Ⅺ
Omorwoti bw’omorembe
Ⅰ Omoseboka norue ase ritina ria Yese riabutoretwe, na egesebo keramere korwa ase emeri yaye, nkiame amatunda.
Ⅱ Omoika bw’Omonene nobeere igoro asare;
omoika bw’obong’aini na okomanya,
omoika bw’ogosemia na bw’okomanya;
omoika bwe chisemi na okomoiroka bw’Omonene.
Ⅲ Omogoko oye nobe ase okomoiroka Omonene.
Ere takogaamba ebiina buna amaiso aye ararore,
gose takonacha ebiina buna araigwe namato aye.
Ⅳ Korende nigo arabae abataka oboronge bwabo ase okonacha ebiina,
tagokora ogwanchereria ase abaitongo b’ense.
Naake ense nenyimbo y’omonwa oye,
naite abakori amabe n’Omoika bw’omonwa oye.
Ⅴ Oboronge nabwo borabe orokini rw’ekenema kiaye,
na obwegenwa bobe orokini rw’okweboeria.
Ⅵ Esese y’orosana nemenye amo nemaanwa y’eng’ondi,
na engo neraare amo nemaanwa y’embori;
emori, na endo, na eng’ombe enoru nachibe chikogosoria amo,
na omwana omoke nabe ogochiraa.
Ⅶ Eng’ombe na edubu nchiriserie amo,
emori y’eng’ombe na emaanwa y’edubu nchiraare amo.
Endo neebe ekorisia obonyansi buna eng’ombe.
Ⅷ Omwana okogonka nabe okogosoria ase engoro ye rirubi,
boigo omwana omotache nabe ogosoyia okoboko kwaye ase engoro ye ring’ere.
Ⅸ Aase onsi ase egetunwa kiane egechenu,
ayare amabe, gose ayagosiria tagokorekana aroro;
ekiagera ense neichorwe nabaanto bamomanyete Omonene,
buna amaache aichire ase enyancha.
Abanto boosetwe mbairane
Ⅹ Ase engaki eyio Oyore Egesebo kie ritina ria Yese natenene abe ekemanyererio ase abanto; abanto b’ebisaku mbamorigie, na obomenyo bwaye mbobe nobonene obonge.
Ⅺ Nebe ase engaki eyi’Omonene narambore okoboko kwaye eria kabere koirania abatigari b’abaanto baye korwa Asuri, na Misiri, na Patirosi, na Ethiopia, na Elamu, na Shinari, na Hamati, na korwa ase ebisinka ne chinse chire ang’e nenyancha.
Ⅻ Natenenie ekemanyererio ase abanto b’ebisaku, na asangererie Abaisraeli abwo baseretigwe, naende asangererie Abayuda bonsi besiarerete ase chinsinyo inye chi’ense.
ⅩⅢ Ribero Abaefraimu babwate ndisire, na abwo bakwoboyia Abayuda mbasirigwe; Abaefraimu tibakogenderera koba ne ribero ase Abayuda, na Abayuda tibakogenderera kwoboyia Abaefraimu.
ⅩⅣ Abayuda na Abaefraimu mbaumokere Abafirisiti korwa ensemo ya bosongo, naende mbasakore abanto ba moocha. Erio barwanie Abaedomu na Abamoabu; Abaamoni mbabe bakoigwera.
ⅩⅤ Omonene nasarie kegima omosomo bw’Enyancha ya Misiri; nasungusie okoboko kwaye arente omwaga oguse igoro ase Orooche rwa Eufarati, erio arwatanane robe ebiambokero bitano na bibere, erinde abanto bambokere aroro buna ase ense enyomo.
ⅩⅥ Enchera enene neroiserigwe abatigari b’abaanto baye abatoorigwe korwa Asuri. Enchera eyio neebe buna eria Abaisraeli baeterete kobakorua Misiri.