omonene riachete ase Sefania, mosinto o Kusi, o Gedalia bw’Amaria, bw’Hezekia, ekero Yosia, mosinto bw’Amoni, arenge omorwoti bw’Abayuda.
Rituko ri’ekiina ri’Omonene
Ⅱ Omonene nigo agoteeba iga: “Ninsirie kegima kera egento kerwe ase ense.
Ⅲ Ninsirie Mwanyabaanto, ne ching’iti, ne chinyoni chia igoro, ne chinswe chi’enyancha. Ninsirie nebikorenta okogocha amo nabakori amabe; ee, ninsirie Mwanyabaanto korwa ase ense.” Nabo Omonene atebiire.
Ⅳ “Nindambore okoboko kwane igoro y’Abayuda, na igoro y’abanto bonsi abamenyete Yerusalemu. Ninsirie korwa aase aiga abatigari abwo bagosasiima Baali, na amarieta ’ababani na ay’abakuani abagokorera emegwekano.
Ⅴ Ninsirie baria bakoriina kerama igoro gosasiima erioba, na omotienyi, ne ching’enang’eni boigo ninsirie abanto baria bagonsasiima inche Omonene na batiana ase ’nde, naende batiana nase enyasae eria Milikomu.
Ⅵ Ninsirie abairanire magega batigire kombwatia inche Omonene, na baria batari kondigia inche Omonene, gose komboria amang’ana.”
Ⅶ Tegerera okire‐kiri ase obosio Omonene! Rituko ri’Omonene nigo rire ang’e; Omonene bwariganirie ekeng’wanso, bwatananire abwo arangeirie ase ekegeni kiaye na abasesenie.
Ⅷ Nigo agoteeba iga: “Ase rituko riria ri’ekeng’wanso kiane inche Omonene nindue egesusuro ase abagaambi, na ase abamura b’omorwoti, na ase bonsi ababegete chianga chie chinse chingeni.
Ⅸ “Boigo rituko erio nindue egesusuro ase bonsi abwo bagotamboka ase omoriibo bw’egesieri inse, na ase baria baichoirie ase chinyomba chi’abanene n’ebinto bi’obourereria, na ebi’obong’ainereria.”
Ⅹ Omonene nigo agoteeba iga: “Ase rituko erio eriogi ri’okorera ndigugwe korwa ase Egeita gie Chinswe, na okweumia nkoigugwe korwa ase ensemo enyia y’omochie, na endumo enene korwa ase ebigoro.
Ⅺ Inwe abamomenyete ase ensemo eye ekorokwa Ekonu, rera, ekiagera abaonchoreria bonsi basirigwe, na abasangereria bonsi be chitaabu basirigwe.
Ⅻ “Ase engaki eria nimbe nkorigarigia Yerusalemu ase okoyomoreka ne chitaaya; nindue egesusuro ase abanto baria bamenyete bare n’obotoereru, buna edivai ekirete ase eturubo, abwo bagweteebia ase chinkoro chiabo: Omonene takonyara gokora kende, amaya gose amabe.
ⅩⅢ Chinibo chiabo nchisakorwe, ne chinyomba chiabo nchisarigwe chitigwe bosa. Nabaisa koagacha chinyomba, tibagochimenya, nabaisa gosimeka emesabibu, tibakonywa edivai ekorwao.”
ⅩⅣ Rituko rinene ri’Omonene ng’ang’e rire, nigo rire ang’e mono rikoayerera. Tegerera oigwe, rituko ri’Omonene ngocha rire! Abarwani esegi chituoni nigo bakorera bare nobororo.
ⅩⅤ Rituko riria nigo rire eri’endamwamu, ne rituko ri’emechando na obororo, ne rituko ri’ogosirigwa na ogotigara bosa, ne rituko ri’omosunte na omorumbe, ne rituko ri’amare na omosunte ekerima.
ⅩⅥ Rituko riria neri’okobugigwa kw’ebitureri na okorera gw’esegi igoro y’emechie egiteire chindwaki, na igoro y’emerobiri emetambe mono.
ⅩⅦ “Nindete emechando emenene igoro ya Mwanyabaanto goika babe bagotaba‐taba buna emeuko, ekiagera bakorire ebibe ase ’nde inche Omonene. Amanyinga abo naumorwe buna eogoto, na emebere yabo netugutwe buna esike.”
ⅩⅧ Ase rituko riria ri’endamwamu y’Omonene chifeta chiabo ne chitaabu chiabo tibikonyara kobatooria. Ense yonsi nesambwe esirigwe nomorero bwe risemi riaye. Mobosokano narente omoerio bw’okoondokia ase abanto bonsi bamenyete ase ense.