Ⅱ
Omorembe okogenderera botambe
Ⅰ Ring’ana eri nario Isaya, mosinto bw’Amosi, aroche igoro ya Yuda na Yerusalemu:
Ⅱ Nebe ase amatuko ’agochi gocha,
ng’a egetunwa ki’enyomba y’Omonene
ngekong’igwe kebe eki’engencho enene kobua ebinde;
naende keimokererigwe igoro geetanie ebigoro,
na ebisaku bionsi mbiendoke gochiao.
Ⅲ Ee, abanto abange mbagendeo bateebanie:
“Inchuo, totiire gochia ase egetunwa kia Omonene,
togende ase enyomba ya Nyasae o Yakobo,
erinde atworokererie chinchera chiaye,
na intwe tonyare kobwatia oboeto bwaye.”
Amachiiko ’Omonene nasoke korwa Sayoni,
ne ring’ana riaye ndirue Yerusalemu.
Ⅳ Eri’Omonene nanache ekiina ase egati y’ebisaku,
nae abanto abange oboronge bwabo,
barabwo mbature emioro yabo ebe amakombe akorema,
na amatimo abo abe emeyio chinkuro;
egesaku tigekoimokera egesaku kende nemioro,
gose abanto tibakweorokereria korwana esegi naende.
Ⅴ Inwe abanto b’enyomba ya Yakobo inchwo totaare ase omobaso Omonene.
Oboenenu mbosirigwe
Ⅵ Aye Omonene kwangire abanto bao, abwo bare ab’ororeeria rwa Yakobo, ekiagera barabwo baichoirwe ne chingencho chi’abaanto ba moocha, na nigo bagokora oboringoria buna obw’Abafilisti; boigo babwatanire nabaanto b’echinse chingeni.
Ⅶ Ense yabo nigo eichire ne chifeta ne chitaabu, ne chinibo chiabo tichiri nomoerio. Ense yabo nigo eichire ne chibarasi, ne chigari chiabo tichikoera.
Ⅷ Ense yabo nigo eichire nemegwekano y’ogosasimwa, nigo bagotung’ama inse basasiima emeremo y’amaboko abo, eyio bakorire nebiara biabo abanyene.
Ⅸ Ase enchera eyio abanto bonsi nigo barakeeigwe, tobaisa kobaabera nonya ngake aye Omonene.
Ⅹ Inwe soa ase egetare ime, moreme chingoro mwebiseo, motame korwa ase okoirokia kw’Omonene, na korwa ase obonene bwaye bore obonene.
Ⅺ Rituko ngocha rire ekero obomwenu bwa Mwanyabaanto borairanigwe inse, na oboenenu bwabo mbokeeigwe, na ase rituko eri’Omonene bweka naimokererigwe igoro.
Ⅻ Omonene bw’Emeganda ochikiire rituko erimo arasirie abwo bonsi bare abaenenu na abamwenu, na bonsi abakweimokereria igoro mbairanigwe inse.
ⅩⅢ Rituko erio nisirie emecharake yonsi ya Lebanoni ere emetambe echongororogete gochia igoro mono; boigo ne Emealuni yonsi ya Basani,
ⅩⅣ na ebitunwa bionsi ebitambe, na ebigoro bionsi biimokererete igoro,
ⅩⅤ na emerobiri yonsi emetambe, ne chindwaki chinkong’u,
ⅩⅥ ne chimeeri chionsi chia Tarisisi, n’Echimeri chionsi chingiya.
ⅩⅦ Obomwenu bwa Mwanyabaanto mbokeeigwe, na oboenenu bwabo mbosirigwe. Na ase rituko eri’Omonene bweka naimokererigwe igoro.
ⅩⅧ Emegwekano yonsi egosasimwa nesirigwe kegima.
ⅩⅨ Abanto mbasoe ase amakuruma ’ebitare, na ase chingoro chire ase riroba; mbatame korwa ase okoirokia kw’Omonene, na korwa ase obonene bwaye bore obonene, ekero araimoke kwoboyia ense.
ⅩⅩ Ase rituko erio abanto mbatugute emegwekano yabo ye chifeta na eye chitaabu, ebinto ebio beroiseretie ase okobisasiima, mbabitugutere ching’uko na ebitabora mato.
ⅩⅪ Erio basoe ase emienya y’ebitare, na ase obotandoku bw’aroro, mbatame korwa ase okoirokia kw’Omonene, na korwa ase obonene bwaye bore obonene mono, ekero araimoke kwoboyia ense.
ⅩⅫ Ase ayio, batige Mwanyabaanto, abwo okoeyana kwabo gwe chimioro kore embeo bosa. Omonto, ninki aisaine?