Ⅱ
Ⅰ Mobaroke abamino abamura Ami, na abamino abasubati Ruhama.
Gomeri otari omwegenwa okworokia ng’a Abaisraeli tibari abegenwa
Ⅱ Mosorore nyoko, ee, momosorore, ekiagera ere tari omokungu one, na inche tindi omosacha oye. Tiga atige obonyaka borue ase obosio bwaye, na obotomani borue ase egekuba kiaye.
Ⅲ Atakoreti bo, nimochabore chianga chiaye, imotige getirianda abe bosa buna ase rituko riria aiboretwe. Nimokore abe buna erooro, na buna ense enyomo, nimotige akwe ase engencho y’erang’o.
Ⅳ Tinkororera abana baye amaabera, ekiagera nigo bare abana b’omokuungu omotayayi.
Ⅴ Ng’ina nigo arenge omotayayi, ee, oyo obaiborete nigo arenge gokora amang’ana y’obosoku. Nigo ateebete iga: niimbe ngotunyana abanchi baane, abwo bakong’a endagera nkoria, na amaache, na amarionya e ching’ondi, na egatani, na amaguta, na edivai.
Ⅵ Ase engencho eyio nintiiche enchera yaye namagwa, ning’agache orwaki roramotange ase agoetera.
Ⅶ Nabe okobwatia abanchi baye, korende takobaikeera; nabarigie, korende takobanyora. Erio nateebe: “Bono nkoirana inde, ngende ase omosacha one bw’eritang’ani, ekiagera engaki eria narenge asare nigo narenge buya kobua bono.
Ⅷ “Omokungu oria tamanyete ng’a ninche narenge komoa endagera, na edivai, na amaguta, naende ninche narenge komoa chifeta ne chitaabu chinyinge, echio abanto beroiseretie enyasae agwo Baali.
Ⅸ Ase ayio ning’iranie endagera yane, na edivai yane, ekero engaki eraikerane, boigo ning’ire amarionya aane e ching’ondi, na egatani, ebio namoete atube obogetirianda bwaye.
Ⅹ Bono nimochabore chianga chiaye ase amasio ’abanchi baye, imotige ore getirianda, gose monto onde tari oranyare komotooria korwa ase okoboko kwane.
Ⅺ Ninsirie kegima omogooko oye bwonsi, na Amatuko aye Amanene ay’Emetienyi Emeyia, ne Chisabato chiaye, na emeyega yaye echiikire.
Ⅻ Ninsirie emesabibu yaye, na emeko yaye, ebio akwanete igoro yabo, agateeba ng’a eyio nero eng’eria yaye abanchi baye bamoete. Inche ninsirie emete eyio ebe orosana, ne ching’iti chi’orosana chiyerie.
ⅩⅢ Ning’ee omokungu oyio egesusuro ase engencho y’amatuko ayio akorerete chinyasae chiria chia Baali emeyega, agachisambera ubani, naende agechabera ebigera bi’amato na ebinto binde bi’ogwechabera, ekero arenge gotunyana abanchi baye, korende akaanyeba.” Nabo Omonene agoteeba.
Obwanchani Omonene ase abanto baye
ⅩⅣ Ase ayio nimoebererie, imoire ase erooro, erinde nkwane nere amang’ana y’obwanchani.
ⅩⅤ Ekero ararue agwo nimoiranerie emegondo yaye y’emesabibu, naende ninkore Ebate y’Akori ebe egesieri ki’ogosemeria. Aroro agwo natere buna ekero keria arenge omoke, ekero aruete ase ense ya Misiri.
ⅩⅥ Inche Omonene nigo ngoteeba iga: “Ase rituko erio nondoke omosacha oo, gose tokogenderera kondoka Baali yao.
ⅩⅦ Nindusie amarieta e chinyasae Baali korwa ase omonwa bw’omokuungu oyio, tichiatorwa nonya ng’ake ase amarieta abo.”
ⅩⅧ “Ase rituko riria, ninkore okobwatana ne ching’iti chi’orosana, ne chinyoni, ne ching’iti chikwagura inse, ase engencho y’abanto baane. Ninsirie korwa ase ense eye amata, na emioro, na esegi, ntige batimoke bare n’obotoereru.
ⅩⅨ “Ninkoriere boko nkonyuome obe oyone goika kare na kare;
ee, ninkoriere boko ase oboronge n’ekeene,
na ase obwanchani botari koera, na ase amaabera.
ⅩⅩ Ee, ninkoriere boko ase obwegenwa,
naye omanye ng’a ninche Omonene.
ⅩⅪ Inche Omonene nigo ngoteeba iga:
Ase rituko erio nebe ng’a ninyigwe ogosaba kwa igoro,
na igoro nchiigwe ogosaba gw’ense.
ⅩⅫ Erio ense eiranerie erue endagera, na edivai, na amaguta ’amazeituni,
na ebinto ebio mbiisanekie okogania kwa Yesireeli.
ⅩⅩⅢ Nimosimeke Yesireeli ase ense eye abe oyone.
Nimororere amaabera oyio otaroreretwe amaabera,
ninteebie abwo batarenge abanto baane:
Bono inwe nabaanto baane,
na barabwo mbateebe: Aye naye Nyasae oito.”