EGETABU GIA
HOSEA
Ogochaakera
Hosea nigo arangeretigwe koba omosomba o Nyasae ase ense yaye, oborwoti bwa Irianyi ya Israeli, ase omwaka 750-725 nyuma Yeso ataraiborwa. Hosea nigo atanganeretwe na Amos oyio ore korandia ase ense ya sugusu ya Israeli.
Hosea nigo are gokuurera abanto igoro y’ogosasiima chinyasae chi’oborimo ase chingaki chiaye boigo n’ogotaba n’okwegena ase Nyasae gati y’Abaisraeli. Amang’ana aya yogotaigwera gati y’Abaisraeli, nigo agokwanerwa buya mono goetera ase enywomo ya Hosea. Buna korengana mokaye Gomeri atigete koba omwegenwa ase ere buna omosacha oye, naboigo abanto bamotigete Nyasae. Ase engencho eyio Abaisraeli mbaegwe egesusuro. Korende omoerio Nyasae goetera ase obwanchani bwaye obonge nabairanie boigo nakoirania oboamate obuya gati yaye nabarabwo.
Okobagwa kw’egetabu eke
Okonywoma gwa Hosea na eamate yaye 1:1—3:5
Amang’ana are mamincha y’Abaisraeli 4:1—13:16
Amang’ana ay’okoiranera Nyasae amo neira 14:1-9
Ⅰ
Ⅰ Eri nario ring’ana ri’Omonene riacherete Hosea, mosinto o Beeri, ase amatuko aria Usia, na Yotamu, na Ahasi, na Hezekia, baarenge abarwoti b’Abayuda, na ekero Yeroboamu, mosinto o Yehoasi, arenge omorwoti bw’Abaisraeli.
Moka Hosea na abana baye
Ⅱ Agwo ekero Omonene achagete gokwana goetera ase Hosea, Omonene akamoteebia iga: “Genda onyuome omokungu omotayayi, onyore abana b’obotayayi, ekiagera ense eye yantigire inche Omonene ase ogokora obotayayi obonene.”
Ⅲ Ase ayio Hosea akagenda, akanyuoma Gomeri, omoiseke o Dibulaimu, na omokungu oyio akaba morito, akamoiborera omwana omoisa.
Ⅳ Omonene agateebia Hosea, “Moroke Yesireeli, ekiagera engaki netigarete enke, ndarue egesusuro ase ororeeria rwa Yehu, ndusie egesiomba ki’amanyinga aria abanto bamenyete Yesireeli baiterete. Ninsirie kegima oborwoti bw’Abaisraeli.
Ⅴ Ase rituko erio nimbune amata ’Abaisraeli agwo ase ense omweremo ya Yesireeli.”
Ⅵ Naende Gomeri akaba morito, akaibora omwana omoiseke. Erio Omonene agateebia Hosea, “Moroke Lo‐Ruhama, ekiagera tinkonyara kogenderera koba namaabera ase Abaisraeli, gose tinkobaabera nonya ng’ake.
Ⅶ Korende nindorere Abayuda amaabera. Inche Omonene, Nyasae obo, nimbatoorie ne chinguru chiane, gose tari ase okorwana namata, gose nemioro, gose ne chibarasi chi’esegi, gose nabariini be chibarasi.”
Ⅷ Ekero Gomeri atachire Lo‐Ruhama, akaba morito naende, akaibora omwana onde omoisia.
Ⅸ Omonene agateebia Hosea, “Moroke Lo‐Ami, ekiagera inwe timori abana baane, na inche tinkoba Nyasae oino.”
Abaisraeli bakoiranerigwa amaya abo
Ⅹ Korende nonya naboigo, Abaisraeli nigo barabuche mono, babe buna omokenye o nyancha, tibakorengeka gose kobareka. Nebe ng’a ase barenge goteebigwa: Inwe timori abana baane, bono mbateebigwe: Inwe nabana ba Omonene Nyasae ore moyo.
Ⅺ Abayuda amo n’Abaisraeli mbasangererekane, erinde bechorere oyomo korwa ase egati yabo erio abe omotwe obo okobaraa, barue ase ense eye. Ee, rituko erio ria Yesireeli nigo rirabe rinene.